Exodus 13 - Labrador Inuttitut Heritage Bible

Erniangorᴋârtut perᴋutautitauvut Gûdemut.

¹ Nalekablo Mosese oᴋarvigivâ, oᴋarlune:

² Ivlernartikit uvamnut erniangorᴋârtut tamaita, igliarmik angmaijut tamaita Israêlikune, inungnelo nergjutinelo: Uvanga pigivakka.

³ Tagva Mosesib inuit oᴋautivait: Erᴋaumalersiuk uvlok tamanna, anivigijase Egiptenemit, iglomit kipalûtitauvigijapsingnit; aggangnut pitsartujunut Nâlekab tagvangat aulartilaungmase: sêrnarsarsimajomik ᴋakᴋôjaktortoᴋartuksaungilak.

⁴ Uvlorme tâpsomane anilaukpose takᴋerme Abibemik atelingme.

⁵ Taimaimat Nâlekab tikiutitikpatit Kânaanemiut Hetiterillo Amoriterillo Heviterillo Jebusiterillo nunanginut angermarijutigilauktanganut atâtapsingnut tunijomavlugo ilingnut, nunamut imungmik igupsaujârtullo orᴋsunganik kôktomut, tagva piniutaunek tamanna uvloksiorutigijaksarivat takᴋerme ômane.

⁶ Uvlut 7 nâvlugit ᴋakᴋôjaktortuksauvotit sêrnaᴋangitomik, uvlullo 7inga uvloksiorviojuksauvok Nâlekamut.

⁷ ᴋakᴋôjaᴋ sêrnaᴋangitok nerrijaujuksauvok uvlut 7nit nâvlugit; ᴋakᴋôjarlo sêrnarsarsimajok takuksaujuksaungilak ilingne, sêrnarsaullônêt takuksaujuksaungilak erᴋângne tamaine.

⁸ Ernillo nalonaijaivigijaksarivat uvlorme tâpsomane, oᴋarlutit: Tamanna piniarutauvok Nâlekab piniarnerilauᴋtanga uvamnut pivlugo, anigama Egiptenemit.

⁹ Nalunaikutauniarporlo ilingnut aggakkut, erᴋaijutauniarlarmelo ijîkpit akorngangne, Nâlekab maligaksaurᴋojangit ᴋanernêrᴋovlugit: Aggangnut pitsartujunut Nâlekab anitingmatit Egiptenemit.

¹⁰ Taimaimat ilusiorᴋojaujok tamanna naliuneksiorutigijaksarivat naliutijarangat jârit tamaita.

¹¹ Nalekablo tikiutitikpatit Kânaanemiut nunanganut, sorlo angermarilaungmat ilingnut atâtarnullo, tunijomavlugo ilingnut,

¹² Ilingatitaksarivatit Nâlekamut tamaita angmaijut igliarmik, nergjuteᴋotivillo erniarirᴋârtangit tamaita; angutaujut perᴋutaujuksauvut Nâlekamut.

¹³ Siuterᴋortojublo erniarirᴋârtanga tamât tauᴋsiutijaksarivat saugârsungmik; tauksiutijomangikungnelo ᴋongesêjaraksarivat; inuille erniarirᴋârtangit ilûnnatik ᴋitorngavit akorngane taukserlugit uttertitaksarivatit.

¹⁴ Mattomalo kingorngagut ernerpit aperikpatit, oᴋarlune: ᴋanok tukkeᴋarᴋâ tamanna? Oᴋautijaksarivat: Aggangnut pitsartujunut Nâlekab anitilauᴋpâtigut Egiptenemit, iglomit kipalûtitauvigijaptingnit:

¹⁵ Faraublo ᴋununermut aularᴋojomangimatigut, Nâlekab toᴋorarpait erniangorᴋârtut tamaita nuname Egipteneme, inuit erniarirᴋârtangit nergjutillo erniarirᴋârtangit: Tamanna pivlugo tunergutigivakka Nâlekamut angutaujut tamaita angmaijut igliarmik; ᴋitorngamale erniarirᴋârtangit taukserlugit uttertipakka.

¹⁶ Nalunaikutauniarporlo aggangne, erᴋaijutauniarlarmelo ijîkpit akorngangne; tagva aggangnut pitsartujunut Nâlekab anitingmatigut Egiptenemit.

¹⁷ Pijoᴋarporlo Faraub inuit aularᴋosimangmagit, Gûdib tasiulungilait apᴋutikut Filisterit nunangagut, tamanna sivikinerpaugalloartilugo; Gûde oᴋarmat: Inuit ᴋakᴋialidlaroarmata takogunik unatarnermik, utterniarlutiglo Egiptenemut.

¹⁸ Gûdible inuit ᴋalusariartortipait imarbiub suvloliub sunaᴋajuitungata apᴋutâgut. Israêlikulle majoarput Egiptenemit annorârsimavlutik sorsuktuksatitut.

¹⁹ Mosesiblo Josefib sauningit naksarpait: Tâpsoma Israêlikut angermariktisimalaungmagit, oᴋarlune: Gûdib nalipsaromârpâse; saunikkalo tamângat takpaungautitaksarivase.

²⁰ Aularput tagva Suggotemit tangmârpullo Etameme, sunaᴋajuitub kiglingane.

²¹ Nâlekablo sivorlerpait uvlôtilugo nuvujak nappajok innigivlugo, unertûtijomavlugit apᴋomik, unnuakullo ikoma nappajok innigivlugo, ᴋaumarsaromavlugit, ingergajungnarᴋovlugit uvlokullo unnuakullo.

²² Nuvujak nappajok pêngilâ uvlokut, ikomalônêt napajok unnuakut inuit sivurnganit.