Ester 9 - Labrador Inuttitut Heritage Bible

Jûdit akkiorningit omigijimingnik, Uvloksiorviᴋartitsiningallo piulijaunimik erᴋaumajauvianik.

¹ Takᴋit 12 ingane, tagva takᴋib Adarib uvlungita 13 ingane, atanniub oᴋausingita perᴋojangatalo nellautsititauviane, uvlorme taipsomane Jûdit omigijingit nerriulauramik sâlagilugit, ablatsângolerpok Jûdit omigijitik sâlagijaksaringmagit.

² Tagva Jûdit katimalerput iglugaseksoarmingne, atanniub Ahasverosib nunangine ilûnaine, aggatik illijomavlugit tapkonunga idluitullivigijomajinginut. Kialo agviarungnarlaungilait; sivuranarningat tikkisimalaungmat inûᴋattigêksoarnut ilûnainut.

³ Angajoᴋaunerôjullo nunane, angajoᴋaksuillo, aulatsijullo nunanik, atanniublo pimaklertoᴋotingita Jûdit kagvertipait, Mardachaib sivuranarningata tikkigamigit.

⁴ Mardachai angijolaungmat atanniub iglungane, tussaumajauningalo tussaksaulaukpok nunanut ilûnainut, ᴋanok aglivalliangmat angijorormallo.

⁵ Taimaglo Jûdit omigijitik ilûnaita ullimârpait saviksoarmut, nakterlugillo, tokᴋolaitalo, pinniarvigivaillo issumamingnik omisuktut tâpkoninga.

⁶ Susanemelo iglugaseksoarne, atanniub Igloksoaᴋarvigijangine, Jûdit nakterpait tokᴋolaitalo angutit 500 dit.

⁷ Parsandatalo, Dalfonelo, Aspatalo,

⁸ Poratalo, Adaljalo, Aridatalo,

⁹ Parmhastalo, Arisailo, Aridailo, Vajesatalo,

¹⁰ Hamanib Medatab erningata, Jûdit omigijingata erningit tellimaujortut; perᴋutinginulle aggatik illilaungilait.

¹¹ Uvlorme taipsomane tokᴋotaumajut iglugaseksoarne Susaneme unnurningit pivut atanniub sânganut.

¹² Atannerlo aippaminut Esteremut oᴋarpok: Jûdit iglugaseksoarne Susaneme angutit 500 dit Hamaniblo erningit tellimaujortut nakterlugillo tokᴋolaukpait; ᴋanok pinniaralloarkat atanniub nunangine assingine? Sunamiglo tuksiarᴋît? Tunnitsiviojuksauvotit tamattominga. Sunalo tussugiviuk sulle? Taimailertuksauvok.

¹³ Estere oᴋarpok: Atannermut nâmagijaukpat, tagva Jûdit ᴋaupattauk Susaneme pinniarlit perᴋojak uvlomênitak malliklugo, nivingaiᴋovlugit Hamanib erninginik tellimaujortunik napârtomut.

¹⁴ Atannerlo perᴋojivok taimailiorᴋovlugit. Perᴋojarlo tamna tunnijaulaukpok Susaneme, Hamaniblo erningit tellimaujortut nivingartaulaukput.

¹⁵ Jûdillo katimalerput Susaneme takᴋib Adarib uvlungita 14 ingane, nakterpaillo Susaneme angutit 300 dit; Perᴋutinginulle aggatik illilaungilait.

¹⁶ Jûdille tapkoa assingit atanniub nunangine, katimalerlaukputtauk, inôtsitiglo sorsugutigivait, ullapirsauteᴋartilerpullo omigijimingnit, tokᴋotsilutiglo omigijimingnit 75,000 dinik, perᴋutinginulle aggatik illilaungilait.

¹⁷ Tamanna pilaukpok takᴋib Adarib uvlungita 13 ingane, merngoêrserlutiglo takᴋib tapsoma 14 ingane, tamna uvlungortipât nerrimârtitsinermut ᴋuviasungnermullo illingajomut.

¹⁸ Jûdille Susaneme katimalaukput uvlûngne tamangne, 13 me 14 melo, merngoêrserlutiglo uvlut 15 ingane, uvlorlo tamna uvlungortipât nerrimârtitsinermut ᴋuviasungnermullo illingajomut.

¹⁹ Tamanna pivlugo Jûdit iglugasengne iglugaseksoarnelo avaluksoakangitune nunaᴋartut, takᴋib Adarib uvlungita 14 ingat uvlungortipât nerrimartitsinermut ᴋuviasungnermullo uvloksiorvingmullo, pajuktigêngnermullo aitûsianik illingajomut.

²⁰ Mardachaiblo pijoᴋartut tamakkoa aglagutigivait, aglaillo tillikliutivait Jûdinut ilûnainut, ᴋanittomêtunut ᴋaningitomêtunullo.

²¹ Tamattominga aulajuititsivigijomavlugit, Uvloksiorᴋattarlugik pikovlugit Jârine tamaine, takᴋib Adarib uvlungita 14 ingat 15 ingallo,

²² Uvluktitut Jûdit ullapirsautiksarsivingititut omigijimingnit, takᴋertullo kappiasungningita ablatsângortitauvingatut ᴋuviasungnermut, kiksarningitalo ablatsangortitauvingatut uvlunut ajungitunut; uvlûk tapkoa uvloksioraksaringmattikik uvlûktitut nerrimârtitsinermut ᴋuviasungnermullo pajuktigêngnermullo aitûsianik pajungningnermullo aklujunut illingajûktut.

²³ Jûdillo illaliorpait pigiarlauktatik pinniarlugit, Mardachaiblo aglalauktangit tapkonunga:

²⁴ ᴋanok Haman Medatab erninga Agagitereôjok Jûdit Ilûnatik omigijingat issumalaungmat Jûdit ilûnaita Tokᴋotsomavlugit, ᴋanorlo immeraut attortauᴋolaungmago, tapkoa ᴋoaksartitsomavlugit, inuaromavlugillo;

²⁵ ᴋanorlo Estere atannermut ailaungmat, oᴋalaungmallo, aglangnut tapsoma kajusimaningit idluitut, Jûdit pivlugit issumagilauktangit, sangutitaukovlugit tapsoma niaᴋoanut; ᴋanorlo tamna erningillo nivingartaulaungmatta nappârtomut.

²⁶ Tamanna pivlugo uvlûk tapkoa atserarpâk Purimik, Oᴋausek Pur, (tagva imeraut) malliklugo. Tamanna pivlugo aglait tapkoa oᴋausertangit ilûnaita malliklugit, nangminerlo takkolauktatik, tikkitautigilauktatiglo malliklugit,

²⁷ Jûdit sokᴋosijuititsivut, illaliorlutiglo, pivlutik, kinguvaksatiglo pivlugit, ilûnaitalo pivlugit tapkonunga illingajomanajartut, attortautailiᴋonago uvlûk tapkoa uvloksioromavlugik, oktutiksak malliklugo, uvlungne nellonairsimajungne Jârine tamaine;

²⁸ Uvlûglo tapkoa erᴋaumajautsainartuksaungmânik, uvloksiortaujuksaulutiglo kinguvarêngne ilûnaine, ᴋittorngarêngnelo ilûnaine; nunane ilûnaine, iglugaseksoarnelo ilûnaine; uvlûglo tapkoa Purimik atilik pijungnaituksaungimânik Jûdit akkorngane, erᴋaumajauningallo sorairtuksaungimat kinguvângine.

²⁹ Atannerlo Ester Abihalib pannia, Mardachailo Jûdiôjok aglalaukpûk illungertorlutik, aglait aipangit tapkoa Purimemik oᴋartut nâkkiterlugit;

³⁰ Aglaillo tapkoa tillikliutivait Jûdinut ilûnainut, Ahasverosib atanniovingata nunangine, 127 ginêtunut, Oᴋautsit illanarnartut nertornartullo.

³¹ Uvlûk Purimemik atelîk nâkkiterlugik piᴋovlugit nelliutome nellonairtaumajome, sôrlo Mardachaib Jûdeôjub Esteriblo atanniub nellonairsivigilaungmattigik tamattominga, sôrlolo nangminek pivlutik, kinguvaᴋotitiglo pivlugit sokᴋosijuititsilaungmatta, nerritailinerub ᴋêanerublo pijoᴋarningangnik.

³² Esteriblo perᴋojiningata pijoᴋartok Purime tamanna Nâkkiterpâ; aglaktaulaukporlo aglangnut.