Efêsusemiunut 1 - Labrador Inuttitut Heritage Bible

Gudib ᴋaitanginik saimanartoᴋsoarnik Kristusikut. Aglisivalliaᴋojaunermik tamakkoa atorlugit.

¹ Pauluse, Jêsusib Kristusib Apostelinga, Gûdib pijomajanganut, ivjornaitunut Efêsusemêtunut, okpertunullo Kristuse Jêsusemut.

² Gûdib Atâtapta, Nâlekablo Jêsusib Kristusib saimarsautingata ullapirsautingatalo illagilisetôᴋ!

³ Nertortaule Gûde Nâlegaptalo Jêsusib Kristusib Atâtanga, saimausermatigut anernilingnut saimanartunut sunatuinarnut, ᴋilaub pinginik illangiutitiluta Kristuseme.

⁴ Sorlo taipsomûna (Kristusikut) anerilaungmatigut, silaᴋsoaᴋ tunganilijauᴋârtinago, ivjornaiᴋovluta pidlaraksauᴋonatalo sângane naglingnerme.

⁵ Issumasimagame ᴋitorngautitsomavluta ingminut, Jêsuse Kristusikut, taimâk ᴋuviagijaminut pijomagame,

⁶ Saimarsautine ânanaujoᴋ nertortauᴋovlugo, tamattomunga ᴋuviagijautingmatigut erdlingnartome.

⁷ Tâpsomane piulijauviksaᴋarapta aunganut, tamadja ajornernit issumagijaujungnainermik, saimarsaumik akluiningagut;

⁸ Tamattominga angijomik pititaujogut sunatuinarnik illisimatitauvluta silatutitauvlutalo.

⁹ Kaujitilaungmatigut pijomajame nalonarninganik, ᴋuviagijaminut, taimâk issumasimagame,

¹⁰ Naliutikpatta uvlut oᴋautigijauᴋovlugo, tamaita ᴋilangmêtullo nunamêtullo atautsemut niaᴋomut katititsomavlugit Kristuseme, tâpsomuna nangmineᴋ;

¹¹ Tâpsomûna uvaguttauᴋ kingormgujijuksautitauvogut, sivorngagut anerimajogut issumasimaninganut, tamaitaᴋsoarnik piniartub pijomajame issumasimaninga maliklugo;

¹² Tâpsoma ânanaunersoangata nitornarninganut ilingaᴋovluta; uvagut Kristusemik sivorngagut nerriuktogut.

¹³ Tâpsomûna ilipsetauᴋ oᴋauseᴋ mikseᴋârtoᴋ tussaumagapsiuk, tamadja oᴋautsit tussarnertut piulijauviksapsingnik; tâpsomûnatauᴋ okpilerapse, Anernermik ajunginermik angerutaumajomik naᴋititsiviovose.

¹⁴ Tâmna kingormgutijaksaptingnut nalunaikutarivavut, inuᴋotingita piulijauviksangat tikidlugo, ânanauninga nertortauᴋovlugo.

¹⁵ Tamanna pivlugo uvangatauᴋ, tussaumagama okpernermik ilipsingnêtomik Nâlekamut Jêsusemut, naglingnipsingniglo ivjornaitunut tamainut;

¹⁶ Soraingilanga (Gûde) ᴋujagivlugo pivluse erᴋaumavluselo tuksiarnimne;

¹⁷ Nâlegapta Jêsusib Kristusib Gûdinganut, ânanaunerub Atâtanganut, tunitjivioᴋovluse Anernermik illisimanartomik nalonaititsijomiglo, tâmna (Kristuse) illitaritsiarlugo.

¹⁸ Illisimanipsigut ijeᴋartitauᴋovluse ᴋaumarsarsimajunik, nelojungnairᴋovluse ᴋaiᴋojaumajut nerriugijaksanginik, kingormgutijaksaniglo ânanaudlartunik akluiniliksôjunik ivjornaitune,

¹⁹ Pitsartuningatalo angininganik naleᴋangitomik uvaptingne okpertune, pitsartuninga tungavigivlugo.

²⁰ Tamanna piniutigilauᴋpâ Kristuseme, tupaktinamiuk toᴋungajunit, talerpingminelo iksivatidlugo ᴋilangme.

²¹ Anginersangordlugo nâlegaunernit tamainit, sôngonernillo, pitsartunernillo, ataniotinernillo, tamainillo taijaujungnartunit, silaᴋsoarme tamattomane kissianeungitoᴋ, pijomârtomeletauᴋ.

²² Tamaitaᴋsuillo tâpsoma itigangita atânnut pitilauᴋpait, tamainelo niaᴋôtilauᴋpâ illagênut,

²³ Tagva timinganut, ilumersimajomut tâpsominga, tamainik tamaine ilumertitsijomik.