Ebrêerinut 8 - Labrador Inuttitut Heritage Bible

Aronib ajoᴋertuinerôninga (Testamentetoᴋaᴋ) sorairpoᴋ, Jêsuse mâna ajoᴋertuinerôngmat ᴋilangme Atâtab talerpiane.

¹ Okautigijavut tagva katidlugit imaiput: Taimaitomik ajoᴋertuinerôjoᴋarpogut, iksivajomik Nâlegaviksûb iksivautaᴋsoangane, talerpiata tungâne ᴋilangme;

² Tâmnalo kivgartortiovoᴋ ivsornaitoviub pinginik, tupermiglo mikkseᴋârtomik Gûdib nappartitanganik inûbleungitoᴋ.

³ Ajoᴋertuinerôjulle atunit perᴋojauvut tunerguserᴋovlugit piliutinik tunergutiniglo; taimaimat tâmnatauᴋ piksaᴋartuksauvoᴋ, tunerguserungnarᴋovlugo.

⁴ Nunamêkunele ajoᴋertuijônajangilaᴋ; ajoᴋertuijut tagvanêngmatta, tunergusertut perᴋojat maliklugit.

⁵ Tâpkoa ᴋilaub pingita adsiluanginik tachanginiglo kivgartorput; imâk Môsese Gûdemut ajoᴋertortaulermat tupeᴋ inneraksaringmago: Kamatsialerit, oᴋarpoᴋ, senaᴋovlutit tâpkoninga ôktûte unertutaujoᴋ ilingnut ᴋaᴋᴋame maliklugo.

⁶ Mânale ânanaunersamik piniaraksarsivoᴋ, Testamentemut (angeᴋatigêngnermut) ajunginersamut pijitserteogame, angersimanermik anginersamik tungavilingmut.

⁷ Sivorleᴋ taimna âᴋijariaᴋalaungipat, assia iniksarsiortaunajangilaᴋ.

⁸ Patsitigingmagit oᴋarlunelo: Ahâᴋ, uvlut neliutijomârput, Nâlegaᴋ oᴋarpoᴋ, tagva Israêlikut Jûdakullo Testamentitângortitsivigijomavakka;

⁹ Testamentitut taipsotunaungitoᴋ angerutigilauᴋtaptut angajoᴋânginut, uvlorme taipsomane, aggangit tigulaurapkit aulartilugit nunamit Egiptenemit. Testamentimne soᴋosijuilaungimatta, kamagijomalaungilakkatauᴋ, Nâlegaᴋ oᴋarpoᴋ.

¹⁰ Tamadja Testamentiga (angerutiga) Israêlikunut uvlut tamakkoa kingorngatigut pijomârtara, Nâlegaᴋ oᴋarpoᴋ: Perᴋojakka issumanginut pititsomavakka, ômatinginullo aglagomavakka; taipkonungalo Gûdiojomavlunga, inuᴋotigijomârivakka.

¹¹ Neliatalo inuᴋatine ᴋatangutinelônêt ajoᴋertoriaᴋaromângilâ, oᴋarlunelo: Nâlegaᴋ illitariniaruk! Ilûnatik illitarijomârmanga mikinerpâmit anginerpâᴋ tikidlugo.

¹² Nâpkigijomagapkit idluituliningit ajorningillo pivlugit, idluituliningillo issumagijomairpakka.

¹³ Oᴋarlunele: Nutâmik, sivorleᴋ nutaujungnairtipâ. Nutaungitorle pitoᴋaujorlo ᴋanilerpoᴋ nungutauvingminut.