Deuteronomy 5 - Labrador Inuttitut Heritage Bible

¹ Mosesiblo Israêlikut tamaita ᴋaiᴋovait, oᴋautilugillo: Ilipse, Israêlikut, perᴋojat maligaksallo, oᴋautigijakka uvlome siutipse sângane, tusarsigik ilinialugillo, puigorniarasigiglo, tamakkoa maliklugit piniarᴋovluse.

² Nâlekab Gûdipta angerᴋatigilauᴋpâtigut Horebeme.

³ Nâlekab angerᴋatigêngneᴋ tamanna nâmaksitilaungilâ atâtagijaptingnut, uvaptingnulle nangminiptingnut, ilûnaptingnut inôvluta mânêtogut uvlome.

⁴ Kênarmit kênarmut oᴋarvigilauᴋpâse ᴋakᴋame ikomab iluanit;

⁵ (Uvanga nangilauᴋpunga Nâlekab ilipselo akunapsingne taipsomane, nelonaijaivigijomavluse Nâlekab oᴋausinganik; ikoma pivlugo erᴋsidlalaurapse, ᴋakᴋamullo majoralaunginapse;) oᴋarlune:

⁶ Uvanga Nâlegauvunga Gûdît, âtsisimajok ilingnik nunamit Egiptenemit, iglomit kipalovingmit.

⁷ Senipkut assimnik Gûdeᴋartuksaungilatit.

⁸ Inungoarmik adsingoarmiglônêt senajuksaungilatit pivlutit, takpâne ᴋilangmêtûb adsinganiglônêt, ᴋilaub atânêtûb adsinganiglônêt, nunab atânêtûb imânêtûb adsinganiglônêt;

⁹ Taimaitut tuksiarvigijaksaringilatit kivgartornagillo; uvanga Nâlegaujunga Gûdît ilungertudlarlunga Gûdeogama, atâtat idluitulininginik pidlarnikteojunga ᴋitorngangine, uvamnik ômisuktune, ernerêt kingorlerêt pingajungit sitamangillo tikidlugit;

¹⁰ Nâpkiningnermigle saᴋᴋertitsivunga tausendeoᴋattartune nagligijimne perᴋojamniglo nâlektune.

¹¹ Nâlekab Gûdivît atinganik atornerluktuksaungilatit, Nâlekab pidlartailiniangimago atinganik atornerluktok.

¹² Uvlok Sabbateojok erᴋaruk, ivlerijauᴋovlugo ilingnut, sorlo Nâlekab Gûdivît perᴋongmatit.

¹³ Uvlut sixit kingorlerêklutik senajuksauvotit, suliaksatillo tamaita piniarlugit,

¹⁴ Uvlulle seveningane Nâlekab Gûdivît sabbatinga neliutivok; tagva sumiglônêt senajuksaungilatit, igvit, ernîllônêt, panîllônêt, kivgallônêt angut, kivgallônêt arnaᴋ, tuktuvaᴋotîllônêt, siutiᴋortojokotîllônêt, nergjuteᴋotivît neliallônêt, ilagingitallônêt najugarnêtok; kivgat angut, kivgallo arnaᴋ merngoerserᴋovlugo iliktut.

¹⁵ Erᴋaijuksauvotillo kivgaulauravit nuname Egipteneme, Nâlekablo Gûdivît tikiutivâtit tagvangat aggangnut pitsartujunut tallermullo issamijomut; tamanna pivlugo Nâlekab Gûdivît perᴋovâtit uvloᴋ sabbateojok ivlerijaksarigangne.

¹⁶ Atâtangnik anânangniglo nâlektuksauvotit, sorlo Nâlekab Gûdivît perᴋongmatit; uvlutit sivitoᴋovlugit, inôtsialuarᴋovlutillo nuname Nâlekab Gûdivît tunijangane ilingnut.

¹⁷ Inuartuksaungilatit.

¹⁸ Nuliarêngnermik asseroijuksaungilatit.

¹⁹ Tigliktuksaungilatit.

²⁰ Inôᴋatitit saglôtigivlugit oᴋartuksaungilatit.

²¹ Inôᴋativit nulianganik pijomajuksaungilatit; inôᴋativîllônêt iglunganik, perorsêvinganiglônêt, kivganganiglônêt angumik, kivganganiglônêt arnamik, tuktuvaᴋotinganiglônêt, siuteᴋortojokotinganiglônêt, sunamiglônêt inôᴋativît pinganik pijomajuksaungilatit.

²² Oᴋautsit makkoa Nâlekab oᴋauserilauᴋpait ilagêngnipsingnut katimajunut ᴋakᴋame ikomab, nuvujablo, tâᴋtoksûblo iluanit, nipersoaᴋarlune: ilalungilaillo. Aglakpaillo aglagvîngnut ujaraujungnut maggûngnut, uvamnullo tunilugit.

²³ Nippele tâᴋtoksûb iluanit tusarapsiuk, ᴋakᴋak ikoâlatilugo ikomamut, uvamnôrlauᴋpose, kinguvârêngnipse angajokângit ilûnatik erᴋanartoᴋutigijaselo;

²⁴ Oᴋarposelo: Ahâk, Nâlekab Gûdipta ânanaunine opinartoksôninelo takojautipâk uvaptingnut, nippingalo tusarpavut ikomab iluanit: uvlorme tamattomane takovogut Gûdib inuk oᴋakᴋatigingmago, inôngmallo.

²⁵ Mânalo tagva sôk toᴋojuksauvitâ? Ikomaᴋsûb tamattoma nunguniarmatigut: Nâlekab Gûdipta nippinga tusarmiguptigo, toᴋolârpogut.

²⁶ Kinauvâ uvinilingnit tamainit tusarimajok Gûdib ômajûb nippinganik oᴋâlajomik ikomab iluanit uvaptitut, inôgannerlunelô?

²⁷ Igvit ᴋaglisalaurit tusarniarlutillo tamainik Nâlekab Gûdipta oᴋauserijomajanginik; igvillo oᴋautigikit uvaptingnut tamaita Nâlekab Gûdipta oᴋauserijangit ilingnut; tagva tusaromavavut piniarlugillo.

²⁸ Nâlekablo oᴋausipse nippingat tusarpâ oᴋarvigigap singa; Nâlekablo oᴋautivânga: Inugasaksuit makkoa oᴋausingita nippingat, oᴋauserijangita ilingnut, tusarpara; oᴋautigijangit ilûnatik piodlarput.

²⁹ ᴋanoktôk taimaitomik ômateᴋatsainarlit sivôraᴋovlugit uvamnik perᴋojakkalo tamaita maliklugit, piloridlarᴋovlugit, tâpkoa ᴋitorngangillo soraijuitomik.

³⁰ Ailerit, oᴋautilugillo: Angeraritse tupipsingnut.

³¹ Igville, noᴋangalerit najornimne, oᴋautigijomavakkalo ilingnut perᴋojat tamaita, maligaksallo, idluarsautiksallo, ajuᴋertûtigijaksarijatit tâpkonunga, piniarᴋovlugit tâpkoninga, nuname tunijamne tâpkonunga perᴋutauᴋovlugo.

³² Taimaimat kamatsiaritse piniarᴋovluse sorlo Nâlekab Gûdipse perᴋongmase; talerpingmullônêt saumingmullônêt sangujuksaungilase.

³³ Arvertartuksauvose apᴋome ilûnâne Nâlekab Gûdipse perᴋojangane ilipsingnut, inôᴋovluse, piloridlarᴋovluselo, unuksititsiᴋovluselo uvlupsingnik nuname pigilârtapsingne.