Ebrêerinut 5 - Labrador Inuttitut Heritage Bible

Kristusib ajoᴋertuinerôninganik.

¹ Ajoᴋertuinerôjut neliat inungnit anerimajoᴋ inuit pivlugit pititaulermat, Gûdib pinginik udsertorᴋovlugo, tunijerᴋovlugo tunergutinik toᴋotaksaniglo ajornerit pivlugit;

² Naiperᴋotigosugungnarlune tamartunik nelojovlutik, nangmineᴋ sangênermik najorteᴋarame.

³ Taimaimattauᴋ, sorlo inuit pivlugit, taimaktauᴋ nangmineᴋ pivlune tunerguseriaᴋarpoᴋ ajornerit pivlugit.

⁴ Ingminiglo taimak nâlengnarsititoᴋanginivoᴋ, Gûdemulle anerijaumajoᴋ kissime (pivoᴋ), sorlo Arone.

⁵ Taimaktauᴋ Kristuse ingminik nâlengnarsitilaungilaᴋ ajoᴋertuinerôjomavlune, (nâlengnartipâle) tâpsomunga oᴋartub: Ernerivagit, uvlome ernertârivagit.

⁶ Sorlotauᴋ aglait assingine oᴋarmat: Ajoᴋertuijôvotit issoᴋangitomut, Melᴋisêdeub ilinganingatut.

⁷ Tâmna uviningme inôtilugo tuksiarnermiglo ᴋenunermiglo tunerguserpoᴋ angijomik nipliadlarlune ᴋugviudlarlarmelo tâpsomunga piulijungnartiminut toᴋomit; tussâjaugivorlo, Gûde nâlekamiuk.

⁸ Erniogalloardlune Gûdemut nâlengnermik illinialauᴋpoᴋ siorniortitaunerminut;

⁹ Tamaitalo nâmaksitinamigit, nalektiminut ilûnainut piulijaujutaumalerpoᴋ nâksaungitomik;

¹⁰ Gûdemut taijauvlune ajoᴋertuinerôjomik, Melᴋisêdeub ilinganingatut.

¹¹ Tamakkoa pivlugit oᴋausiksaᴋaralloarpogut unuktunik, nelonairtitsinerle oᴋumaipoᴋ, tukkisinajanginapse.

¹² Ilipselo akunit ajoᴋertuijuksaunajalauralloartose, ama ajoᴋertortaujariaᴋarpose Gûdib oᴋausingita pigiarninginik aglât, imungmiglo pititaujariaᴋarpose, nerᴋiksaᴋ pitsartujoᴋ pinago.

¹³ Neliatale sulle imungmik pijariaᴋartub oᴋautsit idlarnermik ᴋaujimangilait, nutarautuinarame.

¹⁴ Inersimajulle nerᴋiksaᴋ pitsartujoᴋ nerᴋigijaksarivait, imaitut: sungiutjinermut illisimatitaujunik issumalit, nelojungnairungnarlugik ajunginerlo ajornerlo.