Exodus 2 - Labrador Inuttitut Heritage Bible

Mosesemik.

¹ Taipsomane angutib Levikut ilangata nuliarileriartorpâ Levib paningita ilangat.

² Arnarlo tâmna singailerpok ernermiglo ernivok. Sorusitsiangojorlo takogamiuk, ijeriartorpâ takᴋit pingasut nâvlugit.

³ Sivitunersamigle ijerlugo sapperamiuk, iklerviarsuk ibviogak tiguvâ tâpsomunga; mingoarlugolo kutsomullo târmullo, nutarârsuglo tagvunga ilivlugo pitipâ iviksuit akornganut kôb sinânut.

⁴ Najangale ᴋanigalâgungnairlune ᴋikarpok, nautsertorlune ᴋanok ilinganiarmangât.

⁵ Tagva Faraub paninga atersarpok ubvaromavlune kôngme, uigasuᴋotingillo pisulerput kôb sinâgut. Iklerviarsugle iviksuit akornganêtok takogamiuk, kivgarne arnak tilivâ aijaurᴋovlugo.

⁶ Mattueramiuk, nutarârsuk takovâ, sunaubvalo, angutearsuk ᴋeajok. Nagligilerpâ tagva oᴋarlunelo: Tagga, nutarârsuit Ebrêereojut ilangat.

⁷ Najangale oᴋarpok Faraub paninganut: Arnat Ebrêereojut amâmaktitsijut ilangat ᴋairᴋojartoraksarivigô, nutarârsungmik ilingnut amâmaktitserᴋovlugo?

⁸ Faraub paningata oᴋautivâ: Atê! Uigasublo nutarârsub anânanga ᴋairᴋojartorpâ.

⁹ Faraublo paninga oᴋarpok tâpsomunga: Nutarârsuk una naksaruk, uvamnut amâmaktiniarlugo, akkilerniarapkit. Arnab nutarârsuk naksarpâ amâmaktilâlo.

¹⁰ Soruserle aglisimangmat, âpâ Faraub paninganut, tâpsomalo ernerilerpâ atserarpâlo Mosesemik, oᴋarame: Kôngmit ᴋaᴋitara.

¹¹ Pijoᴋarporlo taipsomane: Mosese inumariolerame, anivok ᴋatangutiminut, siorniornartunik suliaᴋarningit takoniarlugit; takolerpâlo angut Egiptenemiok anaulerniktok angumik Ebrêereojomik, ᴋatangutime ilanganik.

¹² Ilûnnânelo takojaksarsioralloarlune inuksinginame, Egiptenemiok taimna toᴋopâ sauvâlo siorᴋanut.

¹³ Uvlub aipangane amma anigame, angutik Ebrêereojuk pâjuk takovak, oᴋarporlo pikaluktomut: Sôk inôᴋatit anaulerpiûk?

¹⁴ Tâmnale oᴋarpok: Kia angajoᴋângortipâtît idluarsaijungortilutillo uvaptingnut? Uvangatauk toᴋotsomavingâ, sorlo Egiptenemiok toᴋogangne? Tagva Mosese erᴋsilerpok, oᴋarlune: Sunaubva, tusaumajaulerᴋunga.

¹⁵ Faraublo tamanna tusaramiuk, Mosese toᴋonasuarpâ. Mosesele ᴋemâlerpok Faraomit, nuna Midia unnersiorvigivlugo, imektarviublo saniane ᴋikarpok.

¹⁶ Ajoᴋertuijorle Midiamêtok paniᴋarpok 7nenik; tâpkoa ᴋallujartorput imerᴋautillo imertorpait, atâtamik saugaᴋutingit imertitsomavlugit.

¹⁷ Tagva mianersijut tikilerput, tagvangat ajaklugit. Mosesele nikovipok, ikajorlugillo saugaᴋutingit imertipait.

¹⁸ Atâtamingnut Reguelemut tikingmata, oᴋarpok: Sugapse uvlome tikisaraidlarᴋisê?

¹⁹ Kiovât: Angutib Egiptenemiub piulivâtigut mianersijut agganginit, ᴋallûtivlutalo aglât, saukallo imertilugit.

²⁰ Tagva oᴋarpok paniminut: Nanêᴋâ taimna? Sôk angut taimna ᴋemakpisiûk? ᴋairᴋolersiuk nerriᴋataujuksaungmat.

²¹ Mosesiblo angut tâmna angervigivâ tagvanêtsomavlune. Tâpsomalo Mosese tunitjivigivâ paniminik Ziporamik.

²² Tâmna ernermik ernivok, Mosesiblo Gersomemik atserarpâ, oᴋarame: Tujormiangolerpunga nuname takorngartamne.

²³ Uvlut unuktut taipkoa anigortilugit, Egiptenemiut ataningat toᴋolerpok. Israêlikullo anersaumidlarput kivgartorᴋojaunitik pivlugit, nipliadlarpullo; nipliadlarningillo kivgartorᴋojauningit pivlugit Gûdib sânganut pivut.

²⁴ Gûdiblo ârosungningit tusâvait, angersimaninelo Abrahamut Isaamullo Jakomullo erᴋarpâ.

²⁵ Gûdiblo Israêlikut takonârpait isumagivlugillo.