Efêsusemiunut 4 - Labrador Inuttitut Heritage Bible

Paulusib kaiblarpait atausioᴋovlugit naglingnerme arvertarᴋovlugillo inôsertâme.

¹ Tagva mâna kaiblarpapse, uvanga ᴋelaksugaujunga Nâlegaᴋ pivlugo, ᴋaiᴋojaumanise malitsiarlugo arvertarᴋovluse, taimak ᴋaiᴋojaugapse,

² Piojorijuiluse tamât, ᴋenuêluselo kamangitsertorluselo, ningarijigêktailititselo naglingnerme.

³ Omarigitselo adsigêktomik issumaᴋatsainarluse anernikut, ullapirsautib ᴋelaksûtânut.

⁴ Time atauseᴋ, anerneᴋ atauseᴋ, sorlotauᴋ ᴋaiᴋojaumagapse nerriugijaksaᴋarluse atautsemik ᴋaiᴋojaumanipsingnut.

⁵ Nâlegaᴋ atauseᴋ, okperneᴋ atauseᴋ, baptijut atauseᴋ,

⁶ Gûde atauseᴋ, Atâtagijavullo tamapta, tamainut tâmna Nâlegaujoᴋ, ilunapsigullo, ilupsingnêtorlo tamapse.

⁷ Ilûnatale atunit saimarsaumik tunitsiviovogut Kristusib tunijinermine ôktûtigijanga maliklugo.

⁸ Taimaimat oᴋauseᴋarpoᴋ: Kotsingnermut ᴋongmuartub parngnanairutjaujut aularutivait parngnanairsorlugit, inungnullo tunergutinik tunijivlune.

⁹ Kongmuartorle oᴋautigijaungmat, ᴋanoᴋ tukkekarᴋâ? Imâk: Sivorngagut aᴋᴋalaurametauᴋ nunab ininginut akpasiktunut.

¹⁰ Aᴋᴋalauᴋtoᴋ taimnaugivoᴋ ᴋongmualauᴋtoᴋ ᴋilait ilûnatik ᴋollerpânginut, tamaita ilumertitsomavlugit.

¹¹ Tâpsomalo illangit Apostelingortilauᴋpait, illangille nelautaijungortilauᴋpait, illangit oᴋautsinik tussarnertunik oᴋâlajungortilugit, illangit pairsijungortilugit, ajoᴋertuijungortilauᴋpaillo.

¹² Ivjornaitut nâmaktungortitauᴋovlugit kivgartûtiksaᴋ sulairijungnarlugo, Kristusib timiksanga âᴋiktauvalliaᴋovlugo;

¹³ Ilûnata tikitsiariluta okpernermut atautsemut illitarsinermullo Gûdib erninganik, angutemariolerdluta Kristusib aglisimaringninga tikidlugo.

¹⁴ Sorusiojungnairᴋovluta, maliktitut aulatauᴋonata anoremut, tagva ajoᴋertûtsinut sunatuinarnut, inuit nalangaininginut uivêriklerninginullo, pingitsertorlutik tamartinasuarmatigut.

¹⁵ Uvagulle naglingnerme nalâgôrniarta, aglivalliavlutale ilûnaine tâpsomunga niaᴋôjomut, tagva Kristusemut.

¹⁶ Tâpsomangat time iluitoᴋ katisimavoᴋ, navgoallo ilûnatik ingmingnut nablisimavut, ikajortigêngnermut; avatillo ilûnatik ingmikôrlutik atornermingnut time aglivalliatipât idluarsarlugo; naglingnermelo tamakkoa tamaita pivut.

¹⁷ Tamanna pivlugo oᴋarpunga; kigligiutigivlugolo Nâlekame, arvertarungnairᴋovluse nalojutitut assipsitut, piungitunik issumaᴋarlutik arvertartutitut;

¹⁸ Tarningit tâᴋtoᴋsôvut, inôtsemullo Gûdemit pijomut takorngartautitauvut, nalojoᴋsônermut ilumingnêtomut, ômatimiglo sitijoᴋsôninginut.

¹⁹ Taipkoa ikpigijungnangitut ingmingnik tunivut ajortulinermut, maᴋojungnartuniglo sunatuinarnik piniarlutik angijomik, pijomatudlarlutiglo.

²⁰ Ilipse taimâk ajoᴋertortaungilase Kristusemik.

²¹ Tâpsominga tussarluse tâpsomanelo ajoᴋertortaujomavluse pilaurupse: tagva, sorlo mikseᴋârneᴋ Jêsusemêngmat,

²² Inutoᴋaᴋ atorungnairsiuk piusiovalauᴋtut allarlugit, ikligunermut ingminik asseroijoᴋ tamarnartomut.

²³ Nutângoleritsele issumapse anerningagut;

²⁴ Inuktârlo atiniarsiuk, Gûde adsilivlugo pingortisimajoᴋ idluarnerme, ajunginermelo, ivsornainermelo.

²⁵ Taimaimat sagluneᴋ iperarlugo mikseᴋârnermik oᴋauseᴋaritse, ilûnase atunit inuᴋatipsingnut; avatauᴋatigêkapta.

²⁶ Ningarluse idluituliniarase; seᴋineᴋ nipitsiarinago ningartiluse!

²⁷ Sâtanaselo iniksaᴋalertiniarnago.

²⁸ Tiglilauᴋtoᴋ tigligungnairle, sanalunele aggangminut ajungitomik piniarle, tunijaksaᴋarᴋovlugo ajoᴋsartunut.

²⁹ Oᴋausilungmik ᴋanipsigut anitsitailileritse, idluartomigle oᴋauseᴋarniaritse âᴋiksûtiksamik pijariaᴋartune, tussartune tussarominartomik.

³⁰ Gûdiblo Anerninga ajungineᴋ kiksartiniarasiuk, tâpsominga naᴋititsiviomagapse uvlormut piulijauviksamut.

³¹ Kaningaumajârneᴋ, ômisungnerlo, ningarnerlo, nipliadlarnerlo mitauteᴋarnerlo tamât ilipsingnit ungasiktisigik, idluitulinerillo tamaita.

³² Inôtsiaritsele illanârêkluse nâpkigosukluselo, issumagijungnaitigêgitselo, sorlotauᴋ Gûdib issumagijungnaivigilaungmase Kristuseme.