Ebrêerinut 3 - Labrador Inuttitut Heritage Bible

Kristuse Môsesemit anginersauvoᴋ. Taimaimat Kristuse tunudlugo ulloreanadlarpoᴋ.

¹ Tamanna pivlugo ilipse ᴋatangutigêktose ivjornaitose, ᴋaiᴋojaumaᴋataujose ᴋaiᴋojinermut ᴋilangmit pijomut. Apostele taimna ajoᴋertuinerôvlunelo oᴋautigijavut, Kristuse Jêsuse ullernaigisiuk;

² Nelâgôrtoᴋ taimaititime sângane, sorlo Môsese pilaungmat tâpsoma (Gûdib) iglungane ilûnâne.

³ Tâmnale Môsesemit nertornarnersauvoᴋ, igloliortoᴋ, nakorinarnersaungmat iglomit.

⁴ Iglut ilûnaita senajaulerput kinamut; tamainigle pingortitsijoᴋ, tagva Gûde.

⁵ Môseselo tâpsoma iglungane ilûnâne nelâgôlauralloarpoᴋ kivgatut, oᴋautigijauᴋovlugit oᴋautigijaksat.

⁶ Kristusele Erniovlune (Gûdib) iglunganut nâlegauvoᴋ; iglunga tamadja uvagut, sungertûtiksaᴋ nerriungnerlo nertornautigijavut aulaijungnangeruptigik naggatânut.

⁷ Tamanna pivlugo, sorlo Anerneᴋ ajungineᴋ oᴋauseᴋarmat: Uvlome, nippinga tussarupsiuk,

⁸ Omatise mangaitinasigik, sorlo ipsomane pingmatta, ôktortaunerub uvlungane inuᴋajuitome.

⁹ Taipsomane atâtapse ôktormanga; nautsertorpânga, piniarnikkalo takolauᴋpait jarit 40 nâvlugit.

¹⁰ Taimailiormatta, inuᴋatigênik taipkoninga ningârosûteᴋalilauᴋpunga oᴋarlungalo: Omatimikut tamatsainarput! apᴋosinikkalo ᴋaujimalaungilait.

¹¹ Taimaimat ningarlunga oᴋarmarilauᴋpunga: Merngoersevioᴋojamnut itertuksaungilat.

¹² Udjertoritse ᴋatangutikka, nelise ilipsingne ômateᴋartailile ajortomik, okpingitomik, Gûde ômajoᴋ nâlegungnairlugo pijomik.

¹³ Uvlulle tamaita nangminipsingnik kaiblainiaritse, sulle uvlomeotilugo; akunapsingne sittititaujoᴋarᴋonago ajornerub uivêriklerninganut.

¹⁴ Kristuse illangiubvigigaptigo, sungertûteᴋarnivut aulaijungnangeruptigo naggatânut,

¹⁵ Oᴋartoᴋartilugo: Uvlome, nippinga tussarupsiuk, ômatise mangaitinasigik, sorlo taipsomane ningaᴋsaivingme pingmatta.

¹⁶ Illangita tussaramitsuk, ningaᴋsaivut, ilûnatiungitorle, Môsesikut Egiptenemit aulalauᴋtut.

¹⁷ Kikulle ningarosûtigivagît jârine 40 nê? idluitulijut pitjutigilaungilagît, timingit taipkoa asserormatta inuᴋajuitomê?

¹⁸ Kikulle merngoerservioᴋojaminut iterniangitut oᴋauti gimarilauᴋagît? okpingitu-ungitôᴋ?

¹⁹ Okpinginermut tagva iterneᴋ ajulermatsuk, takovogut.