Ebrêerinut 2 - Labrador Inuttitut Heritage Bible

Kristusib, inûb erningata, anginersavaksôninganik Engelinit.

¹ Taimaimat oᴋauseᴋ tussartavut nâleluariaᴋarpavut tamarᴋonata.

² Oᴋauseᴋ Engelitigut oᴋautaumajoᴋ aulajungnangermat, idluitulinerillo nâlenginerillo ilûnatik pigiarninginit akkilertaumangmatta:

³ ᴋanoᴋ uvagut ᴋemâjungnarᴋitâ, piulijauneᴋ taimak angitigijoᴋ kamagingikuptigô? Tamanna Nâlekab oᴋautigiᴋâlaungmago, tamattominga tussartut ᴋaujijautipât uvaptingnut.

⁴ Gûdibtauᴋ tamattominga kigligiudseᴋatigivait nelunaikutanut, tatamnartulinernullo, pitsartunernullo sunatuinarnut, Anernerublo ajunginerub tunergutauninganut, tuniorᴋaigame issumaminik.

⁵ Engelit nâlegangortilaunginamigit silaᴋsoarmut pijomârtomut, oᴋautigijaptingnut.

⁶ Kigligiudsijoᴋarpole aglait illangine imâk oᴋartomik: Inuk sunauvâ, taimak issumagigangne, inûblo erninga, taimak pairigangnê?

⁷ Anikitomik Engelinit mingnersauterᴋârdlugo, nertornarnermik nâlengnarnermiglo niaᴋôsilauᴋpat, aggakpîllo pingortitanginut Nâlegangortidlugo;

⁸ Tamaita pitilauᴋpatit itigangita atânnut. Tamaita tâpsoma atânnut pitinamigit, sumik kikitaᴋarᴋojingilaᴋ, tâpsominga nâlegaᴋangitomik; sullele takungilavut tamaita tâpsoma atânut pititaumangmatta.

⁹ Tâmnale anikitomik Engelinit mingnersautitaujoᴋ, Jêsusiongmat takovavut, toᴋub ânernadlarningagut niaᴋôsersimajoᴋ nertornarnermik nâlengnarnermiglo, Gûdib nâpkiningninganut toᴋomik ôksiniarᴋovlugo tamaita pivlugit.

¹⁰ Pijariaᴋalaungmat Gûdemut (tamaitaᴋsuit tâmna pivlugo ingmatta, tâpsomungalo tamaitaᴋsuit pingmatta) âniatitaunermut nâmaksititsomavlugo tâmna ᴋitornganik unuktunik ânanaunivingmut pititsijoᴋ, tâpkoalo piulijigiangat Nâlegaᴋ.

¹¹ Ivsornaititsijorlo ivsornaititaujullo, ilûnatik atautsemit pingmatta. Tamanna pivlugo kaugusungilaᴋtauᴋ ᴋatangutiminik taivlugit.

¹² Oᴋarporlo: Attît oᴋautigijomavara ᴋatangutimnut, illagêktullo akorngane nertoromavagit.

¹³ Amalo: Tâmna tattigijomavara. Amatauᴋ: Ahâk, mânêpunga ᴋitorngallo Gûdib tunijangit uvamnut.

¹⁴ Taimaimat, sorlo sorutsit uvineᴋarlutiglo auᴋarmatta, tâmna ukkutitunaᴋ tamakkoninga illangiusimavoᴋ, toᴋominut pitsartuerutijomavlugo toᴋub pitsartuninganik peᴋartoᴋ, tagva Sâtanase,

¹⁵ Kivgaujungnaitilugillo tamaita kivgaksainaujut inôsermingne tamât, toᴋo erᴋsigivlugo.

¹⁶ Engelit ililertunginamigit, Abrahable kinguvângit ililertorpait.

¹⁷ Tamanna pivlugo ᴋatangutine ilûnâne adsigijariaᴋalauᴋpait, nâpkigosulerdlune, nelâgortomiglo ajoᴋertuinerôlerdlune Gûdib sângane, inuit ajorningit issumagijaujungnairᴋovlugit.

¹⁸ Siorniulauᴋlune nangmineᴋ ôktortaumagame ikajorungnarpait ôktortaulertut.