Exodus 12 - Labrador Inuttitut Heritage Bible

Kângerviksiutiksamik. Erniangoᴋârtut toᴋotauvut. Israêlikut ajaktortauvut.

¹ Nalekablo Mosese Aronelo oᴋarvigivak nuname Egipteneme, oᴋarlune:

² Takᴋek tamanna ilipsingnut pigiarniojuksauvok takᴋernit: Sivorlerpaujuksauvok jârib takᴋinginit ilipsingnut.

³ Oᴋaritik ilagênut Israêlikunut ilûnânut, oᴋarlutik: Takᴋiub ôma uvlungita 10ingane iglomioᴋatigêt angajoᴋângit atunit tigusijuksauvut saugârsungmik, tamât saugârsungmik atautsemik ᴋitorngarênut atautsinut:

⁴ Kisiane iglomioᴋatigêt ikiluarpata saugârsungmut, tâpsomalo saniliatalo, iglominut ᴋanitub, katilutik saugârsuk tigulikko, nerriᴋataujuksat unurningit kamagilugit.

⁵ Saugârsuk nochat angut ᴋanoetoᴋangitok, atautsemik jârelik, tigujaksarivase: tiguniarpaselo saukanit tuktungajunillônêt;

⁶ Najortiginiarpaselo takᴋiub tamattoma uvlungita 14ingat tikidlugo; tagva Israêlikut ᴋitorngarêt katimajut tamât toᴋotaksarivât unnujaraksinek ᴋaujaraksinerlo ᴋerᴋane.

⁷ Aublo ilanga tigujaksarivât, iglublo nerrimârvioniartub upkuangata nappajûgik upkuablo ᴋollâ mingoarlugit.

⁸ Nerᴋingalo nerrijaksarivât unnuarme tâpsomane, ikomame jarraksimajok, ᴋakᴋôjamullo sêrnarsauteᴋangitomut, amânullo sungaujunut nerrijaksarivât.

⁹ Mikkigautilugo nerrijaksaringilase, imermullônêt ôjotilugo, ikomamele jarraksimatilugo; niaᴋoa niungillo tulimângillo tappilugit.

¹⁰ Amiakoᴋartuksaungilak ᴋaunut; uvlâkulle amiakoa nungutaksarivase ikomamut.

¹¹ Imaglo nerrijaksarivase: ᴋettipsigut ᴋetterusersimavluse, kamilijarluse itigapsigut, ajaupialijarluselo aggapsigut; tuavidluse nerrijaksarivase: Nâlekab ᴋângervia tamadja.

¹² Unnuarme tamattomane nuna Egipten aulavigigapko, anaulugillo erniangorᴋârtut ilûnnatik nuname Egipteneme, inuillo nergjutillo; Egiptenemiullo gûdingoanginut tamainut nalonaijaijomavunga erᴋartuinermik: Tâmnauvunga Nâlegak.

¹³ Augle nalonaikutariniarpase iglune innigijapsingne: auglo takogupko ᴋângervigijomavapse, asserornartoksoarlo ilipsingnêtuksaungilak asserorluse, nuna Egipten sugiarupko.

¹⁴ Uvlorlo tamanna erᴋaumanartôjuksauvok ilipsingnut, naliuneᴋsiorutigijaksarivase Nâlekamut kinguvâpsigut; naliuneᴋsiorutigijaksarivase âᴋiksimajok soraijuitomut.

¹⁵ Uvlut 7 nâvlugit ᴋakᴋôjaᴋtortuksauvose sêrnarsauteᴋangitunik; uvlorme sivorlerpâme sêrnarsaut iglupsingnit pêraksarivase; tagva uvlormit sivorlerpâmit uvlut 7ingat tikidlugo ᴋakᴋôjaktortok sêrnarsautelingmik, tarne tâmna avitaujuksauvok Israêlikunit.

¹⁶ Uvlormelo sivorlerpâme ivlernartomik katimaniksaᴋartuksauvok, uvlullo 7ingane ivlernartomik katimaniksaᴋartuksaugivok ilipsingnut; sumiglônêt suliviojuksaungilak, kisiane tarnelingnut nerᴋiksaujut, tâpkoa suliarijaksatuarivase.

¹⁷ Ivlersijuksauvose ᴋakᴋôjat sêrnarsauteᴋangitut uvloksiorvinganik; uvlorme tâpsomaneluatsiak tasiorapse ilagêksoangonise nunamit Egiptenemit: Tamanna pivlugo uvlok tâmna ivlerijaksarivase kinguvâpsigut soraijuitomut âᴋiksimajok.

¹⁸ Takᴋiub sivorlerpâb uvlungita 14ingane unnukut ᴋakᴋôjaktortuksauvose sêrnarsauteᴋangitunik, takᴋiub uvlungita 21ingata unnulerninga tikidlugo.

¹⁹ Uvlut 7 nâvlugit sêrnarsaut naipitaujuksaungilak iglupsingne; sêrnarsautelingmik nerrijub, tâpsoma tarninga avitaujuksauvok ilagênit Israêlikunit, takorngartaugunelônêt inûlersimajôgunelônêt nuname.

²⁰ Sumiglônêt sêrnarsautelingmik nerrijuksaungilase; innigijapsingne tamaine sêrnarsauteᴋangitunik ᴋakᴋôjaktortuksauvose.

²¹ Mosesib tagva angajoᴋaujut ilûnnaita Israêlikune ᴋairᴋovait, oᴋautivlugillo: Saugârsungmik ᴋenneritse tigusiluselo ᴋitorngarênipsingnut, ᴋângerviksiutiksamiglo toᴋotsileritse.

²² Tigusijuksauvoselo isupenik ᴋelaksuganik, aungmullo illulerᴋutemêtomut misuklugit, upkuablo ᴋollâ nappajûgiglo mingoarlugit aungmut illulerᴋutemêtomut, ᴋaulerᴋârtinagolo anijoᴋartuksaungilak iglome upkuangagut.

²³ Tagva Nâlegak tamaunâromavok Egiptenemiut sugiarlugit; auglo ᴋollânêtok nappajungnêtorlo takoguniuk, Nâlekab upkuak ᴋângeromavâ, aserorsaijorlo itertailitiniarpâ iglupsingnut sugiarluse.

²⁴ Perᴋojak tamanna maligaksarivase ilusiorᴋojaujok ilingnut ᴋitorngapsingnullo soraijuitomik.

²⁵ Taimâktauk tikisimagupse nunamut Nâlekab tunijomajanganut ilipsingnut angersimanine maliklugo, kivgartûtiksaᴋ tamanna maligaksarivase.

²⁶ ᴋitorngapselo aperilârpase: Sunauvâ kivgartûtiksak tamanna?

²⁷ Kiolârpose: Tamanna tunergutiksak ᴋângerviksiutiksak Nâlekamut, tâpsoma Israêlikut iglungit Egipteneme ᴋângermagit, Egiptenemiut sugiarmagit, iglovullo saputivlugit. Inuillo okᴋovut opigosuklutiglo.

²⁸ Tagva Israêlikut taimailioriartorput, sorlo Nâlekab Moseselo Aronelo perᴋongmagik, taimailiorput.

²⁹ Ahaglo, unnuak ᴋetterarmat Nâlekab erniangorᴋârtut nuname Egipteneme sugiarpait, Faraub, iksivautaksoamine iksivajub, erniarirᴋârtanganit, tigujaumajub parngnanairsimavingmêtub erniarirᴋârtanganut; nergjutillo erniarirᴋârtangit ilûnnaita.

³⁰ Faraolo makipok unnuarme, tâmna, kivgangillo ilûnnatik, Egiptenemiullo ilûnnatik; ᴋaggudlarneksoaᴋalerporlo Egipteneme; igloᴋangimat toᴋungajoktaᴋangitomik.

³¹ Moseselo Aronelo ᴋairᴋovak unnuarme, oᴋarlunelo: Nikovigitse, aularluselo inuᴋotima akornganit, iliptiglo Israêlikullotauk, Nâlegarlo kivgartoriartorsiuk, sorlo oᴋalaurapse.

³² Naksarsigiglo saugaᴋotise nergjuteᴋotiselo, sorlo oᴋarapse, nippagitselo. Pilorirᴋosingalo uvangatauk.

³³ Egiptenemiullo inuit tetjarpait nunamit aulartitsomavlugit erinesârlugit; oᴋaramik: Tamapta toᴋungajoinaudlaroarpogut.

³⁴ Inuillo ᴋakᴋôjaksatik aipajut sêrnartitausimangitut tigûllapait imulugillo annorâmingnut erᴋsuklugillo.

³⁵ Israêlikullo taimailiorput Mosesib oᴋausinga maliklugo: Egiptenemiunillo piksarsiorput perᴋutinik silbereojunik goldeojuniglo, annorâniglo:

³⁶ Nâlekablo inuit saimaneksitipait Egiptenemiut sângine, tâpkoalo tunitjivigivait pijomajanginik. Nungudjivullo Egiptenemiunik.

³⁷ Israêlikullo ingergalerput Ramesesemit Suggotemut, angutainait pisuktut 600,000, sorrutsit kitinagit.

³⁸ Takorngartallo unuktut majoarᴋatigivait; katimagajullo saukat nergjutillo unuktut.

³⁹ ᴋakᴋôjaliorpullo sêrnarsauteᴋangitunik ᴋakᴋôjaksanit aipajunit naksartamingnit Egiptenemit, sêrnartitaungimat; ajaktortaulauramik Egiptenemit mulludlarungnaratiglo, âᴋiksoisimangilallônêt taᴋoaksamingnik.

⁴⁰ Israelikulle ineᴋarningita sivituninga Egipteneme, tagva jârit 430.

⁴¹ Pijoᴋarporlo, jârit 430 nângmata, uvlorme tâpsomanetsainak Nâlekab katimagajoksoaᴋotingit iluêngartut anivut nunamit Egiptenemit.

⁴² Unnuak tamadja erᴋaumanadlartok Nâlekamut, tâpsoma tasiormagit nunamit Egiptenemit; unnuak tamanna Nâlekab pinga erᴋaumanadlartok Israêlikunut tamainut kinguvânginullo.

⁴³ Nalekablo Mosese Aronelo oᴋautivak: Tamadja maligaksaurᴋojak ᴋângerviksiorutiksamut: Takorngartaub ilangiutivigijaksaringilâ.

⁴⁴ Kisiane kivgab kênaujanut pisiarijaujub ilangiutivigijungnarpâ kippijaurᴋârune.

⁴⁵ Takorngataub kivgablo atartugaub ilangiutivigijaksaringilâ.

⁴⁶ Iglome atauserme nerrijaujuksauvok; nerᴋingata ilangalônêt anititaksaringilase iglub silatânut; saunerlo atauserlônêt navgoraksaringilase.

⁴⁷ Ilagêktut Israêlikut ilûnnatik taimailiortuksauvut.

⁴⁸ Takorngartarlo inneᴋarune ilingne, Nâlekamullo uvloksiorᴋataujomagune ᴋângerviksiorvingmik, tâpsoma anguteᴋotine tamaita kippijautitaksarivait. Taimailiorᴋârlune najutijungnarpok ilangiutivlunelo; nunamelo inûlersimajotut ilinganiarpok; kippimangituble ilangiutivigijaksaringilâ.

⁴⁹ Maligaksak tâmnatsainak ilingavok inûlersimajomut nuname takorngartamullo ilipsingne nunaᴋartomut.

⁵⁰ Taimailiorput Israêlikut ilûnnatik; sorlo Nâlekab Mosese Aronelo perᴋongmagik, taimailiorput.

⁵¹ Taimaglo uvlorme tâpsomanetsainak Nâlekab Israêlikut tasiorpait nunamit Egiptenemit ilagêngningit maliklugit.