Ester 2 - Labrador Inuttitut Heritage Bible

Esterib annerijauninga atanniub nullianganut. Mardachaib, tapsoma inûgoijingata angerᴋattigêngnek atannek akkerartorlugo mallugiva, sagvarlâlo.

¹ Pijoᴋalauktut tamakkoa kingorngane atanniub Ahasverosib ᴋaningajarninga sorairlauᴋârtillugo, Vasthi Erᴋarpâ, pinniarlauktanga, kajusimavioningalo.

² Tagva atanniub kivgangit naipertortut tapsominga, Oᴋarput: ᴋennertoᴋarle atannek pivlugo, inûsuktunik uigarsungnik pinnarnartunik;

³ Atannerlo ᴋemmergojoᴋartitsilerle atanniovime nunangine ilûnaine, uigârsungnik inûsuktunik pinniarnartuniglo sunatuinarnik kattitsilutik âtsiᴋovlugit atanniub igloksoanganut Susanemêtomut, arnat iglunganut, Hegaib, atanniub pimaklertoᴋotingata, arnanik aulatsijub agganginut, pinarnarninginik tunnijiᴋovlugo tapkonunga;

⁴ Uigasuillo nelliat atannermut ânanaugijaujok, tamna annerijaule Vasthi innangêrlugo aipauᴋovlugo atannermut. Atanniublo tamanna nâmagivâ, taimailiorlunelo.

⁵ Anguteᴋalaukporle Jûdeôjomik iglugaseksoarne Susaneme atanniub igloᴋarvigijangine, Mardachaimik atelingmik, Jairib erninganik, Sîmeonib erningata, Kisib erningata, Benjaminekut illanganik,

⁶ Aularᴋasiutitaumalauktomik Jerûsalemit, Jechanja, Jûdakut atanningat Nebukadnezarib aulartilauktanga aulartitautillugo.

⁷ Inugoijolaukporlo Hadassamik, tagva Esteremik, akkangata paninganik, atâtaᴋalungimat, anânaᴋangimallonêt. Uigârsôlaukporlo ânanaudlartok, pinnarnadlartorlo. Atâtangalo anânangalo tokᴋungmânik Mardachaib illaliorpa panimetut.

⁸ Atanniublo perᴋojanga malligaksauᴋojangalo tussartaulermat, uigâsuillo unuktut âtaungmatta atanniub igloksoanganut Susanemêtomut, Hegaib agganginut, Esteretauk âtaulaukpok atanniub iglunganut, Hegaib, arnanik udsertortib agganginut.

⁹ Tapsomalo uigâsuk tamna ânanaugiva, Esterelo napkiningneksivok sângane. Tuavilaukporlo pinnarnarsilugo, tunnitsivigilugolo nerᴋiksanginik, uigârsungniglo 7 nik ânanânik, atanniub iglunganit pijunik. Pitipâlo uigasukotingit illagilugit innemut nâmanerpâmut, arnat iglunganêtomut.

¹⁰ Esteriblo oᴋautilaungila inûᴋotiminik illaminiglo; Mardachaib perᴋolaungmago, tamattominga oᴋartuksaungimat.

¹¹ Mardachailo agvertarlaukpok uvlut tamaita arnat iglungata avluliorsimaningata sângane, tussarasuaromavlune Estere ᴋanoêngitsiarmangât, ᴋanorlo pinniarvioninganik.

¹² Uigâsuille nelliata nelliuninga nellonairsimajok ittertuksauvia atannermut Ahasverosemut nelliutilaukpat, arnat pinarnarsijauninganêlauᴋârdlune takᴋit 12 it nâlugit (pinarnarsijauningat taimâk akkunêrtigijôjariaᴋalaungmat, takᴋit pingasujortut nâlugit Mirrit orksunginut, takᴋillo pingasujortut nâlugit mingoarutiksanut tippitsiariktunut, assinginullo, arnat pinarnarsijaujutiksanginut illingajunut);

¹³ Tagva uigâsuk tamna itterpok atannermut, pijomajangalo aipauᴋojaujariaᴋalaukpok tapsomunga, arnat iglunganit atanniub iglunganut.

¹⁴ Nelliallo unnungme itterlaurune, tamna uvlâme annilerpok tapsomangat, ailunelo arnat iglungata aipanganut, Shaasgasemut atanniub pimaklertoᴋotinganut, udsertortemut pannervganik, utterungnaituksaulaukporlo atannermut, kisiane atanniub tusugilauruniuk, atingagullo ᴋaikojauᴋoguniuk.

¹⁵ Esterib, Abihailib Mardachaib akkangata paningata (Mardachaib illaliorlauktangata panimetut) nelliuninga ittertuksauvia atannermut nelliusimangmat, tusulungilak sunamik, Hegaib atanniub pimaklertingata, arnanik udsertortib, oᴋarningata asianik. Esterelo saimaneksivok ilûnatik takkogame ijingita sângine.

¹⁶ Esterelo âtaulaukpok atannermut Ahasverosemut atanniub iglunganut, takᴋit tellimaujoane, Tebetemik atelingme, atanniotiningata Jahringita 7 ingane.

¹⁷ Atanniublo Estere nagliginerpârilerpa arnanit tamainit, saimaneksilunelo, napkiningneksilualerpok tapsoma sângane uigasungnit ilûnainit. Tapsomalo niaᴋote atannersiut illiva niaᴋoanut, atanningortilâlo, aipangortipa ingminut Vasthi innangêrdlugo.

¹⁸ Atannerlo nerrimârtitsivok angijoksoarmik Angajoᴋâᴋotiminut, kivgaminullo ilûnainut, (nerrimaraksak tamna Estere pivlugo pilaukpok) nunallo (inuit) akkiliaksanik akkilêtailikovait, pilliutiniglo atannersiutinik tunnijivok.

¹⁹ Aipanganiglo uigârsuit kattertautilugit, Mardachai iksivalaukpok atanniub itterviksoangane.

²⁰ Esterelo nellonairsilaungilak ilamminik, Inûᴋotiminiglonêt; sôrlo Mardachai perᴋolaungmâgo. Estere Mardachaib oᴋausingit taimâluatsiak malliklugit pinniarame, sulle sivurnganetut pairijaunermine tapsomunga.

²¹ Nelliutome taipsomane Mardachai iksivatillugo atanniub itterviksoangane, atanniub pimaklertoᴋotigik maggûk, Bigtanelo Thereslo ningalerpûk, pinnasuarpûglo aggatik illijomavlugit atannermut Ahasverosemut.

²² Tamanna ᴋaujijaulerpok Mardachaimut, tapsomalo Oᴋautigiva atannermut Esteremut (atanniub aipanganut;) Esteriblo oᴋautigiva atannermut Mardachaib atingane.

²³ Tamannalo nautsertortaulermat nachvârtaulaukpok Taimâk. Tammarmiglo ᴋimiktaulaukpûk napârtome, tamannalo aglaktaulaukpok atanniub pijoᴋarningita aglanginut.