Ebrêerinut 4 - Labrador Inuttitut Heritage Bible

Gudib inuᴋotingita merngôerserviksaᴋarninginik sulle.

¹ Tagva mâna udjertorta angervionivut iterniarnivut merngoerservioᴋojanganut kamaginago pinata, nelivut kinguraiᴋonago.

² Uvaguttauᴋ oᴋautsinik tussarnertunik oᴋautjaumagapta taipkotitunaᴋ; taipkoale piulijigilaungilait oᴋautsit oᴋâlatigijaujut tussartatik okperinginamigit.

³ Uvagut okpertogut pijomârapta merngoêrservingmut, sorlo oᴋarmat: Ningarlunga oᴋarmarilauᴋpunga: Merngoêrservioᴋojamnut iterniangilat. Taipsomanele pingortitaumajut silaᴋsûb pigiarninganit senamajarêrmatta,

⁴ Uvlut 7 ingat pivlugo aglait assingine oᴋarpoᴋ imâk: Gûdelo uvlut 7 ingane merngoêrserpoᴋ sulinerminit tamainit pijaminit.

⁵ Amatauᴋ tamâne: Merngoêrservioᴋojamnut itertuksaungilat.

⁶ Neliuniksame sulle tamattomunga itertuksaᴋarmat, taipkoalo tamattominga oᴋautjauᴋârtut iterᴋojaungimatta, okpinginingat pivlugo:

⁷ Ama uvlub assia taigivâ, taimak akkunêrtigijomik kingorngagut, Davidekut oᴋarame: Uvlome, sorlo oᴋarsimangmat, uvlome, nippinga tussarupsiuk, ômatise mangaitinasigik.

⁸ Jôsuab merngoêrservingmut pitilauᴋpagit, (Gûdib) uvlub assia oᴋautiginajalaungilâ kingorngagut.

⁹ Tamanna pivlugo sulle merngoêrserviksaᴋarpoᴋ Gûdib inuᴋotinginut.

¹⁰ Merngoêrservioᴋojanganut pimajoᴋ merngoêrsermat sulinerminit, sorlo Gûde sulinerminit.

¹¹ Tagva mâna ataruilita, merngoêrservingmut tamattomunga iterᴋovluta, neliat kataᴋonago, ipkoa okpingitut igjaraksarivlugit.

¹² Gûdib oᴋausinga ômanartôngmat pitsartudlalarmelo igluktut kênalingmit ipingnersauvlune, kibligutivoᴋ saviklugit tarnelo anernerlo, patteᴋtauᴋ saunerlo, erᴋartuijôvlunelo ômatib issumanginik erᴋarsautinginiglo.

¹³ Pingortitamiglo takuksaungitoᴋangilaᴋ tâpsomunga; ilûnamasiatigle ijersimanatiglo saᴋᴋersimavut ijîkita sângangne; tamanna oᴋautigivavut.

¹⁴ Ajoᴋertuinerôjoᴋsoaᴋarapta tagva, Jêsusemik, Gûdib erninganik, ᴋilangmut aimajomik; kigligiutsineᴋ (okperniptingnik) atavigênarlavut.

¹⁵ Ajoᴋertuinerôjoᴋanginapta ilapsugosugungnangitomik ajulerniptingnik, ilûnânele ôktortaumajomik uvaptitut, ajorneᴋaranele.

¹⁶ Taimaimat sivôralugata iksivautaᴋsoaᴋ saimarvigijauvik nellipsarlavut, nâpkigijaulerᴋovluta, saimarsaumiglo nagvârᴋovluta piulijaujariaᴋarniptingne.