Exodus 14 - Labrador Inuttitut Heritage Bible

Faraub Israêlikut udlapait. Faraokut ippivut imânut.

¹ Nalekablo Mosese oᴋarvigivâ, oᴋarlune:

² Israêlikut oᴋarvigikit sangulerᴋovlugit tangmârlutiglo Pi-Hakirotib nalâne, Migdolib imarbiublo akorngangne, Baal-Zefonib nalâne; tâpsoma sângane tangmârtuksauvose imarbiub kiglingane.

³ Farao oᴋalârmat Israêlikut pivlugit: Tamarsimavut nuname, sunaᴋajuitub apᴋutiksairutivait.

⁴ Faraublo ômatinga mangaititsomavara udlanerᴋovlugo tâpkoninga; opigijaujomavungalo Faraokut sorsuktuksarsoaᴋutingitigullo, Egiptenemiut tukisitsiarᴋovlugit uvangaugama Nâlegak. Taimailiorput tagva.

⁵ Egipteniblo ataninga oᴋautijaungmat inuit ᴋemâsimangmata, Faraub ômatinga ikajortingitalo ômatingit ablatsangorput inungnut, oᴋarpullo: Sôk taimailiorᴋitâ, Israêlikut aularᴋogaptigik kivgartornermit uvaptingnik?

⁶ ᴋamutinelo aksaloalîk unatautîk atuinarutipâ inuᴋotinelo ilagivait,

⁷ ᴋamutillo aksaloalît piojut 600 ilagivait, ᴋamutillo aksaloalît tamaita Egiptenemêtut, atunit ᴋemukserteᴋarlutik.

⁸ Nâlekablo Faraub Egiptenib atanertangata ômatinga mangaitipâ, tâpsomalo Israêlikut udlapait. Israêlikulle anisimalauᴋput aggangnut ᴋotsiktunut.

⁹ Egiptenemiulle udlapait, Faraub ᴋamutingit aksaloalît unatautit horselît, horsenelo ikimajungit, sorsuktuksarsoaᴋotingillo, angulugillo tangmârtersimajut imarbiub kiglingane, Pi-Hakirotib erᴋâne, Baal-Zefonib nalâne.

¹⁰ Faraolo ᴋaglilermat, Israêlikut ijitik arlortipait, sunaubvalo, Egiptenemiut malikpait; kapiasudlalerpullo, Israêlikullo Nâlegak nipliadlarvigivât.

¹¹ Mosesemullo oᴋarput: Iluviksaᴋangimat Egipteneme aularutivitigût sunaᴋajuitome toᴋorᴋovluta? Sôk taimailiorvigivitigût, aularutiluta Egiptenemit?

¹² Tamannaungilâk oᴋauserijavut ilingnut Egipteneme, oᴋarluta: Pagvisarniaratigut, Egiptenemiulle kivgartortuinarlavut? Egiptenemiut kivgartorlugit nakornersaungmat toᴋojuksaunermit sunaᴋajuitome.

¹³ Mosesiblo inuit oᴋautivait: Sivôraniarase! ᴋikartuinaritse! Nâlekablo piuliklerninga nalonaijarniartanga uvlome pivluse takoniarlugo; Egiptenemiut takojase uvlome takojungnainiarapsigik isoᴋangitomut.

¹⁴ Nâlegak sorsulârmat pivluse, ilipselo nippangerniarpose.

¹⁵ Nâlekablo Mosese oᴋautivâ: Sôk ᴋaigarsukᴋêt uvamnut? Israêlikut ingergarᴋokit:

¹⁶ Igville ajaupiat isautileruk, aggatillo isakit imarbiub ᴋollânut, aviktilugolo: Israêlikullo imarbiub ᴋerᴋagôrtuksauvut panertokut.

¹⁷ Uvangalo, ahâk, Egiptenemiut ômatingit mangaititsomavakka, malerᴋovlugit tâpkoninga: uvangalo nertortauniksarsijomavunga Faraokut, katimagajoksoaᴋotingitigullo ilûnnaitigut, ᴋamutingitigullo aksaloaliktigut unatautiktigut, horsenelo ikimajungitigut.

¹⁸ Egiptenemiullo misigijuksauvut uvangaugama Nâlegak, nertortauniksarsimaguma Faraokut, ᴋamutingitigullo aksaloaliktigut unatautiktigut, horsenelo ikimajungitigut.

¹⁹ Gudiblo engelinga, Israêlikut tangmârtertut sivuningitigut ingergasôk, nûpok, kinguninginullo aivlune; nuvujarlo nappajok nûgivok sivuninginit nangeriartorporlo kinguninginut.

²⁰ Aivorlo Egiptenemiut tangmârtertut Israêlikullo tangmârtertut ᴋerᴋanut akornganut; nuvujauvorlo tâdlarlarmelo ipkonunga, unnuarmele ᴋaumaivok ukununga: ipkua ukkua ᴋanitanganut pijungnarᴋonagit unnuak nâvlugo.

²¹ Mosesiblo aggane isaktipait imarbiub ᴋollânut; Nâlekablo imak tinitipâ unnangârsoakut unnuak nâvlugo, imarbiglo panertungortipâ, imallo aviktauvut.

²² Israêliblo ᴋitorngangit imarbiub ᴋerᴋagut ingergavut panertokut: imaᴋsuillo avalugivait talerpiata tungâgut saumiatalo tungâgut.

²³ Egiptenemiullo udlapait maliklugillo imarbiub ᴋerᴋanut, Faraub horsingit, ᴋamutingillo aksaloalît unatautit, horsenelo ikimajungit.

²⁴ Uvlârarsukullo pigârtib pigârvingane, Nâlekab Egiptenemiut sorsuktuksoaᴋotingit takonârpait nappajomit ikomamit nuvujamillo, siorniortipaillo Egiptenemiut sorsuktuksarsoaᴋotingit,

²⁵ ᴋamutingillo aksaloalît aksaloangejarlugit, pêtorᴋovlugit: Egiptenemiut oᴋarᴋovlugit: Israêlikunit ᴋemâlerta, Nâlekab sorsugutigingmagit Egiptenemiunut.

²⁶ Nalekablo Mosese oᴋautivâ: Aggatit isakit imarbiub ᴋollânut, imaksuit uttilerᴋovlugit Egiptenemiut ᴋamutingillo aksaloalît unatautit, horsinelo ikimajungit ullutjautilugit.

²⁷ Mosesiblo aggane isaktipait imarbiub ᴋollânut, imarlo utterivok uvlâk nuilertilugo pivigivaktaminut; Egiptenemiullo ᴋemânnasuarpât: Nâlekablo Egiptenemiut ajaktorpait imarbiub ᴋerᴋanut.

²⁸ Imaksuillo uterput, ulliklugillo ᴋamutit aksaloalît unatautit, horsenelo ikimajut, Faraublo sorsuktuksarsoaᴋotingit ilûnnaita tâpkoninga maliktut imarbingmut; atautsemiglônêt amiakoᴋangilak.

²⁹ Israêlikulle ingergavut panertokut imarbiub ᴋerᴋagut; imaksuillo avalugivait talerpiata tungâgut saumiatalo tungâgut.

³⁰ Taimâk Nâlekab Israêlikut piulivait uvlorme tâpsomane Egiptenemiut agganginit; Israêlikullo Egiptenemiut toᴋungajut takovait imarbiub sikjangane.

³¹ Israêlikullo takogivât piniarnersoak Nâlekab piniarnerijanga Egiptenemiune, inuillo Nâlegak sivôragivât, okperilugolo Nâlegak, kivgangalo Mosese.