Exodus 19 - Labrador Inuttitut Heritage Bible

Gûdib oᴋauserijangit inungnut Mosesekut Sinaimit. Inuit opalungaijartauvut.

¹ Takᴋit pingajuane, Israêlikut aniningata nunamit Egiptenemit kingorngane, uvlorme tâpsomane tikiput Sinaib sunaᴋajuitunganut.

² Aularsimangmata Refidimit, tikisimavlutiglo sunaᴋajuitomut Sinaimut, tangmârpullo sunaᴋajuitome; tagvane Israêlikut tangmârput ᴋakᴋaub nalâne.

³ Moseselo majorarpok Gûdemut, Nâlekablo ᴋaigarsugvigivâ ᴋakᴋamit, oᴋarlune: Imâk oᴋartuksauvotit Jakokunut, Israêlikullo oᴋautilugit;

⁴ Egiptenemiunut piniarnerijakka takolaukpase, ᴋanorlo nangmarapse naktoralît esarᴋunginut, tikiutitiluselo uvamnut.

⁵ Mânnalo nipiga nâlagomagupsiuk nalâgut, angerutigalo nalautsitilugo, tagva pivianartoᴋutiksaunersaulârpose adseogase uvamnut inungnit tamainit: tagva nuna ilûnât pigivara:

⁶ Atanioviojuksaulârpose ajoᴋertuijut uvamnut, inôᴋatigêllo ivsornaitut. Tamadja oᴋautsit oᴋauserijaksarijatit Israêlikunut.

⁷ Moseselo tikipok inuillo angajoᴋângit ᴋairᴋojaurᴋovait, oᴋautsillo tamakkoa tamaita Nâlekab perᴋojangit tâpsomunga sângiutivait tâpkonunga.

⁸ Inuillo ilûnnatik atautsikut kiovut, oᴋarlutiglo: Nâlekab oᴋauserijangit tamaita piniaromavavut. Mosesiblo inuit oᴋausingit âpait Nâlekamut.

⁹ Nâlekablo Mosese oᴋautivâ: Ahâk, tikitsomavagit nuvujame isortaksoarme, inuit tusarkovlugit oᴋarᴋatigigupkit, ilingnullo okperᴋovlugit nâksaungitomik. Mosesiblo inuit oᴋauserijangit oᴋautigivait Nâlekamut.

¹⁰ Nâlekablo Mosese oᴋautivâ: Inuit aivigikit, ivsornaitilugillo uvlome ᴋaupallo, ergortuilillo annorâmingnik,

¹¹ Opalungaijarlillo uvlut pingajuanut: Uvlut pingajuane Nâlegak akᴋaromârmat ᴋakᴋamut Sinaimut inuit ilûnnatik takoane.

¹² Inuillo kiglilerveᴋartitaksarivatit avatâgut, oᴋarlutit: Ulloreasugitse ᴋakᴋamut majorarᴋonase, aktornagolônêt kiglinga: naliat aktuijok ᴋakᴋamik toᴋotaksauvok.

¹³ Aggaillônêt aktoraksaringilât, kisiane ujarangnut millortaugune pitiktauvlunelônêt; nergjuteokpallônêt inôkpallônêt inôjuksaungilak: tiptulaut sivitojomik nipliarpat, ᴋakᴋamut ᴋaijuksauvut.

¹⁴ Moseselo atersarpok ᴋakᴋamit inungnut, ivsornaitilaitalo; Tâpkoalo annorâtik ergortorpait.

¹⁵ Inuillo oᴋautivait: Opalungaijaritse uvlut pingajuanut, arnaselo aktorniarasigik.

¹⁶ Sunaubvalo, uvlut pingajuane uvlâkut kalluit ᴋaumalaillo, nuvujarlo isortak ᴋakᴋamêpok, tiptulautiblo nipinga niperᴋortudlartok; inuillo ilûnnatik tangmârvingmêtut sajudlarput.

¹⁷ Mosesiblo inuit anitipait tangmârvingmit Gûde pagrearlugo; nangerpullo ᴋakᴋaub kiglingane.

¹⁸ ᴋakᴋarle Sinai ilûnnane iserludlarpok, Nâlekab akᴋarvigingmago ikomakut; iserlungalo ᴋongmuarpok sorlo ikomaksoaᴋarviksûb iserlungatut, ᴋakᴋarlo ilûnnane sajukpiludlarpoᴋ angijomik.

¹⁹ Tiptulautiblo nipinga nipliangmat sivitojomik nipperᴋortosivaliavlunelo, Mosese oᴋarpok, Gûdiblo kiovâ nipekut.

²⁰ Nâlegarlo akᴋarpok ᴋakᴋamut Sinaimut, ᴋakᴋaub ᴋânganut. Nâlekablo Mosese ᴋairᴋovâ ᴋakᴋaub ᴋânganut; Moseselo majorarpok.

²¹ Nâlekablo Mosese oᴋautivâ: Atersarit, inuillo inerterkit kibliguterᴋonagit Nâlekamut takojomamut, unuktullo tâpkonangat aserorᴋonagit.

²² Ajoᴋertuijullo, Nâlekamut ᴋaglilertut, ivsornaitilit nangminermingnik, Nâlegak kibliguterᴋonago tâpkonunga.

²³ Mosesiblo Nâlegak oᴋautivâ: Inuit tikitsungnangilat ᴋakᴋamut Sinaimut: inerteraptigut, oᴋarlutit: Kiglilerveᴋartitsilerit ᴋakᴋaub avatâgut, ivsornaitiuglo.

²⁴ Nâlekablo oᴋautivâ: Atê, atersarit, majorartuksauvotillo, igvillo Aronelo aiparilugo, ajoᴋertuijulle inuillo kibligutiniaratik majoraromavlutik Nâlekamut, tâmna kibliguterᴋonago tâpkonunga.

²⁵ Taimaimat Mosese atersarpok inungnut oᴋarvigilugillo.