Ebrêerinut 7 - Labrador Inuttitut Heritage Bible

Melᴋisêdeglo Kristuselo.

¹ Melᴋisedegle tâmna ataniviolauᴋpoᴋ Sâlememe, Gûdib ᴋotsingnerpângojub ajoᴋertuijoᴋotinga; tâpsoma Abraha pagreartorpâ, utermat ataniviksuit sorsungninginit, saimaupâlo.

² Tâmnalo Abrahab tunitsivigivâ perᴋutime ilûnatik tellimaujoanik. Attinga imâk nelonairtauvoᴋ: atanivik idluarnilik. Amalo Sâlemib atanivinga, imaipoᴋ: atanivik ullapirsaijoᴋ;

³ Atâtaᴋangitoᴋ, anânaᴋarminane, illaᴋanginivoᴋ, uvlungillo pigiarneᴋangilat, inôsingalo naggateᴋanginivoᴋ; Gûdible erninganut adsiotitauvoᴋ, ajoᴋertuijôtsainarlune issoᴋangitomut.

⁴ Tâpsomale angininga nautsertorsiuk, Abrahabtauᴋ angajoᴋaunerojub tunitsivigingmago sâlaᴋarnermut aᴋsârnigarilauᴋtame tellimaujoanik.

⁵ Lêvib kinguvângit ajoᴋertuinerônermik pititaugamik, perᴋojaᴋaralloarput inuᴋatigêt ᴋatangutigijamik perᴋutingita tellimaujoanik tiguserᴋovlugit, perᴋojaᴋ maliklugo, Abrahab timinganit tâpkotitunaᴋ tikigalloarlutiktauᴋ.

⁶ Taimnale (Melᴋisêdek) tâpkoa akorngane illaᴋarnermik unipkautaungigalloardlune, perᴋutit tellimaujoanik tigusilauᴋpoᴋ Abrahamit, angerviolauᴋtorlo (Abraha) saimaupâ.

⁷ Akkerartortaujungnangitomigle imaipoᴋ: Mingneᴋ anginersamut saimautjauvoᴋ.

⁸ Tamânele inuit toᴋojuksat (Levitit) perᴋutit tellimaujoanik tigusivakput; taipsomale (Melᴋisêdeub) inôninga oᴋautigijauvoᴋ.

⁹ Imâglo oᴋarpunga: Lêvitauᴋ, perᴋutit tellimaujoanik tigusigalloartoᴋ, Abrahakut tellimaujoanik tunijivoᴋ;

¹⁰ Sulle atâtame timinganêlaurame (Lêvi), Melᴋisêdeub (Abraha) pagreartormago.

¹¹ Nâmaksititaunerle pikpat Lêvitit ajoᴋertuinerôninginut (tâpkoa ajoᴋertuijôtilugit inuit perᴋojanik pititaungmatta): sôᴋ tagva pijariaᴋarᴋâ, ajoᴋertuinerôjoᴋ tikituksaᴋ taipkoa assingat oᴋautigivlugo, Melᴋisêdeub ilinganingatut, Aronib ilinganingatu-ungitôᴋ?

¹² Ajoᴋertuinerôneᴋ ablatsautitaulerpat, tagva perᴋojattauᴋ ablatsaujariaᴋarput.

¹³ Taimaitomigle oᴋautigijaujoᴋ (Jêsuse), tâmna kinguvârêt (Lêvitit) assinginit pivoᴋ, Altâremik kivgartortoᴋalauᴋsimangitunit.

¹⁴ Jûdamit Nâlegavut nuisimangmat, nelonangimat, kinguvârêllo taipkoa (Jûdakut) Môsesib oᴋarvigilaungilait ajoᴋertuinerônermik,

¹⁵ Nelonangiluarivoᴋ ama (perᴋojat Testamentetoᴋame atortut sorairtuksauningat), Melᴋisêdeub ilinganingatut ajoᴋertuijoᴋalermat assianik,

¹⁶ Taimaititaujomik perᴋojab uviniliub perᴋojanginu-ungitoᴋ, nunguniatsangituble inôtsib pitsartuninganut.

¹⁷ Imâk kigligiutsingmat: Issoᴋangitomut ajoᴋertuijôvotit Melᴋisêdeub ilinganingatut.

¹⁸ Taimak perᴋojaᴋ sivorleᴋ (Testamentetoᴋamêtoᴋ) atorungnairtitauvoᴋ, ajulerame, sumullo atunginame.

¹⁹ Perᴋojat nâmaksititsijungnangimatta; nerriugutiksamigle ajunginersamik pititauvogut, Gûdemut ᴋaglijutigijungnartaptingnik.

²⁰ Ama: angermaringneᴋ atortilugo kissiane (ajoᴋertuijungortitauvoᴋ Jêsuse). Taipkoa (Aronikut) ajoᴋertuijungortitaulaungmatta angermaringnermik illautitsingitomut;

²¹ Taimnale ajoᴋertuijôtitaulerpoᴋ angermaringnermik illautitsijomut, oᴋarvigijiminut imâk: Nâlegaᴋ oᴋarmariklune ᴋaᴋialerutiginiangitaminik oᴋarpoᴋ, issoᴋangitomut ajoᴋertuijôvotit Melᴋisêdeub ilinganingatut;

²² Taimaimat piluartomik Testamentemik (angeᴋatigêngnermik) ajunginersamik Jêsuse pimaklerteolauᴋpoᴋ.

²³ Taipkoalo ajoᴋertuijôlauᴋtut unukput, toᴋub taimailingatsainartingimagit.

²⁴ Tâmnale, issoᴋangitomut itsainarame, soraijuitomik ajoᴋertuineᴋarpoᴋ.

²⁵ Taimaimat tâpsomûna Gûdemut pijut, tâpsoma piulijungnarpait soraijunane; inôtsainarlarmelo tuksiarutivait.

²⁶ Taimaitomik ajoᴋertuinerôjomik pijariaᴋarapta ivjornaitomik, passijaksaungitomik, ajortoᴋangitomik, ajortolingnit ingmigôlingajomik ᴋilangmillo ᴋotsingnersamik;

²⁷ Pijariaᴋangitomik ajoᴋertuinerôjutitut taipkutitunaᴋ, uvlut tamaita tunijerᴋârlune tunergutinik ajornine nangminine pivlugit, kingorngagut inuit ajorningit pivlugit; atausiardlune taimailiolaungmat, ingminik tunigame

²⁸ Perᴋojat ajoᴋertuinerôjungortitsivut inungnik sangêtunik; oᴋauserle angermaringnermik illaᴋartoᴋ, perᴋojat kingorngatigut oᴋautaujoᴋ, Ernermik pititsivoᴋ, issoᴋangitomut nâmaksiviktomik.