Ester 8 - Labrador Inuttitut Heritage Bible

Mardachaib angijorortitauninga. Atanniub perᴋojanga nutâk, Jûdit idluarkutiksanganut illingajok.

¹ Uvlorme taipsomane atanniub Ahasverosib atannek Estere tunnitsivigiva Hamanib Jûdit omigijingata iglunganik. Mardachailo tikkipok atanniub sânganut; Esterib Oᴋautilaungmago sugijaminik tapsominga.

² Atanniublo ᴋetterdlermêᴋotine Hamanemit tigulauktane pêrpa tunnilâlo Mardachaimut. Esteriblo Mardachai pimaklertingortipa Hamanib iglunganik.

³ Esterelo ama oᴋarivok atanniub sângane, pamakterlunelo ittiggangita sânganut ᴋennuvigivâlo pêjaiᴋovlugo Hamanib Agagitereôjub kassêninganik, kajusimaninganiglo. Jûdit akkerartorlugit issumagilauktanginik.

⁴ Atanniublo ajaupiak opigijautiksak Goldeojok issautivâ Esteremut. Tagva Estere makkipok, sângerlâlo atannek,

⁵ Oᴋarlunelo: Atanniub nâmagikpago, saimavioneksigumalo sângne, idluarijaukpâllo atannermut, ânanaugijaugumalo tapsomunga, tagva aglaktoᴋarle, aglait Hamanib Medatab erningata Agagitereôjub kajusimaningit aglalauktangit Jûdit tokᴋolugit atanniub nunangine, pitsartuêrotitauᴋovlugit.

⁶ ᴋanorle ᴋanoêtok inuᴋotima tikkitautiginajartangat Takᴋonarungnarajarpigo? ᴋanorlo takkonârungnarᴋîk illama nungutauninginik?

⁷ Tagva atanniub Ahasverosib atannek Estere Mardachailo Judeôjok oᴋautivak: Ahâk Hamanib iglunga tunnilaukpara Esteremut, taimnalo ᴋimiktaumavok nappârtome, aggane illilauramigit Jûdinut;

⁸ Tagva mânna illiptik aglaleritik atanniub atingane Jûdit pivlugit nâmagijaptingnik, nâkkiterlugillo atanniub ᴋetterdlermêᴋotinganut. Aglait atanniub atingane aglaksimajut, atanniublo ᴋetterdlermêᴋotinganut nâkkitersimajut pitsartuêrotitaujungnangimatta.

⁹ Tagva atanniub aglapaktoᴋotingit nelliutome taipsomane ᴋaikojauvut takᴋit pingajuane, tagva takᴋerme Sivanemik atelingme, uvlungita 23 ingane ᴋaikojauvut, aglaktaulaukporlo, sôrlo Mardachai perᴋojingmat, Judinut angajoᴋaksoarnullo, nunallo aulatinginut, kappitanullo nunane, Indiamit Aethiopia tikkilugo; tagva nunane 127 gine, nunat ilônnatik aglagviôvut attunît aglatik malliklugit, inôᴋattigêksuillo attunit oᴋausitik malliklugit, Jûdillo, aglatik oᴋautsitiglo malliklugit.

¹⁰ Aglakporlo (Mardachai) atanniub Ahasverosib atingane, nakkiterpaillo atanniub ᴋetterdlermêᴋotinganut. Aglaillo tillikliutivait tillijattigut horseojartut inutsût ᴋângine ablangajutigut.

¹¹ Tapkonane atanniub Jûdit perᴋovait, nâne Iglugaseksoarneᴋunik katimalerungnaramik, inôtsitiglo sorsugutigilugit, nungutilugillo nakterlugillo tokᴋolugillo inugiartoksuit ilûnatik, nunablo kappiasuktijimik pitsartuningit, sorrutsit arnallo illaliudlugit perᴋutingillo ârktautigilugit.

¹² Uvlorme atautseme, atanniub Ahasverosib nunakotingine ilûnaine, tagva takᴋit 12 ingata, tagva takᴋib Adaremik attigûb uvlungita 13 ingane.

¹³ Aglait tapkoa tukkingit imailaukput, perᴋojamik tunnijaumajokarmat nunane ilûnaine inûᴋattigêksuit ilûnaita nellojungnairtilugit, Jûdit uvlorme taipsomane oppalungairsimajuksaugamik omigijitik akkiorlugit.

¹⁴ Tillijallo ablangajut horseojartut ᴋângine, sukkalidlarlutik tuavilutiglo aularput atanniub oᴋausingit malliklugit. Perᴋojarlo tamna tunnijaulaukpok atanniub igloksoangane Susaneme.

¹⁵ Mardachaile annivok atannermit annorârsimavlune atannersiutinik, ᴋorksutanik, ᴋaᴋortaniglo, niaᴋotelijarlunelo Goldeôjomik angijomik, ullilijarlarmelo Bissuseôjomik, Purpureôjomiglo. Iglugaseksuillo Susan (inuit) igiaᴋomijarput, ᴋuviasudlarlutiglo.

¹⁶ Jûdit ᴋaumauteᴋalaukput, ᴋuviasûteᴋalarmiglo, Erᴋiertorneᴋalutiglo, nertortauneᴋalaukpullo.

¹⁷ Nunanelo ilûnaine, iglugaseksoarnelo tikkitaujune atanniub oᴋausinginut, perᴋojanganullo, ᴋuviasungneᴋalaukpok, erᴋiêrtorneᴋalarmelo Jûdit akkorngane, nerrimartitsivut uvloksiorlutiglo. Unuktullo nunat inunginit Jûdingorlaukput; Jûdit sivuranarningita tupvigilaungmagit.