Efêsusemiunut 3 - Labrador Inuttitut Heritage Bible

Paulusib nalojunik kivgartorveᴋarningata ânanaudlarninganik. Tuksiarutjininganik illagêktunik.

¹ Tamanna pivlugo uvanga Pauluse ᴋelaksugaujunga, Kristusib Jêsusib kivgaringmanga ilipse nalojose pivlugit.

² Sorlo tussaumagapse kivgartornermik Gûdib saimarsautânik, tunijaumajomik uvamnut pivluse;

³ Takotitjutikut nalojungnaititaugama nalonalauᴋtomik ipsominga, (sorlo sivorngagut oᴋautsinut ikitunut aglalaurama.

⁴ Tâpkonangat, atuarupsigik, ᴋaujijungnarpose nalojungnainimnik nalonartomik Kristuse pivlugo),

⁵ Tamanna itsaᴋ ᴋaujijautitaulaungilaᴋ inûb ᴋitornganginut, sorlo nalonairsimangmat mâna Apostelinginut nalautaijoᴋotinginullo ivjornaitunut Anernikut;

⁶ Tamadja, nalojut kingormgujeᴋataungmatta timeᴋataularmiglo, illangiuteᴋataularmiglo angersimaninganik Kristuseme, oᴋautsitigut tussarnertutigut,

⁷ Tamakkonunga kivgaliarimavunga Gûdib saimarsautânut tunergusiamnut; ajugaᴋangininganut pitsartuniliksoarmut tamattominga tunitsiviogama.

⁸ Uvanga ivjornaitunit tamainit mingnerpângojunga, saimarsaumik tamattominga tunitsiviovunga, nalojunut oᴋâlaᴋovlunga Kristusib akluininganik inornartomik;

⁹ Tamaitalo illitarsitiniarlugit nalonalauᴋtub ilinganinganik, silaᴋsûb pigiarninganit ijersimajomik Gûdeme, tamaitaᴋsoarnik Jêsuse Kristusikut pingortitsijome;

¹⁰ Mânaulermat illagêktutigut Gûdib sunatuinarne silatuninga ᴋaujijautitauᴋovlugo nâlegaunersoarnut ataniotinersoarnullo ᴋilangmiunut,

¹¹ Taimâk issumasilaungmat issoᴋangitomit Kristuseme Jêsuseme Nâlegaptingne.

¹² Tâpsomûna sivôranata apᴋotiksaᴋarapta tatiksaᴋalaptalo, okpernermut tâpsomunga.

¹³ Taimaimat inaksorpapse; merngortorniarase siorniortitaunimnik, pivluse pijamnik, tamanna nertornautigivase.

¹⁴ Tamanna pivlugo Nâlegapta Jêsusib Kristusib Atâtanga sêrᴋortorvigivara,

¹⁵ Atâtaujotôjoᴋ tamainut ᴋitornganik taijaujunut ᴋilangmelo nunamelo.

¹⁶ Tâpsomunga tunitsivioᴋovluse pitsartunermik ânanauningata amigangidlarninga maliklugo, sangijôtitauvluse Anerninganut ilupsigut,

¹⁷ Okpernermut Kristuse ineᴋarᴋovlugo ômatipsingne, amâtsiortaulerᴋovluselo tunganilijaulerᴋovluselo naglingnerme;

¹⁸ Ivsornaitut tamaita illagilugit illitarsijungnarᴋovluse silingnermik, takinermiglo, itinermiglo kingingnermiglo;

¹⁹ Illitarsilerᴋovluselo Kristusib naglingninganik illisimanernit tamainit anginerpângojomik; ilumertaulerᴋovluse Gûdib pitaᴋaloringninginik tamainik.

²⁰ Ajugaᴋangitorle piniarlune anginerpângojomik tamainit tuksiarniptingnit tukkisiniptingnillônêt, pitsartunermut iluptingne senajomut,

²¹ Tâmna sorairatik illagêktut Kristuse Jêsusemêtut nertorlitsuk issoᴋangitomit issoᴋangitomut! Amen.