Ester 7 - Labrador Inuttitut Heritage Bible

Hamanib ᴋimiktauninga nappartome Mardachai pivlugo nappalauktamine.

¹ Taimâglo atannek Hamanelo tikkipuk nerrimâraksamut atanniub Esterib âᴋiksorlauktanganut;

² Atanniublo ama uvlub aippangane Weinetorlauᴋârdlune Estere oᴋautipsarpa: Sunamik tuksiarᴋît, atannek Ester? Tunnitsiviojuksauvotit tamattominga. Sunalo tussugiviuk? Atannioviub koppanga pinajarpat aglât, taimaituksaulerpok.

³ Atannek Ester kiovok, oᴋarlunelo: Saimavioneksiguma sângne atannîk! Atanniublo nâmagikpago, tagva tunnitsivigilaunga inôsimnik tuksiarnera pitjutigallugo, inoᴋutimniglo tussunera pitjutigallugo.

⁴ Niorvgutigijaumagapta, uvanga inoᴋutikkalo, nungutaukovluta, naktertauᴋovlutalo, inuartauᴋovlutalo. Niorvgutigijaunajarupta arnaujogut angutaujogullo Kivgaksauᴋovluta, tagva nippeᴋarajangilanga; omisuktele sappidlarpok atanniub assiojijangit sattortautilugit.

⁵ Tagva atannek Ahasverose oᴋauseᴋarpok, oᴋarlunelo atannermut Esteremut: Kinauva taimna? Kinauvalonêt taimaitomik issumalerungnartok taimailioromavlune?

⁶ Estere oᴋarpok: Ômisukte tamna, akkerartortorlo tamna, Hamaneôvok idluitok una. Hamanible atannek, aipangalo kakkiladlarutigivak.

⁷ Atannerlo ᴋanningaumajarlune nikkovipok nerrimarnermit, Weinetornermillo, annilunelo perorsêvingmut iglub tunganêtomut. Hamanelo nikkovipok tuksiarvigivâlo atannek Ester inotsiminik, takkogame ᴋanoêtomik kajusimaviojarêrame atannermut.

⁸ Atannerlo uttertillugo perorsêvingmit iglûb tunganêtomit nerrimarvingmut, Haman pamangavok iksivautab, Esterib iksivavigijangata tungâne. Tagva atannek oᴋarpok: Atanniub aippanga aksorotijomavauk aglât najugamne iglome? Oᴋausek tamanna atanniub ᴋanninganit annilermat, Hamanib kênanga ullikpât.

⁹ Harbonalo pimaklertut illangat atanniub sângane, Oᴋarpok: Ahâk nappârtomik nappasimajoᴋarpok Hamanib iglungane, tallitut 50 tut pôktotigijomik, tapsoma sennajauᴋolauktanganik Mardachai, atanniub idluarkutiksanganik oᴋalauktok, pivlugo. Atannek oᴋarpok: ᴋimiktaule tapsomane.

¹⁰ Taimâk Haman ᴋimiktaulaukpok nappârtome sennalauktamine Mardachai pivlugo. Tagva atanniub ningarninga sorailaukpok.