Ebrêerinut 13 - Labrador Inuttitut Heritage Bible

Kaiblaijutiksanik sunnatuinarnik.

¹ Sorairase ᴋatangutigêktutitut nagliktigêgitse.

² Siniktarvionermik puigorniarase, illangit, taimailioramik, ᴋaujimanatik Engelinut siniktarviolaungmatta.

³ Kelaksorsimajut issumaginiarsigik, ᴋelaksorsimaᴋataujutitut; siorniortullo, ilipse nangmineᴋ sulle timeme inôgapsetauᴋ.

⁴ Nuliarêngneᴋ idluatsainarle tamaine, nuliarêllo innangaviat ivsornaile; assiniartulle nuliarêngnermiglo asseroijut Gûdib erᴋartoromârpait.

⁵ Iliornise pijomatudlarnermik illaᴋarniarane, pigijase tamâne nâmagisigik. Nangmineᴋ oᴋarmat: Kemangniatsangilagit allarniarnaglônêt.

⁶ Taimaimat oᴋarungnarpogut: Nâlegaᴋ piulijigigapko, erᴋsijomangilanga. Sunamik inuit piniarvigijungnarpângâ?

⁷ Erᴋaumaniarsigik ajoᴋertortise, Gûdib oᴋausinginik ilipsingnut oᴋâlalauᴋtut; tâpkoa inôsingita naggatât ᴋemergosiuk, okperningallo maliklugo.

⁸ Jêsuse Kristuse, ikpeksaᴋ uvlomelo, issoᴋangitomullo tâmnatsainaᴋ.

⁹ Aulatautailititse ajoᴋertûtsinut sunatuinarnut tussarngartanullo; pivianadlarmat, ômat aulajungnangerpat; tamanna saimarsaumut pivoᴋ, nerᴋinut pinane, atungimatta tamakkoa pinasuartimingnut.

¹⁰ Uvagut (okpertôjogut) Altâreᴋarpogut, tamanna nerrivigijungnangilât kivgartorut tuperme.

¹¹ Nergjutit nelîta aungit ajoᴋertuinerôjomut âtaujut ivsornaitoviub iluanut ajornerit pivlugit, taipkoa timingit ôtaulermatta tupersuit avatane.

¹² Tamanna pivlugo Jêsusetauᴋ âniatitauvoᴋ itertarviksûb silatâne, inuit ivsornaititsomavlugit aungminut.

¹³ Nelipsarlavut tagva mâna tupersuit avatanut, mitautauninga atorlugo.

¹⁴ Mâne iglugasaksoaᴋanginapta ᴋemaktauniangitunik, neliutuksarsiorpogulle.

¹⁵ Sorairata tagva Gûde âtsivigilavut tunergutinik nertordleruinik tâpsomûna, tagva oᴋautsinik nertordlertunik ᴋangasinângnit pijunik, attinganik kigligiudsijunik.

¹⁶ Avâgosungneᴋ aitortuinerlo puigorniarasigik; tunergutit taimaitut Gûdib ᴋuviagingmagit.

¹⁷ Ajoᴋertortise nâleklugillo malingniarsigik; udsertormatta tarnipsingnik, akiortuksauvlutik tâpkoa pivlugit; taimailiorᴋovlugit ᴋuviasuklutik, anersauminatik; tamanna idluatsangimat ilipsingnut.

¹⁸ Tuksiarutitigut. Uvagut manigornivut imaipoᴋ, passijaksaungitomik issumaᴋarapta, idluartomiglo inônasuarapta ilûnâne.

¹⁹ Kaiblaluarpapsele, taimailiorᴋovluse, tuavinersamik ama tunijauᴋovlunga ilipsingnut (tikilunga).

²⁰ Gûdible ullapirsaijub, toᴋungajunit anititsijub Nâlegaptingnik Jêsusemik, saukat mianerijersoanganik, Testamentib issoᴋangitub aunganut,

²¹ Tâpsoma idluarsarlise, ilûnâne ajungitulijungnarᴋovluse perᴋojangit piniarlugit, senalunelo ilupsingne ᴋuviagijaminik, Jêsuse Kristusikut; tâmna nâlengnarsile issoᴋangitomit issoᴋangitomut. Amen.

²² Kaiblarpapsele ᴋatangutikka, idluiginiarasiuk oᴋauseᴋ tamanna idluarsautiksaᴋ; naitomik aglagvigilaurapse.

²³ Neloᴋongilapse ᴋatangutivut Timôteuse ama ᴋelarutjârtaungmat; tâmna aiparivlugo takojomavapse, tikituarpat.

²⁴ Salutisigik ajoᴋertortise ilûnaita ivsornaitullo ilûnaita. Katangutit Itâliamiut salutipâse.

²⁵ Saimarsautib illagilise ilûnase. Amen. Ebrêerinut tamakkoa aglaktaumavut Itâliame, Timôteusiblo neksarpait.