Deuteronomy 7 - Labrador Inuttitut Heritage Bible

¹ Nalekab Gûdivît tikiutikpatit nunamut aivigijarnut pigijaksarnut, nunaᴋatigêksuillo unuktut ajaktorpagit sivunerne, Hitikut, Girgasekullo, Amorikullo, Kanaanekullo, Perizikullo, Hivikullo, Jebusekullo, inôᴋatigêksuit sevenit, anginersaujut pitsartunersaujullo ilingnit;

² Nâlekablo Gûdivît tunergutigikpagit sângne, sâlagigungnelo; tagva asseroraksarivatit pimariktomik; angerᴋatigijaksaringilatit, nâpkigijaksarinagillo;

³ Nuliarijaksaringilatit; panît tunijaksaringilat tâpsoma erninganut, tâpsomalo paninga tigujaksaringilat ernernut.

⁴ Tâpsoma ernît sangutiniarmago maligungnaiᴋovlugo uvamnik, kivgartorᴋovlugo assimnik Gûdingoarnik; taimaglo Nâlekab ningarninga ilingnut katsungaililârpok, asserorsarniarpâselo.

⁵ Imailiorvigijaksarivatille; tunerguservingit oggotitaksarivase, napajoliarimajangillo navgorlugit, napârtungillo nakkalugit, Gûdingoangillo ulimârsimajut ikomamut nungulugit.

⁶ Inuᴋutaugapse ivsornaitut Nâlekamut Gûdipsingnut; Nâlekab Gûdivît annerivâtit inôᴋatigêksoarnit tamainit nunab ᴋânganêtunit inuᴋutauᴋovlutit adseungitok tâpsomunga.

⁷ Nâlekab ungagilaungilâse annerilaungilâselônêt ununersaugapse inôᴋatigêksoarnit assipsingnit tamainit; ikinerpaulaurapse inôᴋatigêksoarnit;

⁸ Nâlekable nagligidlarmase, angerninelo oᴋautigimariktane atâtapsingnut serᴋomitsomanginamiuk, Nâlekab tamaungautipâse aggangnut pitsartujunut, piuliluse iglomit kipalovingmit, Faraub, Egiptenib ataningata, agganginit.

⁹ Taimaimat ᴋaujijuksauvotit Nâlegak Gûdît Gûdeongmat; Gûde nelâgôrtok nelautsititsilune angerutigijaminik nâpkiniklunelo nagligijiminik perᴋojaminiglo nâlektunik kinguvârêt tausendit tikilugit.

¹⁰ Omigijinele akkiniarpait sagvartomik, asseroromavlugit; kassunganiangilarlo ômigijiminut, akkinialârpâ sagvartomik.

¹¹ Taimaimat kamagijaksarivatit perᴋojat, maligaksallo, idluarsautiksallo, perᴋojarijakka ilingnut uvlome, piniarlugillo.

¹² Imailarporlo, idluarsautiksat makkoa tusârangne, kamagilugillo, piniarlugillo, Nâlekab Gûdivît angerutigijane nâpkiningninelo oᴋautigimariktane atâtagijarnut, nelautsitilârivait;

¹³ Nagliginiarpâtillo, saimarsarniarpâtillo, unuksitiniarpâtillo; timivîllo paungangit nunavîllo paungangit saimarsarniarpait, senaugaksatillo, vainiksatillo, orᴋsutillo, tuktuvaᴋotivîllo piarangit, saugakotivîllo piarangit, nuname oᴋamariklune angerutigijane atâtagijarnut tunijomavlugo ilingnut.

¹⁴ Piloriluarᴋojaulârpotit inôᴋatigêksoarnit tamainit; anguteᴋaromângilaᴋ arnaᴋaromângilarlo kinguvâksaliungitomik akunapsingne nergjuteᴋotipselônêt akorngane.

¹⁵ Nâlekablo ᴋanimanerit tamaita pêjarniarpait ilingnit; nelipsartautiniangilâtillo Egiptenemiut ᴋanimasealungita ilitarijavît nelianut, pitilârpaille tamainut ômigijingnut.

¹⁶ Inôᴋatigêksuillo Nâlekab Gûdivît tunijomârtangit ilingnut tamaita nungutaksarivatit; ijivît nâpkigijaksaringilait, Gûdingoangillo kivgartoraksaringilatit; napperniutaunajarmatta ilingnut.

¹⁷ Omatikullo oᴋaruvit: inôᴋatigêt ukkua ununersauvut uvamnit; ᴋanok sunaᴋarungnaititsungnarpakkâ?

¹⁸ Erᴋsigijaksaringilatit; erᴋaitsiartuksauvotit Nâlekab Gûdivît piniarnerilauᴋtanginik Faraomut Egiptenemiunullo tamainut;

¹⁹ Oktornerit angijut ijivît takojangit, nelunaikutallo, tatamnartullo, aggaillo pitsartujut, tallerlo issamijok, Nâlekab Gûdivît anititsijutigilauᴋtangit ilingnik; inôᴋatigêksuit erᴋsigijatit tamaita Nâlekab Gûdivît taimailiorvigijomârivait.

²⁰ Taimaktauk Nâlekab Gûdivit igupsavaksoak tilijomârpâ tâpkoa akornganut, amiakojut ilingnillo ijertôrtut nunguᴋârtinagit sângne.

²¹ Kapiasûtigijaksaringilatit; Nâlekab Gûdivît akunapsingnêngmat, Gûde angijok ileranadlartorlo.

²² Nâlekablo Gûdivît inôᴋatigêksuit tâpkoa nelleᴋârdlutik ajaktoromârpait sângnit; tagvainak nungutaksaringilatit, nergjutit naternarmêtut unuksivalialuarᴋonagit ilingnut.

²³ Nâlekable Gûdivît tunergutigijomârpait sivunerne, sâlagijomârpaillo sâlaᴋarnermut angijomut nungutauᴋârtinagit.

²⁴ Ataningillo tunijomârpait aggangnut, atingillo pêjaraksarivatit ᴋilaub atânit; nangerungnartokarniangilaᴋ sângne, nungutsiᴋârtinak tâpkoninga.

²⁵ Gûdingoaliarimajangit ikomamut nungutaksarivase, golde silberelônêt tâpkonanêtok pijomajaksaringilatit, tigunagillônêt nangminerijomavlugit, nappertauᴋonak tâpkonunga; tamanna maᴋojungnarmat Nâlekamut Gûdingnut;

²⁶ Maᴋojungnartomik itertitsijuksaungilatit iglungnut, ôminartungorᴋonak tâpsotunak; naggogijaksarivat mamaigilugolo; nungutaksaudlarmat.