Deuteronomy 8 - Labrador Inuttitut Heritage Bible

¹ Perᴋojat uvlome ilingnut perᴋojijutigijakka tamaita kamagijaksarivase piniarlugillo, inôᴋovluse, unuksiᴋovluselo, iterᴋovluselo nunalo Nâlekab angerutigijanga atâtagijapsingnut pigilugo piᴋovluse.

² Erᴋaijuksauvotillo apᴋomik ilûnânik Nâlekab Gûdivît tesiorvigijanganik ilingnik jârit makkoa 40 nâvlugit sunaᴋajuitome, nikanarsârtitsomavlutit ôktoromavlutillo, ᴋaujijomavlune sunamik ômamiutaᴋarmangârpit, perᴋojat malingniarmangângne malingniangimangângnelônêt.

³ Manigotitilauᴋpâtillo, kâktilutillo, nerritilauᴋpâtillo mannamik ilitaringitarnik, atâtavillônêt ilitaringitanganik; nelojungnaititsomavlutit inûb ᴋaᴋᴋôjatuinaᴋ inôtigingimago, Nâlekable oᴋausingit tamaita, ᴋaninganit anijut, inôtigingmagit.

⁴ Annorâtit nutaungitôlilaungilat ilingne, itikatillo publilaungilat jârine tâpkonane 40ne.

⁵ Omatingnelo niapertoraksarivat Nâlekab Gûdivît inugoingmatit sorlo inûb ernine inugoingmago.

⁶ Nâlekablo Gûdivît perᴋojangit maligaksarivatit, apᴋutauᴋojangane arvertarlutit, tâmnalo sivôragilugo.

⁷ Nâlekab Gûdivît tikiutilermatit nunamut piojomut, nunamut imermik kôlingmut, puilavilingmullo, itinelingmullo, puilajunik naᴋsarne ᴋakᴋanelo;

⁸ Nunamut senaugaksatalingmut, senaugakuluksatalingmullo, vaineliksatalingmullo, paungatannaktalingmullo, paungatalingmullo granâtenik taijaujunik; nunamut paungatalingmut orᴋsuksanik, igupsaujârtullo orᴋsuanik pitalingmut;

⁹ Nunamut nerᴋiksaᴋarviginiartarnut amigangimariktomik, sunamiglônêt ajoksarniangilatit; nunamut kikiamik ujaralingmut, ᴋakᴋanginillo ᴋaᴋorlermik pêjailârpotit.

¹⁰ Nerrilutillo aᴋeartulârpotit, Nâlegarlo Gûdît nakoridlalârpat tunitjivigisimangmatit nunamik piodlartomik.

¹¹ Udjertorit puigorᴋonak Nâlekamik Gûdingnik, tâpsoma perᴋojangit, idluarsautingillo, maligaksauᴋojangillo, uvlome perᴋojijutigijakka ilingnut, maligungnailugit perᴋonak;

¹² Nerrivlutit aᴋeartorlutit, igloliorêruvillo piojunik inigilugillo;

¹³ Tuktuvaᴋotitillo saugakotitillo unuksikpatta, silberelo goldelo unuksikpatta, perᴋutitillo tamaita unuksikpatta;

¹⁴ Omatit pingijaiᴋonago, Nâlegak Gûdît tikiutijigijat nunamit Egiptenemit, iglomit kipaloviojomit puigorlugo perᴋonak;

¹⁵ Tesiortigijat sunaᴋajuitokut angijokut sivôranartokullo, ᴋuglugiaᴋtalikut ikomatut âniatitsijunik, kingupaujârtotalikut, nunakut panertokut imeᴋangitokut; saᴋᴋertitsijigijat imermik ᴋairtomit sittijomit;

¹⁶ Nerrititsijigijat sunaᴋajuitome mannanik, atâtagijavit ilitarilungitanginik; nikanarsârtitsomavlutit, ôktoromavlutillo, ajungitulivigijomavlutit kingorngane;

¹⁷ Oᴋarᴋonaglo ômatingne: Nukima aggangmalo talerpiub pitsartuningata piksavaksoaᴋartipânga makkoninga.

¹⁸ Nâlegarle Gûdît erᴋaumajaksarivat, tâpsoma tunitjivigingmatit pitsartunermik piksavaksoarsijungnarᴋovlutit; aulajangititsijungnarᴋovlugo angernerijaminik atâtagijarnut, sorlo uvlome ingmat.

¹⁹ Nâlegarle Gûdît puigorungne, tâpsomalo asingit Gûdingoat maligungne, kivgartorlugit, pâmaktervigilugillo, tagva kigligiutjivigivapse uvlome, nungutaumarilârapse.

²⁰ Inôᴋatigêksoatitut, Nâlekab nungutautitangititut sâpsingne, taimak nungutaulârivose, Nâlekab Gûdipse nippinga nâlagomanginapsiuk.