Exodus 11 - Labrador Inuttitut Heritage Bible

Kapianartoksoak kingorlerpâᴋ sillûtauvok.

¹ Nalekablo Mosese oᴋautivâ: Sule kapianartoksoarmik atautsemik tikiutjijomavunga Faraomut Egiptenemullo; kingorngane aularᴋojomârpâse tamângat; aularᴋoniarpâselo ajaktumarilârpâse aglât.

² Taimaimat oᴋâlagit mânna inuit siutinginut, angutit atunit ᴋennurᴋovlugit silalermingnit, arnallo atunit silalermingnit ᴋennurᴋovlugit perᴋutinik silbereojunik goldeojuniglo.

³ Nâlekablo inuit saimaneksitipait Egiptenemiut sângine. Aglât angut Mosese nâlangnartoksôlerpok nuname Egipteneme, Faraublo kivgangita sângine, inuillo sângine.

⁴ Moseselo oᴋarpok: Imâk oᴋarpok Nâlegak: Unnuab ᴋerᴋangane anijomavunga Egipten apᴋutigivlugo.

⁵ Erniangoᴋârtullo ilûnnatik nuname Egipteneme toᴋojuksauvut, Faraub, iksivautaksoamine iksivajub, erniarirᴋârtanganit, arnab kivgab, serᴋalitsiviub tunuanêtub, erniarirᴋârtanga tikidlugo; nergjutillo erniarirᴋârtangit ilûnnatik.

⁶ Kaggudlarneksoaᴋaromârporlo tagva ilûnâne nuname Egipteneme, sorlo sivorngagut nalleᴋalauksimangimat, kingorngagullônêt nalleᴋalulângimat.

⁷ Israêlikulle nallianut ᴋingmerlônêt ᴋillujuksaulungilak, inungmullônêt nergjutemullônêt; ᴋaujimarᴋovluse Nâlekab Egiptenemiut Israêlikullo adsigêngitingmagit.

⁸ Makkoalo kivgatit ilûnnatik atersarvigilârpânga pâmaktervigivlungalo, oᴋarlutik: Anigit, inuillo ilûnnatik maliktut ilingnik: kingornganelo anilârpunga. Anivorlo Faraomit ningaumajâdlarlune.

⁹ Nâlekablo Mosese oᴋautivâ: Faraub tusaromangilâtik, tatamnartulinikka unukserᴋovlugit nuname Egipteneme.

¹⁰ Mosesiblo Aroniblo tatamnartut tamakkoa tamaita piniarnerivait Faraub sângane; Nâlekablo Faraub ômatinga mangaitipâ, tâpsomalo Israêlikut aularᴋolungilait nunaminit.