Esra 4 - Labrador Inuttitut Heritage Bible

Tempelib sannajauningata agviartauninga.

¹ Judakulle Benjaminekullo akkerartortingit tussaramik, parngnanairsortaumalauktut ᴋittorngangit Tempeleliormatta Nalekamut Israelib Gudinganut;

² Tikkiput Serubabelemut atâtanullo angajoᴋaunerôjunut, oᴋautivaillo: Igluliorᴋattigijomavapse, Gudise ᴋenneraptigo, illipsetut; tapsomungalo tunnergutinik tunnijivogut, Asser-Haddonib Assiriamiut attanningata, tamaungartitipta nalliuninganit.

³ Serubabelible, Jesuablo, atâtallo angajoᴋaunerôjut Israelitit akkorngane, kiovait: Namatsangilak igluliorᴋattigilugo Nalegapta iglunga, uvagutôlutale iglulioromavogut Nalekamut Israelib Gudinganut, sorlo Koresib Persiamiut attanningata perᴋolaungmattigut.

⁴ Tagva nunab innungita innugasaksuit Judakut aggangit katsungatinasuarpait, ᴋoaksartilugillo igluliortailitilugit.

⁵ Kaiᴋojivullo attannertuijunik, kajusimaninginiglo agviarput Kores Persiamiut attanningat innotillugo, Dariusib Persiamiut attanningata attanniotininga tikkilugo.

⁶ Ahasverosible attanniotiningane, attanniotiningata pigiarningane, passiklerutiksanik aglakput Judamiut, Jerusalemiullo pivlugit.

⁷ Artasastablo nalliuningane, Bislame, Mitredatelo, Tabeelo assingillo illangit aglakput Artasastamut Persiamiut attanninganut. Aglait tapkoa aglangit aglaksimalaukput Siriamiut oᴋausingit attorlugit, illijaulutiglo Siriamiut oᴋausinginut.

⁸ Rehumib attanniotitub, Simsaiblo aglakpaktub aglait tapkoa aglakpait Jerusalemiut akkerartorlugit, Artasastamut attannermut:

⁹ Uvagut: Rehume, angajoᴋaujunga, Simsailo aglakpaktok, illangitalo assingit, attannertuijut Dinamiut, Afarsachemiullo, Tatplatemiullo, Persiamiullo, Arachemiullo, Babelemiullo, Susanemiullo, Dehamiullo, Elamemiullo.

¹⁰ Innugasaksuillo assingit Asnafarib angijub, oᴋausiovaktublo tamaungartilauktangit, pitilauktangillo Samariab iglugasaksoanginut, assinginullo kôksub miksânêtunut, Kanaanemêtunullo.

¹¹ Tamadsalo aglait tapkoa tillikliutilauktangita attannermut Artasastamut tukkingit: Kivgaᴋotitit, angutit kôksub miksânêtut Kanaanemêtullo:

¹² Attannek nallojungnaititaule, Judit, illingnit takpaungarsimajut uvaptingnut Jerusalemut, iglugasaksuit pikkablâjoksôjut idluitullo, iglugasalliormagit, avaluksoangillo (ᴋarmangit) sennangmagit, tungavingillo sattortautimagit.

¹³ Taimak manna attannek nallojungnaititaule, iglugasaksuit taipkoa iglugasaliortaupatta, avaluksoangillo sattortautitaupatta, tagva Schossemik, Zollemiglo, akkiliaksaniglo Jarine tamaine tunnijiniangilat, kajusimaningallo, attanniub aksartaujutiksanganut illinganiarpok.

¹⁴ Uvagulle manna illunata najûtimagapta Tempelemik asseroilauktogut, attanniub nachogijauninga akkunênersamik takkonâromalaungilavut, tamanna pivlugo tilliklerpogut nallonaijarlugolo tamanna attannermut,

¹⁵ Atâtagijavit pijoᴋalaungningita aglangine ᴋennertoᴋarᴋovlugo, tagva nachvarniarpotit pijoᴋalauktut aglangine tapkonane, tukkisiniarlutillo, iglugasaksuit tapkoa pikkablâjoksôngmatta, idluitoksôngmattalo attannernut, nunanullo, assitiglotauk nalagungnaisarpait itsaksoarmit; tamanna pivlugo iglugasaksuit tapkoa asserortaumalaurivut.

¹⁶ Tamanna pivlugo attannek nallojungnaitipavut iglugasaksuit ukkoa iglugasaliortauniarpatta, avaluksoangillo pijarêrtauniarpatta, tagva tapkoa pivlugit kôksub miksane illangiutiviᴋarungnainiaravit.

¹⁷ Tagva attannek kigusermik tillikliutjivok Rehumemut attanniotijomut, Simsaimullo aglakpaktomut, illanginullo Samariame nunaᴋartunut, assinginullo kôksub miksânêtunut: Ullapirsaunek salutitaunerlo!

¹⁸ Aglait tillikliutilauktase uvaptingnut, sagvartome attuartaulaukput sâmne.

¹⁹ Perᴋojilaukpungalo ᴋennertoᴋarᴋovlugo. Nachvartaumavorlo, iglugasaksuit taipkoa itsaksoarnit akkerartorpalaungmatta, pikkablatoksoneᴋalaungmallo, nalagungnaineᴋadlalarmelo taipkonane.

²⁰ Taimaktauk attanneᴋalaukpok Jerusaleme pitsartujunik, attanniotilauktunik illunainut kôksub ungatânetunut, Zollemiglo Schossemiglo akkiliaksaniglo Jarine tamaine tunnitsiviolaukput.

²¹ Tagva perᴋojamik tunnijileritse manna innuit taipkoa agviartauᴋovlugit, iglugasaksuillo ukkua iglugasaliortauᴋonagit, perᴋojilerᴋârtinanga.

²² Udsertutsiaritselo katsungaᴋonase taimailiornerme attannek aksartauᴋonnago.

²³ Attanniub Artasasthab aglangit attuartaujarêrlaungmatta Rehumib, Simsaiblo aglakpaktub, attannertuijoᴋotingitalo sângine, tagva tuavilutik aularput takpaunga Jerusalemut Judinut, agviarlugillo tallermut sôngojomut.

²⁴ Tagva sullijaksak Gudib iglungane Jerusalemêtome noᴋᴋarpok, taimailingalunelo Dariusib Persiamiut attanningata Jaringita aipanga tikkilugo.