Ester 4 - Labrador Inuttitut Heritage Bible

Mardachaib kajungersaininga Esteremik, aikᴋovlugo atannermut, tuksiarvigilugo pikovlune, perᴋojab tokᴋotsiᴋojijub Jûdinik attortaujungnaininganik.

¹ Mardachaib tamaita pijoᴋalauktut tukkisigamigit, annorâne allikpait, attitilunelo pôksaijamik arksamiglo, annilunelo iglugaseksuit ᴋerkânut, nipliaᴋortôvlunelo ârusuklune.

² Tikkiporlo atanniub upkoaksoangata sânganut. Kinalonêt annorâlijarlune pôksaijamik atanniub itterviksoanganut ittertuksaungimat.

³ Nunanelo tamaine atanniub oᴋausingita perᴋojangitalo tikkivingine ârusutiksaᴋadlalerpok nerritailineᴋalarmelo, kiksadlarneᴋalunelo Jûdit akkorngane; unuktullo nellâvut pôksaijame arksamelo.

⁴ Tagva Esterib inûsuktôᴋotingit arnat, kivgangitalo angutit illangat, tikkiput oᴋautivâlo tamattominga. Tagva atannek Ester ᴋoaksâdlarpok. Annoraniglo tillikliutjivigiva Mardachai, attitikovlugo tapkoninga, pôksaijamiglo Pêrsiᴋovlugo; illaliorlungilaille.

⁵ Tagva Esterib Hatache atanniub pimaklertôᴋotingita illangat, tillilauktanga naipertorᴋovlugo tapsominga, ᴋaiᴋova, perᴋojaᴋartipalo Mardachaimut illingajomik, nellojungnaititaujomavlune sunaumangât tamanna, sunalo pivlugo taimailiormangât?

⁶ Tagva Hatachib Mardachai annivigiva iglugaseksuit apkosininganut, atanniub itterviksoangata sânganêtomut.

⁷ Mardachaiblo oᴋautivâ tamainik tikkitautigijaminik, Silberillo unnurninginik, Hamanib oᴋautigilauktanginik, kittiktaromajanginik atanniub kênaujaᴋotitalinganut, Jûdit pivlugit nungutitsomavlugit.

⁸ Perkojablo tunnijaumalauktub Susaneme Jûdit nungutilugit adsinginik tunnitsivigiva, takkojautitsiᴋovlugo tamattominga Esteremut, oᴋautjiᴋovlugo tapsominga, perᴋolugolo piᴋovlugo, atannermut itterᴋovlugo, tuksiarvigilugo, inûᴋotiminiglo tuksiarutjiᴋovlugo.

⁹ Taimâglo Hatach itterpok akpautigivaillo Mardachaib Oᴋausingit Esteremut.

¹⁰ Esteriblo Hatach oᴋautivâ, oᴋarkolâlo Mardachaimut:

¹¹ Atanniub kivgangit ilûnatik, inugiartoksuillo atanniub nunangine ᴋaujimavut, atannermut ittertoᴋarangat avaluliorsimajub illuanut, angullonêt, arnarlonêt, ᴋaiᴋojaulungitomik, tamna perᴋojak malliklugo tokᴋotaksaungmat; kisianeungitok atanniub ajaupiane opigijautiksak Goldeôjok issautiguniuk tapsomunga, inôᴋovlugo. Uvangale mâna uvlune 30 gine ᴋaiᴋojaulaungilanga takᴋamunga atannermut.

¹² Esteriblo oᴋausingit oᴋautigijaulermatta Mardachaimut,

¹³ Mardachaib Ester oᴋautsauᴋopsarpa: Issumaniarnak inôtsitit piulijatuariniarangne atanniub iglunganênavit, Jûdinit tamainit;

¹⁴ Mânnale nelliutome tamattomane niplitailiniaruvit, tagva Jûdit ikajortauniksarsiniarput, piulijauniksarsiniarlutiglo nakit assingnit, igville atâtavillo illangit nungutauniarpose. Immaᴋâlo nelliutok tamanna pitjutigillugo atanningortitaulaungimangarpit?

¹⁵ Esteriblo Mardachai kiojauᴋovâ:

¹⁶ Ailerit Jûdillo Susanemêtut ilûnaita katterᴋokit nerritailijutigissingalo, nerriᴋonase immerᴋonaselo uvlune pingasune, uvlotillugolonêt unnuarmelonêt; uvanga uigasukotikkalo, nerritailijomavoguttauk taimâk. Taimâglo atannermut itteromavunga, perᴋojak akkerartorlugo; tokᴋotauniaruma, tagva tokᴋotauvunga.

¹⁷ Mardachailo aularpok, pinniarlunelo tamainik Esterib Pinniarᴋolauktanginik tapsomunga.