Ester 5 - Labrador Inuttitut Heritage Bible

Esterib aininga atannermut. Hamanib pijugaklerninga Mardachaimik.

¹ Uvlullo pingajuane Estere attitipok atannersiutinik, nangeriartorlunelo avaluliorsimajub atanniub iglunganêtub illuanut, atanniub iglungata akkianut. Atannerlo iksivavok iksivautaksoarmine atannersiume atanniub iglungane, iglûb upkoangata akkiane.

² Atanniublo Estere atannek takkungmago nangertillugo avalut illuane, saimaneksilerpok tapsoma ijikita sângangne. Atanniublo ajaupiane opigijautiksak Goldeôjok tigumiartane issautiva Esteremut. Tagva Estere ablorpok tagvunga, aktorlâlo opigijautiksab nuvua.

³ Tagva atanniub oᴋautivâ: Suvît atannek Estere? Sunamiglo tussuvit? Atannioviub koppanganiglonêt aglât tunnijaujuksauvok illingnut.

⁴ Estere oᴋarpok: Atannermut nâmagijaupat, tagva atannek Hamanelo tikkilerlik uvlome nerrimaraksamut âkᴋiksorsimajamnut.

⁵ Atannek oᴋarpok: Tuavititse Haman pinniarᴋovlugo sôrlo Estere oᴋalaungmat. Atannerlo Hamanelo nerrimaraksamut, Esterib âkᴋiksorlauktanganut tikkingmânik,

⁶ Atanniub Estere oᴋautivâ Weinetorlaukârdlune: Suna mik ᴋennuvît Estere? Tunnijaujuksauvok illingnut. Sunalo tussugiviuk? Atanniôviub koppanga pinajarpat aglât, taimaituksaulerpok.

⁷ Tagva Estere kiovok oᴋarlunelo: Tuksiarnera tussuneralo imaipok:

⁸ Saimaneksiguma atanniub sângane, atanniublo Nâmagikpago tuksiaramnik tunnitsivigilunga, tussuneralo pinniarlugo, tagva atannek Hamanelo tikkilerlîk nerrimaraksamut âkᴋiksoromajamnut pivlugik: tagva ᴋaupat pinniaromavunga atanniub oᴋausingit malliklugit.

⁹ Tagva Haman uvlorme taipsomane annilerpok ᴋuviasuklune maksoavlunelo. Mardachaile takkogamiuk atanniub itterviksoangane nikkovilungimat, aulalungimallonêt sângane, tattalerpok ningarnermik Mardachai pivlugo.

¹⁰ Nunolaukporle. Angeraramelo tilliklerpok Aijauᴋolugillo ilanârijane, nullianelo Serese;

¹¹ Unipkautivaillo akluinime ânanaudlarninganik, ᴋittorngamelo unnurninginik, tamainiglo ᴋanok atanniub angijorortilaungmago, atanniublo angajoᴋâksoaᴋotingita, kivgaᴋotingita kollânut kagversimagame.

¹² Hamanelo oᴋarpok: Atanniublo Esterib kinalonêt ᴋaiᴋolaungila atannek aiparellugo nerrimaraksamut âkᴋiksorlauktaminut, uvanga kissimaulunga; ᴋaupamullotauk ᴋaiᴋojaumavunga taipsomunga, atannek aiparellugo.

¹³ Tamannale tamât ᴋuviasutigingilara Mardachai Jûdiôjok takkojautillugo uvamnut, iksivatillugo atanniub itterviksoangane.

¹⁴ Tagva nulliangata Seresib oᴋautiva illanârijangatalo Ilûnatik: Nappârtomik sennajokarle tallitut 50 gitut pôktotigijomik, atannerlo ᴋaupat oᴋautsaulerle, Mardachai ᴋimiktauᴋovlugo tapsomane, tagva ᴋuviasuklutit atannek aiparellugo nerrimarviliarniarpotit. Hamanib tamanna nâmagiva, âkᴋiksortauᴋolugolo nappârtok.