Exodus 15 - Labrador Inuttitut Heritage Bible

Mosesib Kujalijutâ. Imek sungarnitok mamaktungortitauvok.

¹ Tagva Mosese Israêliblo ᴋitorngangit imgerput imgerutemik ôminga Nâlekamut, oᴋarpullo: Nâlegak imgervigijomavara, sâlaᴋadlarmat inornadlartomik: horse ikimajingalo egipak imarbingmut.

² Nâlegak sôngonerivara imgerutigilugolo piulijigilâllo; tâmna tagga Gûdiga, iniksalioromavaralo; atâtama Gûdinga, nertudlaromavaralo.

³ Nâlegak unatarteovok: atinga tagga Nâlegak.

⁴ Faraub ᴋamutingit aksaloalît unatautit sorsuktuksarsoaᴋotingillo egipait imarbingmut: sorsuktuksarsoaᴋotingitalo angajoᴋângit annerimajut ipimavut imarbingme suvlolingme.

⁵ Itinersûb ullikpait: kivivut erᴋanut ujarᴋatitut.

⁶ Nâlegak, aggatit tallerpît inornarsivut pitsartunerme; Nâlegak, aggakpit tallerpikpit omisuktit egilugit serᴋomipait.

⁷ Inornarnivillo angijoksôningane ochotipatit akkerartortitit: ningarnît aulartipat, tâpsomalo nungupait iviktitut.

⁸ Sordlungmigarnernut imat katersortauvut, imaksuit ᴋagvarput sorlo ᴋallerêktutitut, itinerillo igjorput imarbiub ᴋerᴋane.

⁹ Omisuktok oᴋarpok: Udlanigomavunga, angusijomavunga, aksârnigaujut aitortûtigijomavakka; ikligunera nâmaksititaujuksauvok tâpkonunga; saviksoara amujomavara, aggamalo nungutaksarivait.

¹⁰ Igville anoreᴋotit anordlerᴋovat, imaksuillo ullikpait: aᴋitotullo kivivut imânut pitsartujunut.

¹¹ Kina Gûdit akorngane iliktut-ikâ, Nâlegak? Kina iliktut-ikâ, inornadlarlune ivsornainerme, sivôranadlarlune nertoraksauvlune, tatamnartulivlunelo?

¹² Aggatit tallerpît isaktipatit, nunab êvait.

¹³ Nâpkiningnerne inuit piulijatit tasiorpatit: aulapatit pitsartunerne innigijarnut ivlernadlartomut.

¹⁴ Inôᴋatigêksuit tusalârput sivôravlutiglo; kapiasungnerub Filisterit tigudlalârpait.

¹⁵ Edomib angajoᴋângit kakkilâdlalârput; Moabib pitsartujungit sajudlalârput; Kânaaniblo inungit ilûnnatik auksilârput nuvujatut.

¹⁶ Erᴋsinerub ᴋoaksârnerublo tupvigilârpait; tallerpikpit pitsartuningagut aulangilârput ujaraᴋtut; inuᴋotitit ᴋângiuterᴋârtinagit, Nâlegak, inuit pisiarijatit ᴋângiuterᴋârtinagit.

¹⁷ Tikiutititaksarivatit inneᴋartilugillo ᴋakᴋame kingormgutijarne, inneme inniliarimajarne innigijomavlugo, ivlernartovingme, Nâlegak, aggakpit atuinarutisimajangane.

¹⁸ Nâlegak ataniovok isoᴋangitomit isoᴋangitomut.

¹⁹ Faraub horseᴋotinga aingmat imarbingmut, ᴋamutingit aksaloalit unatautit, horsenelo ikimajungit ilagivlugit, Nâlekablo imarbiub imangit tikiutitilerivait tâpkonunga; Israêlikulle ingergavut panertokut imarbiub ᴋerᴋagut.

²⁰ Miriamiblo nalautaijub, Aronib najangata, ᴋilaut tiguvâ aggaminut; arnallo ilûnnatik anivut tâmna maliklugo ᴋilausijarlutik oᴋigêserlutiglo.

²¹ Miriamiblo tâpkoa akkiorpait: Nâlegak imgervigisiuk, sâlaᴋadlarmat inornadlartomik; horse ikimajingalo egipak imarbingmut.

²² Mosesiblo Israêlikut aulartipait imarbingmit suvlolingmit, ingergavullo sunaᴋajuitomut. Suremik atelingmut; uvluniglo pingasunik ingergavut sunaᴋajuitokut imeksinatiglo.

²³ Tikinamiglo Mâramut, Mârab imangit imerungnangilait sungarnimata; tamanna pivlugo nuna tamanna atserartauvok Mâramik (sungarnitomik).

²⁴ Inuillo Mosese oᴋarnerlûtivât, oᴋarlutik: Sumik imerniarᴋitâ?

²⁵ Tâpsomalo Nâlegak ᴋaigarsugvigivâ, Nâlekablo unertutivâ napârtomik, tâmnalo egigamiuk imermut, imek mamaktungortitauvok. Tagvane perᴋojaliorpait maligaksaliorlugillo, tagvanelo ôktorpait,

²⁶ Oᴋarlunelo: Nâlekab Gûdivit nipinga nâletsiaromagungne, piniaromavlugillo tâpsoma sângane idluarijaujut, siutit manijomagungne tâpsoma perᴋojanginut, maligaksaurᴋojangillo maligomagungne, ilijivigijomangilagit ᴋanimaserit nalianiglônêt tikitilauktamnik Egiptenemiunut: Uvangaugama Nâlegak inûliklertît.

²⁷ Tikipullo Elimemut, tagvane puilaveᴋarpok 12nik, napârtuniglo Palmenik 70nik: tagvanelo tangmârterput imît ᴋanitangane.