Exodus 20 - Labrador Inuttitut Heritage Bible

Perᴋojat 10. Inuit kapiasukput, Mosesib manigorpait.

¹ Gûdelo oᴋarpok oᴋautsinik makoninga tamainik, oᴋarlune:

² Uvanga Nâlegauvunga Gûdît, âtsisimajok ilingnik nunamit Egiptenemit, iglomit kipalôvingmit.

³ Sanipkut asimnik Gûdeᴋartuksaungilatit.

⁴ Inungoarmik adsingoarmiglônêt sanajuksaungilatit pivlutit, takpâne ᴋilangmêtub adsinganiglônêt, ᴋilaub atânêtub adsinganiglônêt, nunab atânêtub imânêtub adsinganiglônêt:

⁵ Taimaitut tuksiarvigijaksaringilatit kivgartornagillo: Uvanga Nâlegaujunga Gûdît ilungertudlarlunga Gûdeogama, atâtat idluitulininginik pidlarnikteojunga ᴋitorngangine uvamnik omisuktune ernerêt kingorlerêt pingajungit sitamangillo tikidlugit:

⁶ Nâpkiningnermigle sakᴋertitsivunga tausendeoᴋatartune nagligijimne perᴋojamniglo nâlaktune.

⁷ Nâlekab Gûdivit atinganik atornerluktuksaungilatit, Nâlekab pidlartailiniangimago atinganik atornerluktok.

⁸ Uvlok Sabbateojok erᴋaruk, ivlerijaurᴋovlugo ilingnut.

⁹ Uvlut 6it kingorlerêklutik sanajuksauvotit, suliaksatillo tamaita piniarlugit:

¹⁰ Uvlulle 7ingane Nâlekab Gûdivit Sabbatinga naliutivok: tagva sumiglônêt sanajuksaungilatit, igvit, ernîllônêt, panîllônêt, kivgallônêt angut, kivgallônêt arnak, nergjuteᴋotitillônêt, ilagingitallônêt najugarnêtok:

¹¹ Uvlune 6ine Nâlekab ᴋilak nunalo imarbiglo ilûnnaitalo imab iluanêtut sanalaungmagit, uvlullo 7ingane merngoersilaukpok: tamanna pivlugo Nâlekab uvlok Sabbateojok saimanartipâ ivsornaitilâllo.

¹² Atâtangnik anânangniglo nâlaktuksauvotit: akkunêrtomik inôniarᴋovlutit nuname Nâlekab Gûdivit tunijangane ilingnut.

¹³ Inuartuksaungilatit.

¹⁴ Nuliarêngnermik asseroijuksaungilatit.

¹⁵ Tigliktuksaungilatit.

¹⁶ Inôᴋatitit saglôtigivlugit oᴋartuksaungilatit.

¹⁷ Inôᴋativit iglunganik pijomajuksaungilatit, inôᴋativit nulianganik, kivganganiglo angumik, kivganganiglo arnamik, tuktuvaᴋotinganiglo, siuterᴋortojoᴋotinganiglo, sunatuinarniglônêt inôᴋativit perᴋutinginik pijomajuksaungilatit.

¹⁸ Inuillo ilûnnatik malugivait kalluit, ᴋaumalaillo, tiptulautiblo nipinga ᴋakᴋaublo iserlungninga: inuillo tamanna takogamitsuk nûput, alivasiktomelo nangerput.

¹⁹ Mosesemullo oᴋarput: Igvit oᴋarvigitigut, nâlagomavogullo: Gûdible oᴋarviginiaratigut, toᴋolerᴋonata.

²⁰ Mosesiblo inuit oᴋautivait: Erᴋsiniarase: Gûde tikisimangmat ôktoromavluse, sivôranarningalo kênapse sânginêrᴋovlugo, idluitulerᴋonase.

²¹ Inuillo alivasiktome nangerput, Moseselo ᴋaglilerpok tâktoksoarmut isortamut Gûdib inigijanganut.

²² Nalekablo Mosese oᴋautivâ: Imâk oᴋartuksauvotit Israêlikunut: Takosimavose oᴋarvigigapse ᴋilangmit.

²³ Silbereojunik gûdeoᴋataujuksanik uvamnut sanajuksaungilase, ilipsingnullo gûdeliortuksaungilase goldeojunik.

²⁴ Ivjomik tunerguserviliortuksauvotit uvamnut, tâpsomalo ᴋângane tunergusertuksauvotit tunergutinik ôtaksanik, tunergutiniglo ᴋujalijutiksanik, saugaᴋotingnit tuktuvaᴋotingnillo; inine tamaine atimnik taisiviorᴋojamne tagvane tikitsomavagit saimauseromavagillo.

²⁵ Ujarangnigle tunerguservilioromaguvit uvamnut, ujarangnut sanamajunut sanajaksaringilat: sanagutit kivigungne tâpsomunga ivsornartipat.

²⁶ Majûtitigullônêt majoartuksaungilatit tunerguservimnut, kangunarnît saᴋᴋijârtitaurᴋonago tâpsoma sângane.