Ebrêerinut 9 - Labrador Inuttitut Heritage Bible

Kristusib aunga tunergutaujoᴋ ajunginersauvoᴋ Testamentetoᴋame tunergutaulauᴋtunit tamainit.

¹ Testamenteme sivorlerme perᴋojaᴋalauralloarpoᴋtauᴋ kivgartorneᴋ Gûdemik, ivsornaitoviglo takuksaujoᴋ pivlugik.

² Tagvane tupiub pârdlinga nappartitaulermat, nennergoaᴋar vilo, sâlo, ᴋaᴋᴋôjallo takonâraksat taᴋamanêlauᴋput; tamanna ivsornaitovingmik taijauvoᴋ.

³ Tupiuble illanga, upkub aipangata ungatânêtoᴋ, ivsornainerpâmik taijauvoᴋ.

⁴ Tagvanêlauᴋpuk iluleᴋut isserluanititsivik goldeojoᴋ, iklerviglo kigligiutjineᴋtalik, ilûnane ᴋallersimajoᴋ goldemik; mattoma iluane iluleᴋuteᴋalauᴋpoᴋ goldemik, Mannanik pitalingmik, Aroniblo ajaupianganik nutaijoᴋtalilauᴋtomik, ujarᴋangniglo sâtungnik, angersimanerub aglaksimavîgingnik.

⁵ Tamattoma ᴋânganêpuk ânanaunerub Kêrubingoâgik; tâpkoa tâdlêvuk iksivautamik saimarvigijauvingmik; tamakkoa mâna ingmigôlingatilugit oᴋautaujariaᴋangilat.

⁶ Tamakkoa tagva taimailingatitaungmatta, ajoᴋertuijut ᴋaut tamât itilauᴋput tupiub pârdlinganut, (ivsornaitovingmut,) kivgartornerlo Gûdemik piniarlugo.

⁷ Aipânulle (ivsornainerpâmut) ajoᴋertuinerôjoᴋ kissime atausiardlune jâreme itilauᴋpoᴋ, aungmik neksarlune kissiane, tunergutiksaujomik nangminine, inuillo tamarᴋattarningit pivlugit.

⁸ Tamattomunga Anerneᴋ ajungineᴋ nelonairtitsivoᴋ, apᴋotiksaᴋ ivsornaitovingmut saᴋᴋijârsimangimat sulle, tupeᴋ sivorleᴋ atortilugo.

⁹ Tamanna adsigêgutiksaulaungmat taipsomane; tagvane tunijingmatta tunergutinik toᴋotaksaniglo, Gûdemiglo kivgartortub issumanga tamakkoa nâmaksitilugo ajorpât.

¹⁰ Taimaitut nerᴋiksarlo, imiksarlo ubvarnerillo sunatuinait, ivjornailijutiksallo uvinikut ilusioᴋojaulauᴋput, âᴋiksortauviat neliutitsiarivlugo.

¹¹ Kristusele tikipoᴋ ajoᴋertuinerôlerdlune perᴋutinik pijomârtunik, tupikut ômangat anginersaujokut nâmaksinersaujokullo, aggangnut senamangitokut, imaipoᴋ, mattotunaᴋ nappartisimangitokut;

¹² Angusalublônêt nochaublônêt aunginut pingminane, aungminulle nangminerminut atausiardlune ivsornaitovingmut iterpoᴋ, issoᴋarniangitomik piulijauviksamik piniarutjilune.

¹³ Tuktuvaillo saukallo aungita, argjallo tuktuvangmit inungnut ivjornartunut serparsautaujut, ivsornaitikpatigik timit epᴋêjarlugit,

¹⁴ Anginersavaksôjomik tagva Kristusib aungata (ivsornartoᴋarane ingminik Gûdemut tunigame, Anerneᴋ ajungineᴋ issoᴋangitoᴋ pitsartutigilugo) epᴋêjarpait issumavut piniarnernit toᴋonartunit, Gûdemik ômajomik kivgartorᴋovluta.

¹⁵ Tamanna pivlugotauᴋ Testamentetâmik pijitserteovoᴋ, ᴋaiᴋojaumajut perᴋovlugit kingormgutijaksamik nunguniangitomik angerutaumajomik, toᴋonermut piulijaujutiksamut ajornernit Testamentib sivorliub neliuningane pijunit.

¹⁶ Testamenteᴋartune, Testamentemik perᴋojijoᴋ toᴋoᴋârlune pijariaᴋarmat.

¹⁷ Testamentib angerutinga atulermat toᴋub kingorngane kissiane; atungilaᴋ, Testamentemik perᴋojijoᴋ inôtilugo.

¹⁸ Tamanna pivlugo (Testamente) sivorleᴋtauᴋ, (Testamentetoᴋaᴋ,) aungmik najorteᴋarane atorᴋojaungilaᴋ.

¹⁹ Môsesib perᴋojat perᴋojijut tamaita atuarêramigit inungnut ilûnainut, nochaublo angusallublo aunginik tigusilerpoᴋ, imermiglo, merᴋuniglo aupaluktanik, serᴋerautimiglo tamakkonungalo aglait inuillo tamaita serparsarpait;

²⁰ Oᴋarlunelo: Tagva Testamentib aunga, tamattominga Gûde perᴋojingmat ilipsingnut.

²¹ Taimaktauᴋ tupeᴋ perᴋutillo tamaita atortaujut Gûde kivgartorlugo aungmut tamattomunga serparsarpait.

²² Ilûnakasatiglo epᴋêjartaulerput aungmut, perᴋojat maliklugit. Aublo kovijauninganut kissianut issumagijaujungnaineᴋarpoᴋ.

²³ Taimaimat ᴋilangmêtunut adsigêgutaujut epᴋêjartaujariaᴋalauᴋput tamakkutigûna; ᴋilangmêtulle nangmineᴋ tunergutinik, tamakkonangat anginersaujunik, pijariaᴋarput.

²⁴ Kristuse itingimat ivsornaitovingmut aggangnut senamajomut, (taimna mikseᴋârtomut, ᴋilangmêtomut adsigêgutiksaᴋ,) ᴋilangmulle iterpoᴋ, pivluta saᴋᴋeromavlune Gûdib kênangata sângane.

²⁵ Amalo: Itingilaᴋ, unuktoertorlune ingminik tunivlune, ajoᴋertuinerôjotut taipsotunaᴋ jârit tamaita iterpaktotut ivsornaitovingmut, aungme assianik neksarlune.

²⁶ Taimaikune âniatitauᴋattarajalauᴋpoᴋ silaᴋsûb pigiarninganit. Mânale silaᴋsûb naggatâne atausiardlune saᴋᴋerpoᴋ, ajornerit pêjariartorlugit, ingminik tunivlune.

²⁷ Sorlolo inuit toᴋojariaᴋarmatta atausiardlutik, kingorngagulle erᴋartuiveᴋaromârmat,

²⁸ Taimaktauᴋ Kristuse atausiardlune tunergutautitaumavoᴋ unuktoᴋsuit idluituliningit pêjarlugit. Aipânigle saᴋᴋeromârpoᴋ ajortolionane neriuktunut tâpsominga, piulijaujutiksauvlune.