Ester 3 - Labrador Inuttitut Heritage Bible

Hamanib piojorininga illusiâlungillo Judinut.

¹ Pijoᴋalauktut tamakkoa kingorngane, atanniub Ahasverosib Haman Medatab erninga, Agagitereôjok angijorortipa, kagvertilâlo, iksivautangalo issukliotipa angajoᴋâksoaminit tapsomanêtunit ilûnainit.

² Atanniublo kivgangita atanniub itterviksoanganêlauktut ilûnatik pâmaktervigivât, opigilâlo; atannek taimâk perᴋojilaungmat. Mardachaile pâmakterlungilak, opiginagolo.

³ Tagva atanniub kivgangita, atanniub itterviksoanganêlauktut Mardachai oᴋautivât: Sôg atanniub perᴋojanga tappagiviuk?

⁴ Uvlullo tamaita taimâk oᴋautipsarᴋattaramitsuk, tapsomalo nalengimagit oᴋautigivât Hamanemut, takkojomavlutik Mardachaib pinniarninga sokᴋosijuijungnaralloarmangat; oᴋautilauramigit Judeôgame.

⁵ Hamanelo takkogame Mardachaib okᴋungavigingimago Pâmaktervigingimagolo, illumilerpok ᴋaningaumajarnermik.

⁶ Nachogivâlo aggane illilugit Mardachaimut kisiane, Mardachaib inûᴋattingit oᴋautigilaungmagit tâpsomunga; pinnasuarporle Mardachaib inugaseksoaᴋotingit Jûdit ilûnaita Ahasverosib atanniovingane ilûnanêtut nungutitsomavlugit.

⁷ Takᴋit sivurlerpângane, tagva takᴋerme Nisanemik atelingme, atanniub Ahasverosib atannioningata Jâringita 12 ingane, immeraut attortaulaukpok Hamanib sângane, uvlormit uvlormut, takᴋermit takᴋermut, takᴋit 12 ingat tikkidlugo, tagva takᴋêk Adaremik atelik.

⁸ Hamanelo atannermut Ahasverosemut oᴋarpok: Inûᴋattigêksoaᴋarpok siamarsimajunik, avilerpullo Inûᴋattigêksuit atanniovît nunanginetut ilûnatik akkornganut, malligaksangillo inûᴋattigêksuit assingita malligaksangititut-ilungilet, atanniublo malligaksauᴋojangit malliklugit pinniarlungilet; atannermullo nâmalungilak taipkoa taimailingatsainarᴋolugit.

⁹ Atannermut nâmagijaukpat, tagva aglarle, Tokᴋotauᴋovlugit, tagva talent-inik 10,000 tinik Silberemik kittiktarijomavunga pimaklertut agganginut, âtauᴋovlugit atanniub pivianartoᴋutalinganut.

¹⁰ Tagva atanniub ᴋetterdlermêᴋotine pêrpa aggangminit tunnilâlo Hamanemut, Medatab erninganut, Agagitereôjomut Jûdit ômigijinganut.

¹¹ Atanniublo Haman oᴋautivâ: Silberit taipkoa tunnijaumavut illingnut, tappilugillotauk inûᴋattigêksuit taipkoa, nâmagijarnik pinniarvigilugit piᴋovlutit.

¹² Tagva atanniub aglakpaktoᴋotingit ᴋaiᴋojauvut takᴋit sivurlingata uvlungita 13 ingane; aglaktaulerporlo taimâluatsiak sôrlo Haman perᴋojingmat, atanniub angajoᴋâksoaᴋotinginut, aulatsijunullo nunanik, nunane sunatuinarne, inûᴋattigêksuillo attunît nunane angajoᴋaunerôjunginut, inûᴋattigêksuit attunît aglaningit oᴋausingillo malliklugit, atanniub Ahasverosib atingane, atanniublo ᴋetterdlermêᴋotinganut nâkkitertauvlutik.

¹³ Aglaillo tapkoa tillikliutijauvut akpangertutigut atanniub nunaᴋotinginut ilûnainut, Jûdit ilûnaita nungutilugit, nakterlugillo, inuarlugillo, tammarmik inôsuktut inutoᴋaujullo, sorrutsillo, arnallo, ilûnaita uvlorme atautseme, tagva takᴋit 12 ingata uvglungita 13 ingane, tagva takᴋib Adaremik atiggub perᴋutingillo arktautigilugit.

¹⁴ Aglait tapkoa tukkingit taimailingalaukput, perᴋojak tunnijaumangmat nunane ilûnaine, inûᴋattigêksoarnut ilûnainut, nellonairtaujuksak, uvlorme taipsomane oppalungairsimajuksaungmatta.

¹⁵ Akpangertullo aularput tuaviluᴋarlutik atanniub Perᴋojanga malliklugo. Perᴋojarlo tamna tunnijaumalaukpok atanniub igloksoangane Susaneme. Atannerlo Hamanelo iksivavûk, immerlutiglo; iglugaseksoarmiullo kakkiladlalaukput.