Deuteronomy 6 - Labrador Inuttitut Heritage Bible

¹ Tamadjalo perᴋojat, maligaksallo, idluarsautiksallo Nâlekab Gûdipse ajuᴋertûtauᴋojangit ilipsingnut, piniarᴋovluse tâpkoninga nuname ikârvigijaksapsingne pigijomavlugo;

² Sivôraᴋovlutit Nâlekamik Gûdingnik maligaksauᴋojangit perᴋojangillo, perᴋojijutigijakka ilingnut, maliklugit piniarᴋovlutit, igvit, ernîllo, erngutallo, uvlut inôvigijatit tamaita nâvlugit; uvlutillo unuksititauᴋovlugit.

³ Nâlagit, taimaimat, Israêl, kamagitsiarlugo piniarᴋovlutit; piloridlarᴋovlutit, unuksivaliaᴋovlutillo sôngojomik, sorlo Nâlekab, atâtagijavît Gûdingata, angervigingmatit, nuname imungmik igupsaujârtullo orᴋsuanik kôlingme.

⁴ Omat, Israêl; Nâlegak Gûdivut Nâlegaujotôvok;

⁵ Nâlegarlo Gûdît nagligijaksarivat ômatingnut tamânut, tarningnullo tamânut, pitsartunernullo tamainut.

⁶ Oᴋautsillo ukkua, perᴋojijutigijakka ilingnut uvlorme tamattomane, ômamiutarijaksarivatit;

⁷ Katsungailutillo ajuᴋertûtigijaksarivatit ᴋitorngarnut, oᴋautigijaksarivatillo iglungne iksivaguvit, arvertartilutillo apᴋosinerme, inangatilutillo, makisimatilutillo.

⁸ Aggangnullo ᴋelaksoraksarivatit nelonaikutarilugit, nimmigaksarivatillo ijîkpît akorngangne.

⁹ Aglagaksarivatillo iglovît upkoangata napajûgingnut, itertarvingnullo.

¹⁰ Nâlekablo Gûdivit tikiutitikpatit nunamut, oᴋamariklune angerutigijaminut atâtagijarnut, Abrahamut, Isaarmullo, Jakomullo, tunijomavlugo ilingnut; iglugasaksuit angijut ânanaudlartullo, senalaungitatit,

¹¹ Iglullo tatatut perᴋutinik piojunik tamainik, itârᴋalaungitarnik, imeᴋtarvillo senamatsiartut, senalaungitatit perorsêvillo vaineliksatalit, perorsêvillo orᴋsuliksatalit, ililaungilatit, nerriguvillo aᴋeartorniarlutillo;

¹² Tagva udjertorit puigorᴋonak Nâlekamik tikiutjijingnik nunamit Egiptenemit, iglomit kipalovingmit.

¹³ Nâlegak Gûdît sivôragijaksarivat; tâmna kivgartoraksarivat, tâpsomalo atinga taivlugo angertuksauvotit.

¹⁴ Gûdib assingit, inôᴋatigêksuit avatipsingnêtut Gûdigijangit, maligaksarilungilase;

¹⁵ Nâlegak Gûdît akunapsingnêtok Gûdeongmat ilungertortok; Nâlekab Gûdivît ningarninga ilingnik katsungailiaᴋiᴋonago, pêrᴋsiᴋonagolo ilingnik nunab ᴋânganit.

¹⁶ Nâlegak Gûdise ôktoraksaringilase, sorlo ôktolaurapsiuk Massame.

¹⁷ Katsungaivluse nâlektuksauvose Nâlekab Gûdipse perᴋojanginik, kigligiutsininginiglo, maligaksanginiglo, perᴋolauᴋtanginik ilingnut.

¹⁸ Idluartomiglo ajungitomiglo Nâlekab takkoane piniartuksauvotit, piloridlarᴋovlutit, iterungnarᴋovlutit pigilugolo nuna piodlartok Nâlekab angerutigijanga atâtagijarnut,

¹⁹ Omigijitit tamaita ajaktoromavlugit sângnit, sorlo Nâlegak oᴋarmat.

²⁰ Neliutome ᴋailertome ernivît aperikpatit, oᴋarlune: Kigligiutjinerit, maligaksallo, idluarsautiksallo, Nâlekab perᴋojangit ilingnut, ᴋanok tukkeᴋarᴋât?

²¹ Ernît oᴋautilârpat: Faraub kipalogilauᴋpâtigut Egipteneme; Nâlekablo tikiupâtigut Egiptenemit aggangnut pitsartujunut;

²² Nâlekablo nelunaikutat tatamnartullo, angijut kapianartullo pitipait Egiptenemut, Faraomullo, iglomioᴋatinginullo tamainut, ijipta sângine;

²³ Tikiupâtigullo tagvangat, itertitsomavluta, nunalo angerutigijane atâtagijaptingnut tunijomavlugo uvaptingnut.

²⁴ Nâlekablo piniarᴋovâtigut maligaksanik ukkuninga tamainik, Nâlegak Gûdivut sivôragitsainarlugo idluarᴋutiksaptingnut, inôtitsijungnarᴋovlugo uvaptingnik, sorlo uvlome saᴋᴋijârmat.

²⁵ Idluarsijutigilârpavullo, perᴋojaᴋ tamanna nâvlugo nâmaksitikuptigo Nâlekab Gûdipta sângane, sorlo tâpsoma perᴋongmatigut.