Ebrêerinut 10 - Labrador Inuttitut Heritage Bible

Kristusib tuniningata nâmagijauninganik. Okpernerme aulajuirᴋojaunermik.

¹ Perkojalle tachauvut perᴋutinut pijomârtunut, perᴋutemariongilat nangmineᴋ. Jârit tamaita tunijijuksauvut tunergutinik taimaitsainartunik, tunergusertulle nâmaksititaujutigljungnangilait.

² (Nâmaksititaujutigikpatigik), tunijinerit sorairajalauᴋput; Gûdemik kivgartortut issumamikut ikpigijungnairajarmatta ajornermingnik, atausiardlutik sujungaititaulauramik.

³ Jârinele tamaine tamakkonunga erᴋaititauᴋattarput ajornermingnik.

⁴ Tuktuvaub saukablo aunginut ajornerit pêjarlugit ajornavingmat.

⁵ Tamanna pivlugo, silaᴋsoarmut pigame, oᴋarpoᴋ: Tunergutinik piliutiniglo pijomalaungilatit, timemigle âᴋiksoilauᴋpotit uvamnut.

⁶ Tunergutinik ôtaksanik ajortoêrutiksaniglônêt ᴋuviasutsangilatit.

⁷ Tagva oᴋarpunga: Ahâk, aggerpunga, aglangne aglaksimavoᴋ uvamnik, Gûde pijomanît nâmaksititaksarigapko.

⁸ Tagvane oᴋarame: Tunergutinik, piliutiniglo, ôtaksaniglo, ajortoêrutiksaniglo pijomalaungilatit, ᴋuviaginginivatittauᴋ, (perᴋojat maliklugit tunijauvaktut),

⁹ Tagva oᴋarpoᴋ: Ahâk, aggerpunga, Gûde pijomanît nâmaksititsartorlugo. Tagva sivorleᴋ sorairtipâ, aipanga atorᴋovlugo.

¹⁰ Pijomajanga tamanna pitjutigilugo ivjornaititauvogut, Jêsusib Kristusib timinga tunijaungmat atausiardlune.

¹¹ Ajoᴋertuijullo ilûnatik perᴋojauvut, uvlut tamaita Gûdemik kivgartorlutik tunijeᴋattarlutiglo tunergutinik taimaitsainartunik; tâpkoale ajornerit pêjarungnatsangilait.

¹² Tâmnale tunijerᴋârame tunergumik atautsemik ajornerit pivlugit, issoᴋangitomut nâmatsainartomik, mâna iksivavoᴋ Gûdib talerpiata tungâne.

¹³ Taimangat utaᴋivoᴋ ômigijine ilijauᴋârtinagit itikame ikogganganut.

¹⁴ Tunergumut atausênarmut nâmaksitilauramigit issoᴋangitomut ivsornaititauniartut.

¹⁵ Tamattominga Anernerub ajunginerubtauᴋ kigligiudsivigivâtigut. Sivorngagut oᴋalaurame:

¹⁶ Tamadja Testamentiga (angerutigijomârtara) tâpkonunga uvlut tamakkoa kingorngatigut, Nâlegaᴋ oᴋarpoᴋ: Perᴋojakka pititsomavakka ômatinginut, aglagomavakkalo issumanginut.

¹⁷ Ajorningillo tamarningillo issumagijomairpakka.

¹⁸ Tamakkonangalle issumagijaujungnaitune, tunergutiksat atorungnairiaᴋarivut ajornerit pivlugit.

¹⁹ Tagva mâna ᴋatangutikka, sivôranata iterungnarapta ivsornaitovingmut, Jêsusib aunga pitjutigilugo,

²⁰ Tamattomunga apᴋotiksarsilauᴋpâtigut nutâmik ômanartomiglo, upkoᴋsoakut, tagva uviningmigut;

²¹ Ajoᴋertuinerôjoᴋaraptalo Gûdib iglunganut:

²² Aivigilavut tagva, ômamut mikselingmut, okpermarikluta, serparsartauvluta ômatiptigut, ᴋelarudjârtauvlutalo issumamit passijaksaujomit, ubvarsimavlutalo timiptigut imermut ivjornaitomut;

²³ Atavigênarlavuttauᴋ kigligiudsineᴋ nerriungnermik, aulajungnangerluta; (angilauᴋtoᴋ tamattominga nelagôrmat)

²⁴ Nangminiptingniglo udjartortigêkta, kajungersartigêngnermut, naglerᴋovluta ajungitulerᴋovlutalo.

²⁵ Katimaniksavullo kamagijungnainiarnagit, sorlo illangit pivangmatta; kaiblartigêklutale, taimaglo pijariaᴋaluarpoᴋ, tautukapse, uvluksaᴋ ᴋaglilermat.

²⁶ Mikseᴋârneᴋ illitariᴋârlugo, pijariluta idluituligupta, tunergutiksaᴋarungnairpogut tagva ajornerit pivlugit;

²⁷ Erᴋsinartoᴋsoarmigle nerriugijaksaᴋarpogut erᴋartuivingmik, ikomamiglo ilimanartoᴋsoarmik, nungutsiniartomik akkerartortunik.

²⁸ Môsesib perᴋojanginik tapatojoᴋarpat, nâpkigijaunane toᴋotauᴋojauvoᴋ, magguk pingasullônêt kigligiudsiningit maliklugit:

²⁹ Imaᴋâ, sugaluluartoᴋsoarmik pidlartaujutiksarsiniarasugivase (inuk) tullertoᴋ Gûdib erninganik, ivsornautigilugolo Testamentib aunga ivsornaijutigilauᴋtane, mitauteᴋartorlo Anernermik saimarsautaujomik.

³⁰ Kaujimagaptigo tâmna oᴋartoᴋ: Kiglungneᴋ akkiniarneᴋ uvanga pigijara, uvanga akkiniaromavunga, Nâlegaᴋ oᴋarpoᴋ. Amatauᴋ: Nâlekab inuᴋotine erᴋartoromârpait.

³¹ Erᴋsinadlarpoᴋ, Gûdib ômajub agganginut ochoniarneᴋ.

³² Uvlôlauᴋtulle erᴋaumasigik; taipsomane ᴋaumarsartaumavluse angijomik kappiasuktitaulaurapse, ânianartunik atorluse.

³³ Illangagut nangmineᴋ mitautaunermut kappianartomullo allêkutaulaurapse; illangaguttauᴋ illaulaurapse taimaitutigut siorniortitaujunut.

³⁴ Ilapsugilaurapsinga ᴋelaksorsimajunga, ᴋuviasukluse aglât ᴋenuersâlaurapse perᴋutipsingnik aᴋsârtaugapse; ilipse ᴋaujimajose, ajunginersamik nunguniangitomiglo nangminipsingne perᴋutiksaᴋarapse ᴋilangme.

³⁵ Tatteᴋarnise eginasiuk, angijomik akkilertaujomârmat tamanna.

³⁶ Kenuersârnermigle pijariaᴋarpose, Gûdib pijomajanganik atutsiarᴋovluse, angerutigijaumajomiglo illangiutititaulerᴋovluse.

³⁷ Anikitoarsungmik sulle tamattoma kingorngagut aggertuksaᴋ aggerniarmat, mulutsanane.

³⁸ Idluartuble okperneᴋ inôtiginiarpâ. Kemâniartorlo, taimna tarnima ᴋuviasûtiginiangilâ.

³⁹ Uvagulle illagingilavut ᴋemâjut erᴋartortaujomârlutik; okpertulle illagivavut tarnimingnik piuliklertut.