Efêsusemiunut 6 - Labrador Inuttitut Heritage Bible

Kitorngat angajoᴋâllo kivgallo kaiblartauninginik. Okpertut sorsuktuktuksatitut-ituksat sakkunginik.

¹ Ilipse sorutsit, angajoᴋâse nâleksigik Nâlekame; tamanna pijariaᴋarmat.

² Atâtallo anânallo nâlekik; tamadja perᴋojaᴋ sivorliojoᴋ, angersimanelik (imâk):

³ Kanoengitsiarᴋovlutit, akunêrtomiglo inôniarᴋovlutit nuname.

⁴ Ilipselo angajoᴋaujose, ᴋitorngase ningaᴋsarniarasigik, inugoiniarsigigle nâlektilugit, Nâlekablo oᴋausinginik ᴋaujitilugit.

⁵ Ilipse kivgaujose nâlegase nunamêtut nâleksigik, kuksasukluse sajukluselo, ômatipsigut issumalingasuerdluse, Kristuse sorlo nâleklugo;

⁶ Kivgartorneᴋ inuit takoane, inungnut idluarijaujomavluse, pinago; Kristusible kivgangititut pititse, ômamut Gûdib pijomajanga nâleklugo, ᴋunutuidluse.

⁷ Nâlekamut kivgartorasugititse, inungnu-ungitoᴋ.

⁸ Kaujimagapse, naliat kivgaujorlônêt kivgaungitorlônêt Nâlekamut akkilertaujomârmat ajungitulininga maliklugo.

⁹ Angajoᴋaujose ilipse, taimaktauᴋ (kivgase) piniarvigisigik, siluktailititselo; ᴋaujilerluselo Nâlegaᴋarmigapse ᴋilangme, tâpsomanelo inuit adsigêngitôngilat.

¹⁰ Tagvale ᴋatangutikka nakoᴋsitiniaritse Nâlekame, ajugaᴋangitub pitsartuninganut.

¹¹ Gûdib saputjiniksanga atiniarsiuk, Sâtanasib pingitsertortub uivêriklerninginut sôngoᴋovluse.

¹² Uviningmullo aungmullo sorsugiaᴋanginapta, ataniviksoarnulle pitsartujoᴋsoarnullo, silaᴋsûb ataninginut, silaᴋsûb mattoma tâᴋtôningane ataniotijunut, anernernut ajortunut ᴋilaub atânêtunut.

¹³ Tamanna pivlugo Gûdib saputjiniksanga tiguniarsiuk, ajugauᴋovluse uvloᴋ ajortoᴋ neliutikpat aulatausuerdluse, tamaitalo nâmaksilugit salaᴋainarᴋovluse.

¹⁴ Tagva makitipsigut tapserusijaritse mikseᴋârnermik, idluarnerlo atimavlugo, sagvingmiutarivlugo.

¹⁵ Itigapsigullo kamiksimatitse, oᴋautsit tussarnertut ullapirsainartut oᴋâlatigivlugit opalungairsimavluse.

¹⁶ Tamainille piluardluse okperneᴋ tiguniarsiuk sapulutarivlugo, ajortoᴋsûb (Sâtanasib) ᴋargjunginik ikomalingnik ᴋamitsijungnarᴋovluse tamattomunga.

¹⁷ Niaᴋôtiksaᴋaritselo piulijaunermik, saviksoaᴋarluselo Anernerub pinganik, tamadja Gûdib oᴋausinganik.

¹⁸ Tuksiatsainaritse ilûnainik pijarialingnik, anernikut tuksiarluse ᴋenuluselo; taimailiorᴋovluse sorairase pigârmititse tamât, ivsornaitut tamaita tuksiulugit;

¹⁹ Uvangatauᴋ pivlunga, tunitsivioᴋovlunga oᴋâlanermik sivôrananga ᴋanera angmarlugo, oᴋautsit tussarnertut nelonarningat oᴋautigivlugo;

²⁰ (Tamattomunga kivgauvunga ᴋelaumgujanêtunga) erᴋsinanga tamattominga oᴋâlaᴋovlunga, sorlo pijuksaugama.

²¹ Ilipsetauᴋ ᴋaujilerᴋovluse ilinganimnik suliamniglo, Tiᴋikusib ᴋatangutib erdlingnartub, Nâlekamelo nertornartomik kivgartortub, unipkautiniarpâse tamainik.

²² Tamanna pivlugo tililauᴋpara ilipsingnut, tussarᴋojomavluse ilinganimnik, tâmnalo ômatipsingnik manigoiᴋovlugo.

²³ Ullapirsauteᴋarlit ᴋatangutigêt, naglingneᴋarlutiglo okperneᴋarlit Gûdemit Atâtamit, Nâlekamillo Jêsuse Kristusemit.

²⁴ Saimarsauteᴋarlit ilûnatik Nâlegaptingnik Jêsuse Kristusemik naglingniktut ilungertorlutik. Amen. Rômame makkoa aglaktaumavut Efesusemiunut. Tikikusib naksalauᴋpait.