Deuteronomy 9 - Labrador Inuttitut Heritage Bible

¹ Omat, Israêl, uvlome Jordan ikârniarpat, iterniarlutillo inôᴋatigêksuit anginersat pitsartunersallo ilingnit piginiarlugit, iglugasaksuillo angijut, ᴋilangmut tôᴋtunik avalulit;

² Inuillo angijut takijullo, Enakekut erningit, ᴋaujimajatit, imâglo tusaumajatit: Kina nangerungnarᴋâ Enakib erningita sânginê?

³ ᴋaujilerit tagva, Nâlegak Gûdît tâmnaungmat sivunerne ingergajok ikomamut nungutsijok; tâpsoma nungutsomârpait, tâpsomalo oggotitsomârpait sivunerne; taimaglo ᴋemâtitsomârpatit asserorsarailugillo, sorlo Nâlekab oᴋautingmatit.

⁴ Nâlekab Gûdivît ajaktorsimakpagit sivunernit, oᴋarniarnak ômatingne: Idluarnera pivlugo Nâlekab tamaungautipânga nuna tamanna pigilugo perᴋovlunga; inôᴋatigêksuit tâpkoa idluiningit pitjutigilugit Nâlekab ajaktorpait sivunernit.

⁵ Idluarnît pitjutigilugo ômativîllônêt nelâgôrninga pitjutigilugo itilungilatit nunangat piginiarlugo; inôᴋatigêksuille tâpkoa idluiningit pitjutigilugit Nâlekab Gûdivît ᴋemâtipait sivunernit, oᴋauserlo Nâlekab angermariklune oᴋautigijanga atâtagijarnut Abrahamut, Isaarmullo, Jakomullo soᴋosijuiᴋovlugo.

⁶ Taimaimat ᴋaujilerit, Nâlekab nuna tamanna piojok tunilungimago perᴋutauᴋovlugo ilingnut idluarnît pivlugo; inôᴋatigêksoangogapse ᴋeratajunik ᴋongaselit.

⁷ Erᴋailerit, puigorniarnaglo, Nâlegak Gûdît ningarsâlaurangne sunaᴋajuitome; uvlormit aularkigijarnit nunamit Egiptenemit, tikiutinise tamaunga tikidlugo Nâlegak akkerartorpase.

⁸ Horebemetauᴋ Nâlegak ningarsâlauᴋpase, Nâlekablo ᴋôdlarvigivâse nungutsomavluse aglât.

⁹ Taipsomane ᴋakᴋamut majorarsimatilunga aglagvîk ujaraujûk tigujomavlugik, tagva aglagvîk Nâlekab angerᴋatigêngneliarimajangata ilipsingnut aglaksimaviak, ᴋakᴋamêlauᴋpunga uvlunik 40nik unnuaniglo 40nik; nerᴋiksamik nerrinanga imiksamiglo imernanga.

¹⁰ Nâlekablo aglagvîk ujaraujûk maggûk ᴋaipâk uvamnut, aglaᴋartûk Gûdib tikinganut aglaksimajunik; tâpkungnangnelo aglaksimavut oᴋautsit Nâlekab oᴋauserijangit ilipsingnut ᴋakᴋame ikomab iluanit uvlorme katimaviojome.

¹¹ Uvlullo 40 unnuallo 40 nângmatta, Nâlekab aglagvîk ujaraujûk maggûk ᴋaipâk uvamnut, tagva anerᴋatigêngnerûb aglaksimavingak.

¹² Nâlekablo oᴋautivânga: Makitit, mângat atersârsârit, inuᴋotitit tikiutijatit Egiptenemit asseroingmatta nangminermingnik; sangusimangmatta apᴋomit tâpkonunga apᴋutauᴋojamnit; kovimajomik inungoaliorput ingmingnut.

¹³ Sullelo Nâlekab oᴋarvigivânga, oᴋarlune: Inuit tâpkoa tautukpakka, ahâglo, inôvut ᴋeratajunik ᴋongaselit;

¹⁴ Kemanga, nungutsijungnarᴋovlunga tâpkoninga, atingallo pêjarlugo ᴋilaub atânit; ilingnillo inôᴋatigêksoalioromavunga sôngonersanik anginersaniglo tâpkonangat.

¹⁵ Sanguvunga tagva atersârlungalo ᴋakᴋamit, ᴋakᴋarlo ikoâlavok ikomamut; angerᴋatigêngnerûblo aglaksimavîgik maggûk iglutorlunga tigumiarpâka.

¹⁶ Takosarpungalo, ahâglo, Nâlegak Gûdise idluitulivigivase kovimajomik noggangoaliorapse; sangugapselo apᴋomit Nâlekab apᴋutauᴋojanganit ilipsingnut.

¹⁷ Aglagvîglo tâpkoa maggûk itgûdlarpâka egilugiglo aggamnit tamangnit, serᴋomipâkalo ijipse sângine.

¹⁸ Pâmakterpungalo Nâlekab sângane, sorlo sivorngane pilaurama, uvlut 40 unnuallo 40 nâvlugit; nerᴋiksamik nerringilanga imiksamiglo imingilanga; idluinise tamaita idluitulinerijase pivlugit, idluitomik piniarapse Nâlekab takkoane, tâmna ningarsârlugo.

¹⁹ Ningaumaneᴋ ᴋaningaumajârnerlo Nâlekab ningaumajutigingmase nungutsomavluse sivôragivâka, Nâlekable tusarpânga tamattomanetauk.

²⁰ Nâlekablo Arone ningarvigidlarpâtauᴋ nungutsomavlugolo, Aroneletauᴋ tuksiutivara taipsomane.

²¹ Idluitulijutigijaselo, tagva noggangoaliarimajase, tiguvara ôtilugolo ikomamut, katjuklugolo serᴋalimarikpara, argjatitut îtilugit; argjallo tâpkoa egipakka kôngmut ᴋakᴋamit kôktomut.

²² Taberamelo, Massamelo, ikligûdlartullo iluvingine, Nâlegak ningarsâlauᴋpase.

²³ Nâlekablo aulartingmase Kades-barneamit, oᴋarlune: Takpaungaritse, nunalo tunimajara ilipsingnut pigilerniarsiuk; tagva Nâlekab Gûdipse perᴋojanga tapagilauᴋpase, okperilaungilaselo, nippingalo nâlengnago.

²⁴ Nâlegak tapagitsainarpase, uvlormit ilitarᴋsitainarnimnit ilipsingnik.

²⁵ Taimaimat pâmakterpunga Nâlekab sângane uvlut 40 unnuallo 40 pâmangavigijakka nâvlugit; Nâlegak oᴋarsimalaungmat nungutsomagamise.

²⁶ Tagva Nâlekamut tuksiarpunga oᴋarlunga: Nâlegak Gûdîk, inuᴋotitit kingormgutijatillo, angijoksônernut piulijatit, tikiutijatillo Egiptenemit aggangnut pitsartudlartunut, asserorniarnagittôk.

²⁷ Kivgatit Abraha, Isaarlo, Jakolo, erᴋaumalaukit; inugasaksuillo ᴋepêserningat takonârniarnago, idluituliningillônêt ajorningillônêt;

²⁸ Nunab, uvaptingnik anititsivigijavit, inungit oᴋarᴋonagit: Nâlegak sapermat tikiutilugit nunamut angerutigijaminut tâpkonunga, ômigidlaramigillo, anitipait toᴋotsomavlugit sunaᴋajuitome.

²⁹ Igville inuᴋotigivatit kingormgutilaitalo, tikiutijatit pitsartunersoarmut talingnullo issamijomut.