Esra 5 - Labrador Inuttitut Heritage Bible

Tempeliornerub pigannerninga nallautaijûk Hagaib Sacharjablo nallautainingit malliklugit.

¹ Nallautaijugle Haggai, Sacharjalo Iddob erninga nallautailaukpûk Israelib Gudingata attingane Judinut Judametunut Jerusalemetunullo.

² Tagva Serubabel Sealthielib erninga, Jesualo Jozadokib erninga parngnailerpuk Gudib iglunga igluliorlugo Jerusaleme, illagilugiglo Gudib nallautaijoᴋotingit nakkoksijut tapkoninga.

³ Nalliutome taipsomane Thatnaib nunab aulatinga kôb miksâne, Star Bosnailo illangillo tikkiput tapkonunga, oᴋautilugillo imâk: Kia perᴋolaukpâsse iglo manna igluliorlugo, ᴋarmangillo sannalugit?

⁴ Tagva oᴋautivavut, ᴋannok angutit iglomik ominga igluliortut atteᴋarninginik.

⁵ Gudingatalo ijingata Judit angajoᴋângit ᴋollangiarpait agviarᴋonagit tapkoninga, pijoᴋartok tamanna Dariusemut tillijaujutauᴋârtinago aglangniglo tikkitoᴋarᴋârtinago tamanna pivlugo.

⁶ Tamadsale Tatnaib nunab kôksub miksânêtub aulatingata, Star Bosnaiblo attannertuijoᴋotingitalo Afarsachemiut, kôksub miksânetut aglangita tillikliutilauktangita attannermut Dariusemut tukkingit.

⁷ Oᴋautsillo tillikliutilauktangit tapsomunga imailaukput: Attannek Dariuse ullapirsauteᴋarle illunane!

⁸ Attannek nallojungnaititaule uvagut tikkisimagapta Judit nunanganut, Gudib angijoksojub iglunganut, igluliortaujomut ujarᴋanit angijunit iktoriktunit, ikkatjello illijauvut senneranginut sullijaksarlo tamanna katsungaitomik pinnasuartauvok pivalliadlarlunelo taipkoa agganginut.

⁹ Uvagulle angajoᴋaunerôjut apperilaukpavut oᴋautilugillo: Kia perᴋolaukpâsse iglo tamna igluliorlugo, ᴋarmangillo sannalugit?

¹⁰ Apperilaukpavuttauk, kikkômangata, nallonaijaiᴋovluta tapkoninga illingnut, angutillo angajoᴋaunerôjungita attingit aglalaukpavut.

¹¹ Taipkoale oᴋautsinik imaitunik kigusiksaᴋalaukput uvaptingnut, oᴋarlutiglo: Uvagut kivgauvogut ᴋillaub nunablo Gudingangnut, iglolo tamna igloliorpavut, Jarit unnuktut mattoma sivorngane igluliortaulauktok, Israelitit attanningata illangata angijub igluliorlauktanga nappartilauktangalo.

¹² Atâtagilauktaptale ᴋillaub Gudingat ningaksarlaungmatsuk, tunnilaukpait Nebukadnezarib Babelemiut attanningata, Kaldêreôjub agganginut; tapsoma iglo tamanna serᴋomilaukpa, innugasaksuillo aularutilaukpait Babelemut.

¹³ Koresible Babelemiut attanningata Jaringita sivurlingane, attannek Korese tamna perᴋojilaukpok, Gudib iglunga tamanna igluliorlugo.

¹⁴ Illulerᴋutittauk Goldeôjut Silbereôjullo Gudib iglungane, Nebukadnezarib tigulauktangit Tempelemit Jerusalemêtomit, tikkiutilauktangillo Tempelemut Babelemêtomut, attanniub Koresib tigulaukpait Tempelemit Babelemetomit, tunnivaillo Sesbazaremik attelingmut, attanningortilauktaminut nunamut;

¹⁵ Oᴋarlunelo: Illulerᴋutit makkoa tigukit, aulârlutillo tikkiutilaitalo Tempelemut Jerusalemêtomut, Gudiblo iglunga igluliortaule innigilauktangane.

¹⁶ Tagva Sesbazar tamnautsainak tikkisimavok illijilauklunelo tungavingmik Gudib iglunganut Jerusaleme. Taimangamillo igluliorput innersimangilarlo sulle.

¹⁷ Namagijaulerpallo manna attannermut, tagva ᴋennerᴋojile attanniub pivianartotalingane Babelemêtome, taimaimangât, attannermut Koresemut perᴋojaulaungmangât Gudib iglunga Jerusaleme igluliorlugo: tillikliutjivigitigullo attanniub issumanginik tamanna pivlugo.