Esra 8 - Labrador Inuttitut Heritage Bible

Esrab ingerarninga Jerusalemut.

¹ Tamadsalo niaᴋôjut atâtanut kittitaulauktut, takpaungarᴋattigilauktakka Babelemit attanniub Artasasthab attanniotiningata nalliuningane.

² Pinehasib ᴋittornganginit: Gersome; Itemarib ᴋittornganginit: Daniel. Davidib ᴋittornganginit: Hattus.

³ Sechanjab ᴋittornganginit, Pareosib ᴋittorngangita: Sacharja, illagilugo kittitaumajut angutit 150 git.

⁴ Pahat Moabib ᴋittornganginit: Elioenai, Serajab erninga, illagelugolo angutit 200 dit.

⁵ Sechanjab erninginit: Jehasielib erninga, illagilugolo angutit 300 dit.

⁶ Adin Ebedib ᴋittornganginit: Jonathanib erninga, illagilugolo angutit 50 git.

⁷ Elamib ᴋittornganginit: Jesaja, Athaljab erninga, illagellugo angutit 70 git.

⁸ Sefatjab ᴋittornganginit: Sebadja Michailib erninga, illagellugolo angutit 80 git.

⁹ Joabib ᴋittornganginit: Obadja, Jehielib erninga, illagellugolo angutit 218 it.

¹⁰ Selomitib ᴋittornganginit: Josifiab erninga, illagellugolo angutit 160 it.

¹¹ Bebaib ᴋittornganginit: Sacharja, Bebaib erninga, illagellugolo angutit 28 it.

¹² Asgadib ᴋittornganginit: Johanan, erningita nukârdlerpângat, illagellugolo angutit 110 it.

¹³ Adonikamib ᴋittornganginit kingorlernit, tamadsalo attingit: Elifelet, Jehielelo Semajalo, illagilugillo angutit 60 it.

¹⁴ Bigevaib ᴋittornganginit: Utai, Sabudelo, illagilugillo angutit 70 git.

¹⁵ Uvangalo kattitilaukpakka kôngme Ahevamut kôktome; uvlilutalo tagvane pingasunik. Ullernaigigapkillo innugasaksuit, ajochertuijullo, Levitisilaungilanga tagvane.

¹⁶ Tagva tilliklilaukpunga Elieseremut, Arielemullo, Semajamullo, Elnatanemullo, Jaribemullo, Elnatanemullo, Natanemullo, Sacharjamullo Mesulamemullo, niaᴋôjunut, Jojaribemullo, Elnathanemullo, illissimajungnut.

¹⁷ Tillivakkalo Iddomut, angajoᴋaunerôjomut Kasfiame, oᴋauseᴋartipakkalo, oᴋauserilugit Iddomut ᴋattangutinginullo Nethiniminut Kasfiametunut, ᴋaitsivigivluta kivgaksanik Gudipta iglunganut, piᴋovlugit.

¹⁸ Kaitsivigivâtigullo Gudipta aggangita pitsiartut ᴋollangiarninginut uvaptingnik, angumik sillatôjomik Mahelib erninginit, Levib erningata, Israelib erningata, Serebjamik, erningit, ᴋattangutingillo illaliudlugit, 18 nik.

¹⁹ Hasabjamiglo, illagellugolo Jesajamik, Merarib erninginit, erningit ᴋattangutingillo illaliudlugit 20 ginik.

²⁰ Nethiniminiglo, Davidib angajoᴋaᴋotingitalo tunnilauktanginik Levitit kivgartorlugit, 220 ginik, illunatik attingitigut aglaksimavlutik.

²¹ Tagvanelo kôngme Ahevametome nerritailinek akpautigijauᴋovara, nikkanarsarluta Gudipta sângane piᴋovluta, ᴋennerluta tapsomangat apᴋomik tammarnangitomik uvaptingnut ᴋittorngaptingnullo, perᴋutiptingnullo tamainut.

²² Kangusulaurama attannermit sorsuktuksat, ablangajullo horsine ᴋaitauᴋolugit, sapputiluta omisuktunit apᴋome piᴋovlugit. Attannek oᴋautilauraptigo: Gudipta aggangita illunaita, ᴋennertut tapsominga ᴋollangiarpait idluarᴋutiksanginut; pitsartuningatale ningarningatalo illunaita akkerartorpait allaijut tapsominga.

²³ Taimaglo nerritaililaukpogut ᴋennuarivavullo tamanna Gudiptingnit; tapsomalo tussarpâtigut.

²⁴ Uvangalo ajochertuijunit anginerôjunit 12 it ingmigolingatipakka: Serebja, Hasabjalo, 10illo ᴋattangutinginit;

²⁵ Kiktitarivigivakkalo Silberemik, Goldemiglo Gudib iglungata tunnergusianganik, attanniub attannertuijoᴋotingitalo, angajoᴋâᴋotingitalo, Israelitillo najutilauktut illunatik tunnilauktanginik.

²⁶ Kiktitarpakkalo agganginut tunnilugit Talentit 650 git Silbere, illulerᴋutillo Silbereôjut, Talentitut 100 ditut; Goldelo Talentit 100 dit;

²⁷ Ermgusiarsuit Goldeôjut 20 git, Darikitut 1,000 ditut akkitôtigijut; illulerᴋutiglo magguk ᴋannujaujuk, Goldetun-îtuk.

²⁸ Oᴋautivakkalo: Illipse ivsornaipose Nalekamut, illulerᴋutillo tapkoa ivsornainivut, Silbere, Goldelo tapkoa tunnergutauvut pijarijut Nalekamut atâtagijapse Gudinganut.

²⁹ Udsertorsigik pairilugillo, kiktitariᴋârtinasse makkoninga, ajochertuijut, Levitillo angajoᴋaunerôjut, atâtallo angajoᴋaunerôjut, Israelitit akkorngane, sângine Jerusaleme, Nalekab iglungata inningine.

³⁰ Tagva ajochertuijut Levitillo Silbere, Goldelo, illulerᴋutillo kiktitarsimajut tiguvait, tikkiutitsomavlugit Jerusalemut Nalekab Gudipta iglunganut.

³¹ Taimaglo aulârpogut Ahevab kônganit taᴋᴋit sivorlingata uvlungita 12 ingane, ingerarᴋovluta Jerusalemut. Gudiptalo aggangita ᴋollangiarpâtigut, piulilutalo omisuktut, terliarinasuartullo uvaptingnik apᴋome agganginit.

³² Jerusalemullo tikkinapta merngoêrserpogut tagvane uvlut pingasut nâlugit.

³³ Uvlulle sittamangane Silbere, Goldelo illulerᴋutillo kiktitartaulerput Gudib iglungane, Meromotib Uriab erningata ajochertuijub agganginut; illagivalo Eleaser Pinehasib erninga; tapkoalo illagivait Josabad Jesuab erninga, Noadjalo, Benunib erninga Leviteôjuk.

³⁴ Illunatik attunît unnurningit oᴋumainingillo malliklugit; oᴋumainingillo taipsomane illunaita aglaktaulaukput.

³⁵ ᴋittorngallo parngnanairsortaumalauktut parngnanairsimavingmit uttersimajut, tunnijivut tunnergutinik ôtaksanik Israelib Gudinganut; tuktuvângnik angusallungnik 12 nik Israelitit illuengârlutik pivlugit, saukanik 96 nik, saugârsungnik 77 nik, tuktungajuniglo angusallungnik 12 inik, tunnergutiksamut ajortoêrutiksamut; illunatik tunnergutiksamut ôtaksamut Nalekamut.

³⁶ Attanniublo perᴋojanga unertutigivat attanniub pimaklertoᴋotinginut, nunablo aulatinginut kôksub miksâne, tapkoalo innugasaksuit Gudiblo iglunga kakkitipait.