Ebrêerinut 1 - Labrador Inuttitut Heritage Bible

Kristusib, Gûdib erningata, anginersavaksôninganik Engelinit.

¹ Itsaksoak Gûdib sivorlît oᴋarvigilauramigit unuktoertorlune sunatuinarniglo iliorlune nelautaijutigut,

² Kingorlermik Ernikut oᴋalauᴋpoᴋ uvaptingnut uvlune tamakkonane. Tâmna kingormgujijuksangortilauᴋpâ tamaitaᴋsoarnik, tâpsomûnatauᴋ silaᴋsoaᴋ pingortilauᴋpâ.

³ Tâmna, (Gûdib) ânanauningata ᴋeblariutinga, ilinganingatalo adsiluanga, tamainiglo pairsijoᴋ oᴋautsiminut pitsartudlartomut, ajorniptingniglo pêjailauᴋtoᴋ nangminermigut, iksivavoᴋ Nâlegaviksûb talerpiata tungâne ᴋotsingnerme.

⁴ Engelinit taimak ajunginerôjoliarimavoᴋ, attermik taipkonangat nâlengnarnersamik kingormgujigame.

⁵ Engelit nelianut oᴋarsimanermât: Ernerivagit, uvlome ernertârivagît? Imâglo: Atâtaginiarpânga, uvangalo erneriniarivarâ?

⁶ Amalo, erniangoᴋartoᴋ silaksoarmut ittertinamiuk, oᴋarpoᴋ: Gûdib Engelingitalo ilûnatik tuksiarvigijaksarivât.

⁷ Engelit pivlugit oᴋaralloarpoᴋ: Engeline anoringortipait, kivganelo ikoâlajungortilugit.

⁸ Ernerle pivlugo oᴋarpoᴋ: Gûde, iksivautat issoᴋangitomit issoᴋangitomut itsainarpoᴋ; nâlegauvikpît ajaupianga opigijaujutiksaᴋ naggojôvlune opigijautiksauvoᴋ.

⁹ Idluarneᴋ ivlerivat, iluserlungnerillo ômigivatit; tamanna pivlugo Gûdib, Gûdivît mingoalauᴋpâtit orᴋsumut ᴋuviasûtiksamut, piluartomik illangnit.

¹⁰ Igvillo, Nâlegaᴋ, nuna pigiarninganit tunganeᴋtâlauᴋpat, ᴋilaillo aggakpît senamajangit.

¹¹ Tâpkoa inungujomârput, igville itsainaromârpotit; tâpkoalo nutaujungnaipalliajomârput ilûnatik annorâtut,

¹² Ulliktut ablatsângortitsomârpatit, ablatsângoniarput tagva; igville tâmnautsainarpotit, jâritillo nâniatsangilat.

¹³ Engelille nelianut oᴋarsimanerᴋâ: Talerpingma tungânut ingitit, ômigijingnik illijerᴋârtinanga itikavît ikkogganganût?

¹⁴ Taipkoa ilûnatik anerniongilât kivgartortuksauvlutik; tilijaumajut kivgartorᴋojauvlutik piulijaunermik kingormgujijomârtût pivlugît?