Efêsusemiunut 5 - Labrador Inuttitut Heritage Bible

Kaiblainernik arvertatsiarᴋojijunik. Nuliarêt ilingajuksauninginik ᴋanoᴋ.

¹ Tagva mâna Gûdemik malikteoleritse ᴋitorngatitut naglingnartutit.

² Naglingnermelo arvertaritse, sorlotauᴋ Kristusib nagligilaungmatigut, ingminiglo tunilaungmat pivluta, tunergutiksaujomavlune toᴋotaksamik, Gûdemut tipitsiariksautiksamik.

³ Assiniarnermigle maᴋojungnartullo nalênik, pijomatudlarnermiglo oᴋautauniarase, ivjornaitut taimâk pijariaᴋarmatta.

⁴ Sumiglônêt oᴋauseluâlungmik, ᴋuksalainermiglo mitautiksanermiglo oᴋauseᴋarasetauᴋ; idluijutaungmatta, ᴋujalingârlusele pititse.

⁵ Kaujimagapsiuk tamanna, assiniartoᴋ, maᴋojungnartulijorlênêt, pijomatudlartortorlônêt (Gûdeungitunut kivgartortorteogame) Kristusiblo Gûdiblo nâlegauvinganik kingormgujijuksaungimatta.

⁶ Naliata oᴋausinginut piungitunut uivêrijauniarase: taimaitut pivlugit okpinginerub ᴋitornganginut Gûdib ningausinga pingmat.

⁷ Tamanna pivlugo illagijaksaringilase.

⁸ Mattoma sivorngane târmiolaurapse, mânale ᴋaumaniovose Nâlekame.

⁹ Arvertaritse ᴋaumajub ᴋitorngangititut. Anernerub perortitangit tamadsa: Sunatuinarnik ajungituliniarneᴋ, idluarnerlo, mikseᴋârnerlo.

¹⁰ Kiglisiniaritselo, suna idluarijaungmangât Nâlekamut.

¹¹ Tâᴋtublo pingit suksaungitut ilangiutiviginiarasigik, sugiangârsigigle.

¹² Sagvangitome piniartangit taivlugit aglât kangunadlarpoᴋ.

¹³ Tamakkoale tamaita sakᴋerniarput pidlartaukpatta ᴋaumajomut. Sakᴋersimajut tamaita ᴋaumangmatta.

¹⁴ Taimaimat oᴋarpoᴋ: Tupalerit siniktotit, makilutillo toᴋungajunit, tagva Kristusib ᴋaumarsarniarpâtit.

¹⁵ Tagva mâna kamatsiaritse arvertarnipsingnik, silaitutitut pinase: silatujutitulle pititse.

¹⁶ Atutsiarlugolo nelliutoᴋ, (angijomik) ajormatta uvlut.

¹⁷ Tamanna pivlugo silairgotoniarase, tukkisilerlusele Nâlekab pijomajanganik.

¹⁸ Tallaniaraselo vainetornermut; tamanna idluangilutaungmat, Anernermigle ilumertauleritse;

¹⁹ Oᴋaᴋatigêngniaritselo imgerutinut nertordlerutiksanut tuksiarutsinullo anernilingnut, imgerdluselo nipjausijaritse Nâlekamut ômatipsingne.

²⁰ Tamaitalo ᴋujalijutiginiarsigik sorairase Gûdemut Atâtamullo, Nâlegapta Jêsusib Kristusib attingane.

²¹ Nâlektigêgitselo Gûde sivôragilugo.

²² Arnat okoᴋse! uise nâleksigik, sorlo Nâlegaᴋ.

²³ Arnab uine niaᴋoringmago, sorlotauᴋ illagêt Kristuse niaᴋoringmatsuk; tâmna piuliklertiogivoᴋ timiminut.

²⁴ Sorlole illagêt Kristuse nâlegaringmatsuk, taimaktauᴋ arnat uitik nâlegaksarivait ilûnainik.

²⁵ Ilipse angutit, nuliase nagligisigik, sorlo Kristusib illagêt nagligilaungmagit, ingminglo tunivlune tâpkoa pivlugit,

²⁶ Ajorungnaititsomavlugit, epᴋêjalaungmagit ubvaumut (imiojomut) oᴋautsemik illalingmut.

²⁷ Ingminut pititsomavlugit illagêt ânanaujut, ivsornartoᴋangitut, imulloᴋangitullo, taimaitomiglônêt assianik peᴋangitut, ivsornaiᴋovlugille pidlaraksausuerlutik.

²⁸ Taimaktauᴋ angutit nuliatik nagligijaksarivait, sorlo timitik nangminitik. Nuliaminik naglingniktoᴋ, nangminerminik naglikpoᴋ.

²⁹ Uvingminik nangminerminik ômisuktoᴋalauᴋsimatsangimat, nerritilugolo pairivâ, sorlotauᴋ Nâlekab illagêt pairingmagit.

³⁰ Tâpsoma timingata avatigingmatigut, uvininganit sauninganillo pijogut.

³¹ Taimaimat angutib atâtanelo anânanelo ᴋemangniarpak, nuliane ungagivlugo, tâpkoalo magguk uvinioniarpuk atautsemik.

³² Nalonartoᴋ tamanna angijôvoᴋ: Kristusele illagêllo oᴋautigivakka.

³³ Ilipsetauᴋ, ilûnase atunit, angutib nuliane nagligiliuk ingmitut. Uiliuble uine atanerilugo pile.