Esra 7 - Labrador Inuttitut Heritage Bible

Esrab perᴋojauninga attannermut Jerusalemut ingerarungnarlune, kivgartornerlo Gudemik aᴋiksorlugo.

¹ Pijoᴋalauktut tamakkoa Arthasasthab Persiamiut attanningata attanniovinganêlauktut kingorngane majorarlune takpaungarpok Babelemit Esra, Serajab erninga, Asarjab erningata, Hilkiab erningata,

² Sallumib erningata, Zadokib erningata, Ahitub erningata,

³ Amarjab erningata, Asarjab erningata, Merajotib erningata.

⁴ Serajab erningata, Usib erningata, Bukib erningata,

⁵ Abisuab erningata, Pinehasib erningata, Eleaserib erningata, Aronib ajochertuinerôjub erningata.

⁶ Illisimatsiangolauktok aglangnik, Mosesib perᴋojanginik Nalekab Israelib Gudingata tunnilauktanginik. Attanniublo tunnitsivigiva tamainik pijomajanganik, Nalekab Gudingata aggangita ᴋollangiarninginut tapsominga.

⁷ Takpaungârpullo (illagellugo) Jerusalemut Israelib ᴋittorngangita illangit, ᴋapsit, ajochertuijullo, Levitillo, imgerpâktullo, upkoaniglo udsertortut, Nethinimillo, attanniub Arthasasthab Jaringita 7 ingane.

⁸ Tikkipullo Jerusalemut taᴋᴋit tallimangane, tagva attanniub Jaringita 7 ingata.

⁹ Taᴋᴋib sivurliub uvlungita sivurlingane kajusimalerlaurame Babelemit takpaungaromavlune, taᴋᴋillo tallimangata uvlungita sivurlingane tikkipok Jerusalemut, Gudib aggangita pitsiartut ᴋollangiarninginut tapsominga.

¹⁰ Esrable omattine torartipa Nalekab perᴋojangit ᴋenneromavlugit, pinniaromavlunelo ajochertuijomavlunelo Israeleme perᴋojanik idluarnerniglo.

¹¹ Tamadsalo aglait tukkingit attanniub Arthasasthab tunnilauktangita Esramut, ajochertuijomut, aglangniglo illisimajomut, ajochertuijolauktomut Nalekab oᴋausinginik, perᴋojanginiglo Israelemut:

¹² Artasastha, attanneôjok attannernut illunainut, Esramut, ajochertuijôjomut aglangniglo illissimajôjomut ᴋillaub Gudingata perᴋojanginik, ullapirsaumik salutitaunermiglo.

¹³ Uvamnit perᴋojak tunnijaumavok, illunatik nalegauvimnêtut innuᴋattigênit Israelitinit, ajochertuijunginillo Levitinillo, ᴋunnutuilutik aularomajut Jerusalemut, illauᴋattaujungnarmatta illingnut;

¹⁴ Igvit attannermut attannertuijoᴋotinginullo 7 inut tillijaumagavit, Juda Jerusalemelo nautsertoriartorlugit Gudib perᴋojangit aggangnêtut oktutigivlugit.

¹⁵ Neksarlugillo Silbere, Goldelo attanniub attannertuijoᴋotingitalo pijarallutik tunnijangit Israelib Gudinganut, igloᴋartomut Jerusaleme;

¹⁶ Silberelo, Goldelo tamaita nachvarungnartattit nuname Babeleme, tapkoa illaliudlugit innugasaksuit ajochertuijullo pijumagamik tunnijangit Gudib iglunganut Jerusalemêtomut;

¹⁷ Tamakkoa tamaita tigukit, attaruilivlutillo pissiniarit kênaujanut tapkonunga, tuktuvângnik angusallungnik, saukaniglo angusallungnik, saugârsungniglo, tunnergutiksaniglo nerᴋiksanik, tunnergutiksaniglo immiksanik, tunnergutauᴋovlugit Altareme Gudipse iglunganêtome Jerusaleme.

¹⁸ Sunalo igvit ᴋattangutivillo idluarigapsiuk kênaujat amiakojut pitjutigellugit, tamanna pinniarsiuk Gudipse pijomajanganut;

¹⁹ Illulerᴋutillo tunnijaumajut illingnut, kivgartornermut Gudivit iglungane, tapkoa unertutigikit Gudib sângane Jerusaleme.

²⁰ Tapkoalo tappilugit pijariaᴋartut Gudivit iglunganut, allaijariaᴋarᴋattartatit, tamakkoa tunnijauᴋokit attanniub pivianartotalinganit.

²¹ Uvanga attanniôjunga Arthasastha, tamanna perᴋoᴋauvara pimaklertunut illunainut kôksub ungatânetunut, sunamik Esrab, ajochertuijub, aglangniglo illissimajub ᴋillaub Gudingata perᴋojanginik, ᴋaitauᴋojanginik illipsingnit, tammakkoninga attaruilivluse pinniarᴋovluse;

²² Silberemik Talentit 100 dit tikkilugit, Weizenemik Korit 100 dit tikkidlugit, Weinemiglo Bathit 100 dit tikkidlugit, sioraujaniglo oktortaulungitunik.

²³ Tamaitalo ᴋillaub Gudingata perᴋojiningit tunnijautsiatsainartuksauvut ᴋillaub Gudingata iglunganut, ningautsemik tikkitoᴋarᴋonago attanniovingmut attannermullo, erninginullo.

²⁴ Illipselo nallojungnaileritse pitsartuneᴋanginapse, Zinsenik, Zolleniglo, akkiliaksaniglonêt Jarine tamaine, ajochertuijut nalliallonêt, Levitillonêt, imgerpâktullonêt, upkoanik udsertortullonêt, Nethinimillonêt kivgartortullonêt Gudib oma iglungane tunnijiᴋolugit.

²⁵ Igville Esra, Gudivit sillatuninga, aggangnêtok malliklugo, idluarsaijungortitsilerit pairksijingortitsilutillo, idluarsaijunik innugasaksoarnik kôksub ungatanêtunik, illunainik Gudivit perᴋojanginik nallolungitunik; ᴋaujimangitullo tapkoninga, tapkoa ajochertorsigik tapkoninga.

²⁶ Nalliallo attaruilivlune pinniarlungitok Gudivit perᴋojanginik attanniublo perᴋojanginik, tamna namaktomik pinniarviojuksauvok, toᴋᴋolugolonêt, nûᴋolugolonêt nunanganit, akkilêᴋolugolonêt perᴋumik, pitilugolonêt parngnanairsimavingmut.

²⁷ Nertortaule Nalegak atâtagijapta Gudingat tamattominga attannermik illumêlauktok, Gudib iglunga Jerusalemêtok ânanausijomavlugo,

²⁸ Napkiningnermiglo torartitsilauktok uvamnut attanniub sângane, attanniublo attannertuijoᴋotingita, sôngojoᴋotingitalo illunatik sângine. Maksoalaukpungalo Nalekab Gudima aggangita ᴋollangiarninginut uvamnik, kattiᴋovakkalo niaᴋôjut Israelitinit, takpaungaᴋattigellunga piᴋovlugit.