Ebrêerinut 12 - Labrador Inuttitut Heritage Bible

Soᴋosijuirᴋojaunermik. Kappiasungnipta saimanarninganik. Ajungitune tamaine pivalliajuksaunermik, Têstamentitâb saimanarningit anginersaungijaidlarmatta sivorlinit.

¹ Tamanna pivlugo uvaguttauᴋ, kigligiutsijunik taimak unuktigijoksoarnik avatiptigut peᴋarapta: Ajornerit allarlavut uvaptingnut nipingatsainartut erᴋinautigijavullo, ᴋenuersârlutalo aᴋpangerta aᴋpalliuterᴋojauniptingne,

² Jêsuse takunârlugo, okpernermik pigiarnikteolarmelo nâmaksititsijeojoᴋ; tâmna ᴋuviasûteᴋarungnarajalauᴋtoᴋ, seningajolik ᴋenuersârlune atorpâ, kangunarningalo kamagingillâ, mânalo iksivajoᴋ Gûdib iksivautaᴋsoangane, talerpiata tungâne.

³ Tâmna ᴋenuersârtoᴋ taimak angitigijomik ajortoliksoarnut akkerartortauvlune erᴋarsuik, merngortorᴋonase, katsungataililuselo tarnipsigut.

⁴ Sulle ause kovilaungigalloarapsiuk, akkerartornise ajortunik pitjutigilugit;

⁵ Puigorêrpaselo oᴋauseᴋ taimna nakoᴋsinadlartoᴋ ilipsingnut, ᴋitornganut sorlo pijoᴋ Ernîk, Nâlekab sugiarninga nachoginiarnago, mungunganiarnaglo, tâpsomunga pidlartauguvit.

⁶ Nagligijane Nâlekab sugiarmagit, ernerilertanelo ilûnaita issaᴋaniarpait.

⁷ Sugiartauneᴋ nâmagigupsiuk, tagva Gûdib piniarvigivâse ᴋitorngariluse. Nane erneᴋarᴋâ atâtaminut sugiartaungitomîk?

⁸ Sugiartaungikupsele, sorlo ilûnatik tamattominga illangiutititaungmatta, tagva tamângainâgauvose, ᴋitorngaunaselo.

⁹ Atâtagijavut timiptigut sugiartigilauraptigik ileragilugillo, tagva piluartomik tarnib atâtanga nâlegaksaringilavût, inôᴋovlutâ?

¹⁰ Taipkoale tagva uvlut ikitut sugialauᴋpâtigut issumamingnik; ômale pivâtigut atornartomik ivjornaininganik illangiutititauᴋovluta.

¹¹ Sugiartaunerille ilûnatik atortilugit ᴋuviasûtiksaunasugingilavut, kiksautigivavulle; kingornganele tamakkonunga illisimatitaujut, ullapirsarnartomik idluarniksamik tunitsiviginiarpait.

¹² Tamanna pivlugo ama pitsartutisigik aggait ᴋasungajut sêrᴋullo nukkingertut;

¹³ Majanganaselo tutiniartise itikapsingnut, tusiaktotut neliat ᴋoitarᴋonago, inûlijaungârᴋovlugole.

¹⁴ Ullapirsauteᴋarnermik ilûnainut pinasuaritse, ivsornainermiglo, tamattominga pinasuangitut Nâlegaᴋ takoniangimatsuk.

¹⁵ Udjertoritselo Gûdib saimarsautânik kingurailertoᴋarᴋonago; amârmik ᴋassilinartomik perortoᴋarᴋonago, akkerartortigêngnermik saᴋᴋertitsilune, unuktullo tâpsomunga ivsornartitaulerkonagit.

¹⁶ Assiniartoᴋarᴋonagolo, Gûdemut issumaᴋangitoᴋarᴋonagolônêt Esauetut-itomik; tâpsoma nerᴋiksaᴋ atausênaᴋ pivlugo erniangoᴋârnine niorvgutigigamiuk.

¹⁷ Kaujimagapse, kingorngane saimaudsauneᴋ kingormgutijomagamiuk, perᴋojaujungnairmat; (atâtame) issumanga ablatsângortilugo sapperame, ᴋeavlune taimailingatinasuaralloardlugo.

¹⁸ Kaᴋᴋamut aktortaujungnartomut ikomamut ikoalajomut tikinginapse, tâvligâtalingmullônêt, tâᴋsoaktalingmullônêt, silarnerluksoaᴋtalingmullônêt;

¹⁹ Tiptulautib nippinganullônêt, oᴋautsit nippinginullônêt; taipkoninga tussalauᴋtut tussaromalaungilait oᴋautsemik oᴋautjaujomanginamik.

²⁰ Oᴋautaumajut tagvane saperamigit. Nergjutillo illangata ᴋaᴋᴋaᴋ aktoruniuk ujarᴋanut milloraksaulauᴋpoᴋ, pitigaksaulauᴋporlônêt.

²¹ Takojaujullo taipkoa erᴋsinartoᴋsôngmatta, Môsese oᴋarpoᴋ: Erᴋsivunga sajudlarlungalo.

²² Ilipsele Zionib ᴋaᴋᴋanganut tikisimavose, Gûdiblo ômajub iglugasaksoanginut, Jerusalemut ᴋilangmêtomut, Engelillo tausendeoᴋattartut unuktoᴋsôninginut,

²³ Erniangoᴋârtullo illagêngninginut, ᴋilangme aglaksimajunut, Gûdemullo tamainik erᴋartuijomut, idluartullo pijarêrsimajut anerninginut,

²⁴ Pijitsertomullo Testamentetâmik Jêsusemut, aungmullo serparsautiksamut, ajunginersamik oᴋâlajomut Abelib (aunganit).

²⁵ Udsertoritse, oᴋâlajomik tapatoᴋonase, Taipkoa, nuname oᴋâlatilugo tapatôlauᴋtut, ᴋemâjungnalaungimatta, tagva uvagut piluartomik ᴋemâjungnangilagut ᴋilangmit oᴋâlajoᴋ tapagiguptigo.

²⁶ Tâpsoma nippingata taipsomane nuna aulatipâ: Mânale kigligiutsivoᴋ, oᴋarlunelo Ama atausiarlunga aulatitsijomavunga nunamik kissianeungitoᴋ ᴋilangmigletauᴋ.

²⁷ Imâgle oᴋarame: “ama atausiardlunga”, saᴋᴋertitsivoᴋ aulajungnartut ablatsaujomârmatta senamajutitut, aulajuitut itsainarᴋovlugit.

²⁸ Tamanna pivlugo Nâlegauvik aulajuitoᴋ pigaptigo, saimarsauteᴋarluta (atutsiarlavut); tamattomunga Gûde kivgartorlugo ᴋuviagijanganut, kuksasukluta naipertugarivlugo.

²⁹ Gûdivut ikomaungmat nungutsijoᴋsoaᴋ.