Ester 6 - Labrador Inuttitut Heritage Bible

Hamanib Mardachai sagvartome opigijariaᴋarpa atanniub atingane.

¹ Unnuarme taipsomane atannek sinnigungnarlaungilak, ᴋaitauᴋovaillo aglait, unipkautsit pijoᴋalauktunik, attuartaulaukpullo atanniub sângane;

² Tagvanelo naipitauvok aglaksimangmat, ᴋanok Mardachai Oᴋarlaungmat, atanniub pimaklertoᴋotigik maggûk Bigtan Thereslo upkoab manuane udsertortûk, aggatik illijomanasuarlaungmagit atannermut Ahasverosemut.

³ Atannerlo oᴋarpok: Sunamik nertortaunermik, ajungitullivionermiglo Mardachai pinniarvigilaukpittigo tamanna pivlugo? Tagva kivgat kivgartortut tapsominga oᴋarput: Pinniarviolaungilak sunamik.

⁴ Atannerlo oᴋarpok: Kina avaluliorsimajub illuaneᴋâ? (Haman avaluliorsimajub illuanut, atanniub iglungata sânganêtub ittersimalaurame, atannek oᴋautitsomavlugo, Mardachai ᴋimiktauᴋolugo nappârtome, tapsoma akiksorlauktangane taimna pivlugo.)

⁵ Atanniublo kivgangita oᴋautivât: Ahâk Haman avaluliorsimajub illuane nangerpok. Atannek oᴋarpok: Itterle.

⁶ Hamanelo itterpok. Atanniublo oᴋautiva: Angut atanniub opigijomajanga sunaliorviojuksauva? Hamanele ômatimigut issumalerpok: Atanniub kina assimnit opigijomanajaralloarᴋauk?

⁷ Hamaniblo atannek oᴋautivâ: Angut taimna atanniub opigijomajanga,

⁸ Tamaungartaujuksauvok attititauᴋovlugo annorânik atannersiutinik, atanniub attorpaktanginik, horselo atanniub ablangavigivaktanga tamaungartaujuksauvoktauk; illijivioᴋovlugolo (angut taimna) niaᴋunganut atanniub niaᴋutânik;

⁹ Annorâglo tamna, horselo tunnijaujuksauvûk, atanniub Angajoᴋâksoangita illangata agganginut, tapsoma angut taimna atanniub opigijomajanga attitilugo piᴋovlugo, tessiorlugolo, ablangatillugo horsib ᴋângane, iglugaseksuit apkosiningittigut, nipliarᴋojilunelo sivurngane: Taimailiorvioniarpok angut atanniub opigijomajanga.

¹⁰ Atannek Hamanemut oᴋarpok: Tuavitit, annorâglo, horselo tigukik, sôrlo oᴋalauravit, Mardachailo, Jûdeôjok atanniub itterviksoangata sillatâne iksivajok taimailiorvigiuk; inoksarto; arniarane sumik oᴋautigilauktarnik.

¹¹ Tagva Hamanib annorâk horselo tiguvâk, atitipâlo Mardachai, tessiorlâlo iglugaseksuit apkosiningittigut, niplialunelo sivurngane: Imailiorviojuksauvok angut tamna, atanniub opigijomajanga.

¹² Mardachailo tikkinivok atanniub itterviksoanganut. Hamanele aisâdlarpok iglominut, kiksarlune kênanelo ulliklugo,

¹³ Unipkautivâlo nulliane Seres, ilanârijanelo, tamainik tikkitautigijaminik. Tagva illisimajoᴋotingita nulliangatalo Seresib oᴋautivat: Mardachai ocholerutigijat Jûdit kinguvânginit pikpat, tagva sulliniatsengilatit tamna pivlugo, ochojutiginiarpalle.

¹⁴ Oᴋartillugille sulle tapsomunga, atanniub pimaklertokotingit tikiput, errinesarpâllo Haman nerrimaraksamut ᴋaikovlugo, Esterib âkiksorlauktanganut.