Exodus 1 - Labrador Inuttitut Heritage Bible

Israêlikut Egipteneme kivgaulerput.

¹ Tamadja Israêlib erningita Jakub Egipteneliaᴋatingita atingit, atunit inuᴋotitik ilagivait:

² Rubene, Simeone, Levi, Juda,

³ Isassare, Sebulone, Benjamin,

⁴ Dane, Naftali, Gade, Assere.

⁵ Inuillo ilûnnatik Jakob kinguvângit uvinikut tagva inuit 70; Josefele Egiptenemêtsarêrpok.

⁶ Josefelo ᴋatangutingillo ilûnnatik inôᴋatigijangillo taipsomane ilûnnatik toᴋungmata,

⁷ Israêlikut, kinguvâktâᴋatarlutik pivallialerput unuksivallialutiglo angijororpalliadlarlutiglo; nunalo nâmavât tâpkoa.

⁸ Tagva nutâmik ataneᴋalerpok Egipteneme; tâpsoma Josefe ᴋaujimangimarikpâ.

⁹ Oᴋarporlo inuᴋotiminut: Takovose, inuit ukkoa Israêlikut ununersaulermata sôngonersauvlutiglo uvaptingnit:

¹⁰ Atê, pingitsertornermut pivalliatailitilavut; unatartoᴋartilugo ilaudlaroarmata unatarvigijiptingnut sorsugvigivlutalo nunalo ᴋemaklugo.

¹¹ Tagva kivgartorlukatitsijunik angajoᴋâᴋartipait, siorniortitaurᴋovlugit pijaksanut oᴋumainartoksoarnut, Faraolo igluliorpât iglugasangnik ᴋematuliviksaujunik: Pitomemiglo Ramsesemiglo.

¹² Kisiane siorniortitauvallianingat maliklugo pivalliatuinarput unuksivalliavlutiglo. Taimaimat Israêlikut sivôragilerpait.

¹³ Tagva Egiptenemiut sugaluluartomik kivgartortipait Israêlikut,

¹⁴ Siorniornadlartomiglo inôseᴋartipait oᴋumainartomik kivgartortilugit: machaleritilugit ivitâliortilugillo sunatuinarniglo pijaksaᴋartilugit perorsêvingne, sunatuinarnik sugaluluartomik kivgartoruteᴋarêralloarmata.

¹⁵ Egiptenemiullo ataningat oᴋarpok ernisuksêjunut Ebrêereojunut, tâpkoa ilangat Sifaramik atelik, aipangalo Puamik atelik.

¹⁶ Oᴋarlune: Arnane Ebrêereojune ernisuksêlerangapse ernivianelo takogupsiuk angutiarsuk, tagva toᴋotaksarivase, arnaukpalle inûlisiuk.

¹⁷ Ernisuksêjulle Gûde sivôragivât, pinialungilallo sorlo Egiptenemiut ataningata oᴋautingmagit, angutiarsuille inûlivait.

¹⁸ Tagva Egiptenemiut ataningata ernisuksêjut ᴋairᴋovait oᴋautivlugit: Sôk taimailiorᴋisê, angutiarsuit inûligapsigik?

¹⁹ Ernisuksêjut Farao kiovât: Arnat Ebrêereojut arnatitut Egiptenemiutitut ingimata, nukkeᴋatsiarmatale. Ernisuksêjok tikilerᴋârtinago ernilerêrput taipkoa.

²⁰ Tamanna pivlugo Gûdib ernisuksêjut ajungitulivigivait. Inôᴋatigêllo unuksivalliavlutik unuktovaksôlerput.

²¹ Ernisuksêjullo Gûde sivôragingmatsuk, kinguvâᴋartipait unuktunik.

²² Tagva Faraub inuᴋotine tamaita perᴋovait oᴋarlune: Angutearsuit inôlertut ilûnnaita kôksoarmut eginiarpase, arnârsuille ilûnnaita inôtilugit.