Exodus 17 - Labrador Inuttitut Heritage Bible

Israêlikut imertitauvut ᴋairtomit. Amalekut sâlauvut.

¹ Ilagello Israêlikut ilûnnatik aularput sunaᴋajuitomit Sinimit ingergaᴋatarlutik Nâlekab perᴋojininga maliklugo, tangmârterpullo Refidime: tagvane imeᴋangilak inuit imiksanganik.

² Taimaimat inuit Mosese oᴋarnerlûtivât, oᴋarlutiglo: Imermik tunitjivigitigut imerungnarᴋovluta. Mosesiblo akkivait: Sudluse oᴋarnerlûtivisingâ? Suna pivlugo Nâlegak ôktorpisiûk?

³ Tagvanelo inuit ᴋêdlarput; inuillo Mosese oᴋarnerlûtivât, oᴋarlutiglo: Sôk Egiptenemit majoartipitigût, uvagut ᴋitorngavullo nergjutivullo toᴋotsomavluta ᴋêdlarnermut?

⁴ Moseselo ᴋaigarsukpok Nâlekamut, oᴋarlune: Inuit ukkoa ᴋanok piniarvigijaksarivakkâ? Milloromakasakpânga ujarᴋanut!

⁵ Nâlekablo Mosese oᴋautivâ: Inuit sakᴋangine sivumuarit, Israêlikullo angajoᴋângita ilangit ilagikit; ajaupiallo, anautarilauktat kôngmik, tiguleruk aggangnut, ailerillo.

⁶ Ahâk, nangeromavunga sângne tagvane ᴋairtub ᴋângane Hôrebeme; ᴋairtorlo anaujaksarivat, imerlo anilârpok tâpsomangat, inuit imerungnarᴋovlugit. Moseselo taimailiorpok Israêlikut angajoᴋângita takoane.

⁷ Nunablo tâpkutsia atserarpâ Massamik (ôktorlungnermik) Meribamiglo (nangârnermik), Israêlikut nangârningat pivlugo, Nâlegarlo ôktormatsuk, oᴋarlutik: Nâlegak akunaptingnêkâ akunaptingnêngilârlônêt?

⁸ Amalekiterit tagva tikiput, Israêlikunut sorsuklutik Refidime.

⁹ Moseselo Josuamut oᴋarpok: Angutinik anerosugit uvaptingnut, anilutillo Amalekiterinut sorsuklutit: ᴋaupat nangeromavunga ᴋakᴋaub ᴋângane Gûdib ajaupianga aggamnêtilugo.

¹⁰ Josualo taimailiorpok sorlo Mosesib oᴋautingmago, Amalekiterillo sorsuklugit: Moseselo, Aronelo, Hurelo majorarput ᴋakᴋaub ᴋânganut.

¹¹ Imaiporlo: Mosesib aggane isâktigamigit, Israêlikut sâlaᴋalerput, agganelo kataktigamigit, Amalekiterit sâlaᴋalerput.

¹² Mosesible aggangit oᴋumailerput, tigusivuglo ujarangmik ililugolo atânut, tâpsomalo iksivavigivâ; Aroniblo Huriblo najumivait aggangit, aipangata igluanit aipangatalo igluanit; aggangillo aulatjairput seᴋinerub nipilerninga tikidlugo.

¹³ Josuablo Amalek inungillo sâlagivait saviksûb kênanganut.

¹⁴ Nâlekablo Mosese oᴋautivâ: Tamanna erᴋaumajaurᴋovlugo aglaguk aglangnut makperterpaktunut, Josuablo siutîgingnut unipkautigiuk Amalekib erᴋaumajauninga nungutidlaromagapko ᴋilaub atânit.

¹⁵ Moseselo tunerguserviliorpok atserarpâlo: Nâlekab iksivautaksoanganik:

¹⁶ Oᴋarporlo: Aggait ilivlugit Gûdib iksivautaksoanganut, Amalekiterit sorsudlarkit Nâlekamut ᴋitorngarênit ᴋitorngarênut.