Esra 9 - Labrador Inuttitut Heritage Bible

Esrab tuksiarninga.

¹ Tamakkoalo tamaita namaksimangmatta angajoᴋaunerôjut tikkipânga oᴋautilungalo: Innugasaksuit Israelitit, ajochertuijullo, Levitillo aptersimavlutik ingmigolingalungilat, innuᴋattigêksoarnit nunane makkojungnartulliningit pitjutigillugit, tagva Kananiterit, Hetiterit, Feresiterit, Jebusiterit, Amoniterit, Moabiterit, Egipterit, Amoriterillo;

² Tapkoa panningit tigulaungmagit nulliangoᴋovlugit ingminut ernermingnullo, kinguvaillo ivsornaitut akkumavait nunat innuᴋattigêksoanginut. Angajoᴋaunerôjullo aulatsijullo aggangit idluitullinerme tamattomane sugaluluarlaukput.

³ Tamattominga tussarama annorâka allikpakka, ulligalo, niaᴋungmalo nujangit, umikkalo nusukpâkka, iksivalungalo unainalivlunga.

⁴ Kattimalerpullo uvamnut illunatik Nalekab Israelib Gudingata oᴋausinginik sivurajut, tammartovinersoak pitjutigellugo; iksivalungalo unainalivlunga tunnergut unnuksiut tikkilugo.

⁵ Tunnergutiblo unnuksiutib tunnijauviane nikkovipunga paksarnimnit annoralijarlunga, ullilijarlungalo alliksimajunik, serᴋortorpungalo aggakkalo issangmilugit Nalekamut Gudimnut,

⁶ Oᴋarlungalo: Gudiga, kangusukpunga, illerasuklungalo uilunga illingnut Gudiga; idluitullinivut aglisimangmatta niaᴋupta ᴋollangittigut, passijaksaunivullo angijovaksôvok ᴋillangmut toklune.

⁷ Atâtagijapta nalliuninganit passijaksaudlalaukpogut uvlok tamanna tikkidlugo; idluitullinivullo pitjutigellugit uvagut, attannivullo, ajochertuijôvullo, tunnijaumavogut nunat attannertangita agganginut, saviksoarmut, parngnanairsimavingmullo, aksartaunermullo, kênaptalo kangusuktitauninginut, sorlo uvlorme tamattomane illingangmat.

⁸ Mannalo kêtamik saimarvionermik pivogut Nalekamit Gudiptingnit, amiakoᴋarapta sulle ikkitunik, annigoimajunik, tunnitsivigilutalo kikkiangmik attautsemik innimine ivsornaitome, Gudivut ijiptingnik ᴋaumaksaimat, innungmaumitilutalo kêtamik kivgauniptingne.

⁹ Kivgauvogulle, Gudiptale ᴋemmalaungilâtigut kivgauniptingne, napkiningnerlo torartilaukpa uvaptingnut Persiamiut attanningita sângine, innoᴋojiᴋovlugit uvaptingnik, Gudipta iglunga igluliorlugo piᴋovluta, asserorsimaningillo sattortautilugit piᴋovluta, tunnitsivigivlutalo avalunik, Judame Jerusalemelo.

¹⁰ Mannalo ᴋannok oᴋartuksauvita Gudivut tamakkoa kingorngane? perᴋojattit ᴋemmalauraptigik,

¹¹ Perᴋolauktattit kivgaᴋotikut nallautaijutigut oᴋarlauklutillo: Nuna tikkiniartasse kingormgutiniarlugo nunauvok ivsornartok nunat innuᴋattigêksoangita ivsornarninginut makkojungnartullininginut, nâjijutigijanginut tapsominga issuanit aipanit, aipanga tikkidlugo sallumainermik.

¹² Tagva manna pannise tunnijaksaringilasse taipkoa erninginut, taipkoalo panningit tigujaksaringilasse ernipsingnut nulliangoᴋovlugit, ullapirsautiksangallo, idluarᴋutiksangallo ᴋenneraksaringilasse sorairase, sôngoᴋovluse, nerriᴋovluselo nunab pinginik, kingormgutijaksautilugolo ᴋittorngapsingnut, issoᴋangitomut.

¹³ Tamakkoalo tamaita tikkitautigijapta, pinniarniâluvut, passijaksaudlarnivullo pivlugit, kingorngane, igvit Gudivut pitlarnikinersarilaukpaptigut pijuksauniptingnit idluitullinivut pitjutigellugit, piulijauneᴋartilaukpaptigullo, sorlo mana imat.

¹⁴ Uvagulle ama perᴋojatit serᴋomijaksarivitigik innuᴋattigêksuillo makkoa, taimaitunik makkojungnartoggit aipaniᴋattigivlugit. Ningariniangipittigut, nungutauᴋârtinata, amiakoᴋarungnaiᴋârtinago, piulijauneᴋarungnaiᴋârtinagolonêt?

¹⁵ Nalegak, Israelib Gudinga, igvit idluarpotit, uvagut amiakogapta, annigoimavlutalo, sorlo uvlorme tamattomane illingangmat. Ahâk, nangerpogut sângne passijaksauniptingne; tamannale pivlugo nangertoᴋarungnangilak sângne.