Efêsusemiunut 2 - Labrador Inuttitut Heritage Bible

Paulusib erᴋaitipait ilinganinganik sivorngane piloringnalaungitomik, mânale piloringnadlartomik.

¹ Ilipsetauk toᴋungatiluse tapatonermullo idluitulinermullo;

² Tamakkoa atorlugit mattoma sivorngagut silaᴋsûb tamattoma ilusingit malilauᴋpase, ataneᴋ silame ataniotijoᴋ nâleklugo, tagva anerneᴋ naliutome tamattomane okpinginerub ᴋitorngangine piniarveᴋartoᴋ.

³ Tâpkoa akorngane uvaguttauᴋ mattoma sivorngagut taimailaurivogut ilûnata, uvinipta ikliguningit maliklugit, uvingublo pijomajanga erᴋarsautingillo nâleklugit; ingergaptalo ningautsib ᴋitorngarilauᴋpâtiguttauᴋ assiptitut.

⁴ Gûdible nâpkininingnermik akluitub naglingnersoarminut nagligilauramitigut,

⁵ Ajorniptingne toᴋungalaurapta, ômartilauᴋpâtigut Kristuse illagilugo, (saimanermut piulijaumagapse),

⁶ Illagivlugo tupaktilauᴋpâtiguttauᴋ, illagivlugolo ᴋilaub pinginut pitidluta Kristuse Jêsuseme.

⁷ Naliutuksame pijomârtome sakᴋertitsomavlugo saimarsautime naleᴋangitub amigangininga, uvaptingnut ajungitulinerminut Kristuseme Jêsuseme.

⁸ Saimanermut piulijaumagapse okpernikut; ilipsingnik taimaingilase, Gûdible tunergutâ tamanna.

⁹ Piniarnermui-ungitoᴋ, nertôtijoᴋarᴋonago.

¹⁰ Sanamajigigaptigo, pingortitauvluta Kristuse Jêsuseme ajungitulerᴋovluta, Gûdib sivorngagut âᴋiksulaungmatigut, taimailiorᴋovluta.

¹¹ Taimaimat erᴋainiaritse, ilipse mattoma sivorngagut nalojôlaurapse uvinikut, kipimangitunik taijaumavluse ipkonunga taijaujunut kipimajunik uvinikut, aggangnut.

¹² Ilipse taipsomane Kristuseᴋangitose takorngartauvluselo Israêlib illagêngninganut, takorngartaungmivluse Testamentinut angerutilingnut: nerriugijaksaᴋarase Gûdeᴋaraselo silaᴋsoarmêlauᴋtose;

¹³ Mânale ilipse Kristuse Jêsusemêtose, sivorngane ungasiktomêlauᴋtose, ᴋanilerpose Kristusib aungagut.

¹⁴ Tâmna ullapirsautigigaptigo, tamarmik atausingortilaungmagik, upko agviarutaujoᴋ serᴋomidlugo, uviningminut ningarosungneᴋ atorungnaitingmago;

¹⁵ Tamadja, perᴋojat pêrlugit iluserᴋortoᴋojijut; ingmine tâpkoa magguk inuktângordlugik atautsemik, ullapirsailunelo.

¹⁶ Tamarmiglo saningajolikut ullapᴋoserdlugik Gûdemut timiotilugik atautsemik, ningarosungnerlo toᴋotinamiuk ingmigut.

¹⁷ Tikisimagivoᴋ, oᴋautsinut tussarnertunut ullapirsaumik oᴋâlavlune ilipsingnut, ungasiktomêlauᴋtose, ᴋanitomêlauᴋtunullo.

¹⁸ Tâpsomûna tamapta apᴋotiksaᴋarapta Atâtamut anernerme atautseme.

¹⁹ Mâna tujormiangojungnailuselo takorngartaujungnairpose, ivjornaitulle kinguvânguᴋatigivâse, Gûdiblo iglungane iglomioᴋatauvluse;

²⁰ Igloliangomavluse Apostelillo nalautaijullo tungavigijanganut; tamattomunga Jêsuse Kristuse ujarauvoᴋ terreᴋôvlune;

²¹ Tâpsomunga sinamajoᴋ ilûnât katitaumavoᴋ, aglivalliavlune igloᴋsoangolerlune ivsornaitomik Nâlekame;

²² Tâpsomane ilipsetauᴋ igloliangoᴋataulerpose, Gûdemut igluksauᴋovluse anernerme.