Exodus 18 - Labrador Inuttitut Heritage Bible

Jetrob tikininga Mosesemut. Jetrob atanertuininga.

¹ Jetro, ajoᴋertuijok Midiame, Mosesib sakkia, tusarame tamainik Gûdib piniarninginik Mosesemut inuᴋotiminullo Israêlikunut, Nâlekablo Israêlikut anitingmagit Egiptenemit;

² Jetrub, Mosesib sakiata, tiguvâ Zipora Mosesib nulianga, angerartitavininga,

³ Ernîgiglo; (aipâ Gersomemik atelik, oᴋarmat: Tujormiangovunga nuname ilitarnangitome:

⁴ Aipangalo Eliêseremik atelik, oᴋarmat: Atâtama Gûdingata ikajortima piulivânga Faraub saviksoanganit:)

⁵ Jetrub, Mosesib sakiata, ernîgik nuliangalo ilagellugit, Mosese tikipât sunaᴋajuitome, tangmârporlo Gûdib ᴋakᴋangane:

⁶ Oᴋarporlo Mosesemut: Uvanga, Jetro, sakit, tikipunga ilingnut nuliat ernîgiglo ilagellugit.

⁷ Mosese anivok sakinne pagrearlugo, okᴋovlunelo kunikpâ; aperiutivuglo ᴋanoelingamangârmik; tupermullo iterpuk.

⁸ Mosesiblo sakinne unipkautivâ tamainik Nâlekab piniarninginik Faraomut Egiptenemiunullo Israêlikut pivlugit, siorniornerniglo tamainik tikitigijamingnik apᴋosinerme, ᴋanorlo Nâlekab piulingmagit.

⁹ Jetrolo ᴋuviasudlarpok ajungitulinek tamât pivlugo, Nâlekab piniarnerijanga Israêlikunut piulijanginut Egiptenemiut agganginit.

¹⁰ Jetrolo oᴋarpok: ᴋujanarsile Nâlegak piulijigijase Egiptenemiut agganginit, Faraublo agganginit, inuit piulijigijangat Egiptenemiut agganginit.

¹¹ Mânna nalojungnairpunga Nâlegak anginersaungmat Gûdinit tamainit; pingijairᴋsârningine tâpsoma alliutivait.

¹² Jetrolo, Mosesib sakia, âtsivok ôtaksanik tunergutiksaniglo Gûdemut: Aronelo Israêliblo angajoᴋângit ᴋaivut Mosesib sakkia nerriᴋatigivlugo Gûdib sângane.

¹³ ᴋaungmallo Mosese ingipok inuit idluarsaromavlugit: inuillo nangerput Mosesib avatâne uvlârmit unnungmut.

¹⁴ Mosesiblo sakia takonârmat tamainik piniarninginik inungnut, oᴋarpok: Sunauvâ tamanna piniarnerijat inuit pivlugit? Sugavit iksivavêt inutôvlutit, inuillo ilûnnatik nangerdlutik avatingne uvlârmit unungmut?

¹⁵ Mosesiblo sakinne oᴋautiva: Inuit unneᴋsiorvigingmanga unertutijaujomavlutik Gûdemik:

¹⁶ Anârtûtiksaᴋarpata uvamnôrput, idluarsaivungalo inungmik inôᴋatiminiglo, ajoᴋertorpakkalo Gûdib maligaksaurᴋojanginik perᴋojanginiglo.

¹⁷ Mosesiblo sakiata oᴋautivâ: Iliornît tamanna nâmalungilak.

¹⁸ Sujudlamarilârpotit, igvillo inuillo ukkoa ilagijatit; tamanna oᴋumailuarpok ilingnut; inutôvlutit tamanna suliarijungnangilat.

¹⁹ Nipiga tusaruk mânna, ajoᴋertoromavagit, Gûdiblo ilagijomavâtit: Igvit inuit pivlugit sakᴋijârit Gûdib sângane, âtsijungnarᴋovlutit sujuksautigijanginik Gûdemut:

²⁰ Ajoᴋertoraksarivatillo maligaksaurᴋojaujunik perᴋojaniglo, unertûtijaksarivatillo apᴋomik arvertarvigijaksarijanginik, piniarnerniglo piniaraksarijanginik.

²¹ Taimagletauk inuit ilûnnatik akornganit ᴋenertuksauvotit angutinik ᴋaᴋiarnaitunik, Gûdemik sivôrajunik, angutinik nalâgôrtunik, pijomatudlarnermik omisuktunik; angajoᴋângortilugillo tâpkonunga, angajoᴋautilugit 1,000nut, angajoᴋautilugit 100nut, angajoᴋautilugit 50nut, angajoᴋautilugillo 10nut.

²² Tâpkoalo idluarsailit inungnik naliutune tamaine: imailingalârporlo, pijariaᴋortojut tamaita âlârpait ilingnut, pijariakitulle tamaita tâpkoa idluarsaijutigilârpait: taimâk oᴋinersauniarpok ilingnut, tâpkoalo nangmarᴋatiginiarpatit.

²³ Taimailioruvit, Gûdiblo perᴋopatit, piganerungnalârpotit, inuillo tamakkoa ilûnnatik angerarungnalârput ulapirᴋsauteᴋarlutik.

²⁴ Mosesiblo sakimme nipinga nâlakpâ, piniarlunelo tamainik oᴋautigijanginik.

²⁵ Mosesiblo angutit ᴋaᴋiarnaitut ᴋenerpait Israêlikunit tamainit, aulatsijungortipaillo inungnut, angajoᴋautilugit 1,000nut, angajoᴋautilugit 100nut, angajoᴋautilugit 50nut, angajoᴋautilugillo 10nut.

²⁶ Tâpkoalo inuit idluarsarpait naliutune tamaine: oᴋumaitut âpait Mosesemut, pijariakitulle tamaita nangminek idluarsaijutigivait.

²⁷ Mosesiblo sakinne aulartipâ; tâmnalo angerarpok nunaminut.