Exodus 10 - Labrador Inuttitut Heritage Bible

Piglertaujat, tâksoarlo.

¹ Nalekablo Mosese oᴋautivâ: Faraomut iterit: tâpsoma ômatinga kivgangitalo ômatingit mangaitigapkit, sakᴋijârtitsijungnarᴋovlunga nalunaikutamnik makkoninga sângane:

² Igvillo unipkârungnarᴋovlutit ernivit erngutavillo siutinginut piniarnernik piniarnerijamnik Egipteneme, nalunaikutaliarimajamniglo tâpkoa akorngane; ᴋaujimarᴋovluse uvangaugama Nâlegak.

³ Moseselo Aronelo iterpuk tagva Faraomut, oᴋautivlugolo: Imâk oᴋarpok Nâlegak, Ebrêerit Gûdingat: ᴋanok sivitutigijomik manigotitailijomavêt ilingnik sâmne? Inuᴋotikka aularᴋokit, kivgartorvigijaksaringmanga.

⁴ Kippiluguville inuᴋotikka aularᴋovlugit, ahâk, ᴋaupat piglertaujat tikititsomavakka nunangnut:

⁵ Tâpkoalo nunab ᴋânga mattuniarpât, takojungnartoᴋarungnairtilugo nunamik; nerrijuksauvullo nungutaungitut amiakunginik, amiakôjut ilipsingnut nattarᴋonâlungnit, nerrijuksauvullo napârtunik tamainik ilipsingnut perortunik perorsêvingne:

⁶ Tataijuksauvullo iglungnik, kivgavillo ilûnnatik iglunginik, Egiptenemiullo ilûnnatik iglunginik, sorlo atâtatit atâtavillônêt atâtangit takolauksimangimata, uvlormit nunamêvigilauktanginit uvlok tamanna tikidlugo. Tunuvlunelo anivok Faraub sânganit.

⁷ Faraublo kivgangita oᴋautivât: ᴋanok sivitutigijomik angut tâmna nigarniuteojuksauvâ uvaptingnut? Angutit aularᴋokit kivgartorᴋovlugit Nâlekamik Gûdimingnik: ᴋaujimangilatît sulle Egipten asserortaungmât?

⁸ Tagva Mosese Aronelo tikiutititaulerivuk Faraomut, tâpsomalo oᴋautivak: Nâlegak Gûdise kivgartoriartorsiuk: kisianele kikkôvât aulartuksaujut?

⁹ Moseselo oᴋarpok: Aularomavogut inôsuktovut inuᴋoartovullo, ernivut panivullo, saukavut nergjutivullo ilagivlugit; uvloksiortuksaugapta Nâlekamut.

¹⁰ Oᴋautivaglo: Nâlekab taima ilagijaksarivâse, aularᴋoniarupse ᴋitorngase ilagivlugit; okoksê, idluinek sivurlerivase.

¹¹ Taimainiarase: ilipsele angutaujose, Nâlegak kivgartoriartorsiuk, tamattominga ᴋilanâlaurapse. Faraublo najorninganit ungumajauvuk tagva.

¹² Nalekablo Mosese oᴋautivâ: Aggatit isakit Egiptenib nunangata ᴋollâgut piglertaujanut, majoarᴋovlugit Egiptenib nunanganut, nunablo perorsiangit tamaita nerrivlugit, tamaita nettarᴋonâluit nungungitangit.

¹³ Mosesiblo ajaupiaᴋotine isautivâ Egiptenib nunangata ᴋollâgut, Nâlekablo anore unangâk tikiutitipâ nunamut uvlok tâmna nâvlugo, unnuarlo tâmna nâvlugo, uvlângolermallo unangâb piglertaujat tikiutitipait.

¹⁴ Piglertaujallo majoarput Egiptenib nunanganut tamânut, mipullo Egiptenib erᴋânginut tamainut; sugaluluadlarput; sivorngatigut taipkutitunak piglertaujaᴋalulaungilak, kingorngatigullo pijoᴋartuksaungilarlônêt.

¹⁵ Nunablo ᴋânga tamât mattuvât, nuna tâᴋtungorlugo; nunablo perorsiangit tamaita nerrivait, napârtullo paungangit tamaita nattarᴋonâluit nungungitangit; amiakoᴋarungnairporlo tungujoᴋtamik sumiglônêt napârtune, perorsêvillônêt perorsianginik, Egiptenib nunangane ilûnâne.

¹⁶ Tagva Faraub erinesuklune Mosese Aronelo ᴋairᴋojaurᴋovak, oᴋarlunelo: Idluitulisimavunga Nâlekamut Gûdipsingnut iliptingnullo.

¹⁷ Taimaimat idluinikka isumagijungnaisigiktôk tamattomanetuinak, Nâlegarlo Gûdise tuksiarvigitikko ajangititserᴋovlugo toᴋomik ômingainak uvamnit.

¹⁸ Anivorlo tagva Faraomit, Nâlegarlo tuksiarvigivâ.

¹⁹ Nâlekablo anore sangutipâ uarngnarsoangordlugo pitsartudlartok, tâpsomalo piglertaujat tiktautipait egilugillo imarbingmut suvlolingmut; piglertaujat amiakoᴋangilat atautsemiglônêt Egiptenib erᴋângine tamaine.

²⁰ Nâlekable Faraub ômatinga mangaitipâ, tâpsomalo Israêlikut aularᴋojomangilait.

²¹ Nalekablo Mosese oᴋautivâ: Aggatit isakit paunga ᴋilangmut, Egiptenib nunanga ulliktaurᴋovlugo tâksoarmut, illâ, tâktsoarmut aktortaujungnartomut.

²² Moseselo aggane isaktipait paunga ᴋilangmut; tâᴋsoangorporlo tagva Egiptenib nunangane ilûnâne uvlunik pingasunik:

²³ Tautûtilungilat, inniminillônêt makkitoᴋangilaᴋ uvlut pingasut nâvlugit: kisiane Israêlikut ilûnnatik ᴋaumaneᴋarput iglune najortamingne.

²⁴ Faraublo Mosese ᴋairᴋovâ, oᴋarlunelo: Aularitse, Nâlegaᴋ kivgartorniarsiuk, kisiane saugaᴋotise nergjuteᴋotiselo ᴋemaksigik: ᴋitorngasele ilagisigik.

²⁵ Moseselo oᴋarpok: Tunitjivigijaksarivaptiguttauk tunergutiksanik toᴋotaksanik tunergutiksaniglo ôtaksanik, Nâlekamut Gûdiptingnut tunerguserungnarᴋovluta.

²⁶ Nergjuteᴋotivut ilagijaksarivavut; kukkilik atauserlônêt ᴋemaktaujoᴋartuksaungilaᴋ; tâpkonangat tigusijuksaugapta Nâlegak Gûdivut kivgartoromavlugo; ᴋaujimangilagullo sumik kivgartûtiksaᴋartuksaungmangâpta Nâlekamik, tikkerᴋârtinata taikunga.

²⁷ Nalekable Faraub ômatinga mangaitipâ, tâpsomalo aularᴋojomangilait.

²⁸ Faraublo oᴋautivâ: ᴋemanga, udjertorit ilingnik, kênara takonârungnairuk; uvlorme tâpsomane takonârvingne kênamnik toᴋojuksauvotit.

²⁹ Moseselo oᴋarpok: Nâmaktomik oᴋarpotit, kênait takonâromairpara.