Exodus 16 - Labrador Inuttitut Heritage Bible

Tikiput sunaᴋajuitomut Sinimik atelingmut. Ajoksadlarlutik oᴋarnerlûtjivut. Gûdib tiliklervigivait aᴋigiarsungnik mannamiglo.

¹ Elimemillo aularput, ilagêllo Israêlikut iluêngartut tikiput sunaᴋajuitomut Sinimik atelingmut, Elimib Sinaiblo akorngangnêtomut, takᴋiub aipangata uvlungita 15ingane anilaungninginit nunamit Egiptenemit.

² Ilagêllo Israêlikut ilûnnatik oᴋarnerlûtjivut Mosesemut Aronemullo sunaᴋajuitome;

³ Israêlikullo oᴋautivakit: Atso ilâ! nakudlarajalaungnerpoᴋ toᴋolaurupta Nâlekab agganginut nuname Egipteneme, iksivalaurapta ukkusit igautit saniane ᴋakᴋôjaktoraptalo akᴋeartorluta; tagva tikiutitipaptigut sunaᴋajuitomut ômunga ilagêt ukoa ilûnnaita toᴋotsomavlugit perlernermut.

⁴ Nalekab tagva Mosese oᴋautivâ: Ahâk, ᴋakᴋôjamik piksapsingnik silalurᴋojijomavunga ᴋilangmit, inuillo anijuksauvut katersoivlutiglo uvlub piksanganik ᴋaut tamât, ôktoromagapkit arvertaromamangâta perᴋojamne pijomangimangâtalônêt.

⁵ Kisianele uvlut 6ingane atuinarutijaksarivait angerautijatik, uvlut tamaita katersorpaktatik maggoertorlugo.

⁶ Moseselo Aronelo oᴋarpuk Israêlikunut tamainut: Unnulerpat missigilârpose Nâlekab âsimangmase nunamit Egiptenemit:

⁷ Uvlâkullo takolârpose Nâlekab ivlernarninganik; tusarmat oᴋarnerlûtjinipsingnik Nâlekamut: Uvagugle sunauvinûk oᴋarnerlûtigaptigûk?

⁸ Moseselo oᴋarpok: Taimailârpok, Nâlekab tunitjiviginiarpâse nerᴋêjamik nerᴋiksapsingnik unnukut, ᴋakᴋôjamiglo akᴋeartûtiksapsingnik uvlâkut, Nâlekab oᴋarnerlûtjinise tâpsomunga tusarmagit: Uvagugle sunauvinûk? Oᴋarnerlûtjinise pilungilat uvaptîngnut, Nâlekamulle.

⁹ Mosesiblo Arone oᴋautivâ: Ilagêt Israêlikut ilûnnaita oᴋarvigikit: Kaglileritse Nâlekab sânganut, oᴋarnerlûtjinise tusarmagit.

¹⁰ Aroniblo ilagêt Israêlikut iluêngartut oᴋarvigingmagit, takosarput sunaᴋajuitomut, ahâglo, Nâlekab ivlernarninga takotipok nuvujarme.

¹¹ Nâlekablo Mosese oᴋarvigivâ, oᴋarlune:

¹² Israêlikut oᴋarnerlûtjiningit tusarpakka: oᴋarvigikit, oᴋarlutit: Unnupat nerᴋetolârpose, uvlâkullo aᴋeartolârpose ᴋakᴋôjamik, misigilârposelo uvangaugama Nâlegak Gûdise.

¹³ Atso ilâ, unnulermat aᴋigearsuit tikiaᴋivut, tangmârvik mattuvlugo: Uvlâkullo mitsuksoak nunamêpok tangmârviub avatâne.

¹⁴ Mitsuksoarlo nungungmat, ahâk, amiakôjoᴋarpok sunaᴋajuitub ᴋângane angmalukitânik mikijunik, sorlo ᴋakᴋornartut mikitigijunik.

¹⁵ Israêlikullo takogamigit oᴋaudjutivut: Mânnauvut ukkoa! ᴋaujimalunginamik sunaungmangâta. Mosesiblo oᴋautivait: Tamadja ᴋakᴋôjak Nâlekab tunijanga ilipsingnut nerᴋiksaurᴋovlugo.

¹⁶ Tamadja, tagga, Nâlekab perᴋojanga: Katersoigitse tâpkonangat ilûnnase atunit nerrijaluapsingnik, omerib (ôktûtib, gallonib abvanganit anginersârsub) tatautigijangatut angitigijomik attunit, inuᴋotipse unurningit maliklugit; tigusigitse atunit tuppemioᴋatingita piksanginik.

¹⁷ Israêlikullo taimailiorput, katersoilarmiglo ilangit anginersamik, ilangit mikinersamik.

¹⁸ Omeremullo ôktormatsuk, angijomik katersoijok simnikoᴋangilak, ikituniglo katersoijok amigaᴋsilungilak; Atunit katersoivut nerrijaluaminik.

¹⁹ Moseselo oᴋarpok: ᴋautsamut amiakoᴋartoᴋarniarane.

²⁰ Kisianele Mosese nâlalungilât, ilangillo tamattoma ilanganik amiakoput uvlâmut, ᴋoperguᴋalerporlo tippelulerlarmelo: Mosesiblo ningautidlarpait.

²¹ Katersorpaillo uvlât tamât, atunit nerrijaluaminik: Seᴋinerlo ônarsingmat aukpok.

²² Uvlulle 6ingane katersoivut ᴋakᴋôjanik maggoertoraksanik, omeringnik maggûngnik inungmut atautsimut; ilagêllo angajoᴋângita Mosese oᴋautijartorpât.

²³ Tâpsomalo oᴋautivait: Gûdib, tagga, oᴋautigisimajanga: ᴋaupat Sabbateojok ivlernartok, merngoerserviksase Nâlekamut naliutivok. Otitsomajase ôtiniarsigik uvlome, igajomajaselo iganiarsigik; amiakoa torᴋorsiuk uvlâmut piksaᴋumitarilugo.

²⁴ Torᴋorpâllo uvlâmut, sorlo Mosese perᴋojingmat: Tippelulungilarlo ᴋoperguᴋalungilarlônêt.

²⁵ Moseselo oᴋarpok: Tâmna uvlome nerrisiuk; tagva uvlome Sabbateovok Nâlekamut: uvlome nagvârniangilase taimaitomik natername.

²⁶ Uvlune 6ne katersoraksarivase, uvlulle 7ingane, Sabbateojome, pitaᴋarniangilak.

²⁷ Sunaubvale, uvlut 7ingane inuit ilangit anivut katersoijomavlutik, nagvâlungilalle.

²⁸ Nâlegarlo tagva oᴋarpok Mosesemut: ᴋanok akunertigijomik perᴋojakka maligaksaurᴋojakkalo ᴋippilûtigisimagomavisigîk nâlegomanagit?

²⁹ Takoitse, Nâlekab tunitjivigingmase Sabbatemik, taimaimat uvlut 6ingane tunitjivigivâse uvlûk maggûk ᴋakᴋôjaksanginik; ilûnnase innigijapsingnêtuaritse, anijoᴋarniarane iniminit uvlut 7ingane.

³⁰ Taimaimat inuit merngoerserput uvlut 7ingane.

³¹ Israêlikullo tamakkoa taivait Mannanik: korianderib (perortut ilangata) karngasûtiksangititut iput, ᴋaᴋortauvlutik; tipeᴋarpullo sorlo ᴋakᴋôjârsutut igupsaujârtut orᴋsuanik ilaliktut.

³² Moseselo oᴋarpok: Tamadja, tagga, Nâlekab perᴋojanga: Omere tatalersiuk tâpkoninga, torᴋorsimajuksanik kinguvâksapsingnut; takorᴋovlugit ᴋakᴋôjanik nerrititsijutigilauktamnik ilipsingnik aularutigapse nunamit Egiptenemit.

³³ Mosesiblo Arone oᴋautivâ: Ilulerᴋumik tigusilerit, pititsivigivlugolo Mannanik, omerib tatautiluanganik, Nâlekablo sânganut iliuk, torᴋorsimajuksaurᴋovlugit kinguvâksapsingnut.

³⁴ Sorlo Nâlekab Mosese perᴋongmago, taimâk Aronib ilivâ kigligiutsineᴋtaliub sânganut, torᴋorsimajuksaurᴋovlugo.

³⁵ Israêlikullo nerrivut Mannanik jârit 40 nâvlugit, tikkerᴋârtinagit nunamut inulingmut; nerrivut Mannanik tikkerᴋârtinagit nunab Kânaanib kiglinganut.

³⁶ Omere tagva Efab tellimaujortunga.