Deuteronomy 4 - Labrador Inuttitut Heritage Bible

¹ Manalo, Israêl, maligaksat idluarsautiksallo Ajuᴋertûtigijakka ilipsingnut tusarsigik, piniarᴋovluse tâpkoninga; inôᴋovluse, iterᴋovluselo nunalo Nâlekab, atâtapse Gûdingata, tunijanga ilipsingnut pigilugo.

² Oᴋauseᴋ perᴋojijutigijara ilipsingnut ilajaksaringilase ilangaraksarilungilaselônêt; Nâlekab Gûdipse perᴋojangit perᴋojarijakka ilipsingnut nelaudlugit piᴋovluse.

³ Ijise takovut Nâlekab piniarninginik Baal-peor pitjutigilugo; angutit ilûnaita malilauᴋtut Baal-peoremik Nâlekab pêjarpait akunapsingnit.

⁴ Ilipsele Nâlekamut Gûdipsingnut ungajose inôvose uvlome sulle, ilûnase.

⁵ Ahâk, ajuᴋertorpapse maligaksanik idluarsautiksaniglo, sorlo Nâlekab Gûdima perᴋongmanga, taimailiorᴋovluse nuname aivigijapsingne pigijomavlugo.

⁶ Taimaimat ivlerisigik piniarlugillo; tamanna ilisimanerigapsiuk silatunerilugolo inôᴋatigêksuit takkoane, tusalârtut maligaksauᴋojaujunik makkoninga tamainik, oᴋarniarlutiglo; Inôᴋatigêksuit tâpkoa ilisimadlarlutiglo silatudlartoksôvut.

⁷ Nane inôᴋatigêksoaᴋarᴋâ taimak ᴋanitigijomik Gûdelingnik, sorlo Nâlegak Gûdivut ᴋanitigingmat uvaptingnut ᴋaigarsugvigijarangaptigô?

⁸ Nanelônêt inôᴋatigêksoaᴋarᴋâ maligaksalingnik idluarsautiksalingniglo taimak idluartigijunik perᴋojatitut ukkutitunaᴋ uvlome unertutigijaptut ilipsingnût?

⁹ Udjertortuinarit ilingnik, tarnîllo katsungaidlutit pairiuk, puigorᴋonak pisimajunik ijîkpît takojangangnik, pêjarᴋonagillo ômatingnit uvlut inôvigilârtatit tamaita nâvlugit; ᴋaujijautikille ᴋitorngarnut ᴋitorngavillo ᴋitornganginut;

¹⁰ Uvloᴋ imna (puigornago) nangilauravit Nâlekab Gûdivît sângane Horebeme, Nâlekab oᴋautingmanga: Inuit katimatikit, tusartilârpakkalo oᴋauserijamnik, iliniarᴋovlugit sivôragijaksaringmanga uvlut inôvigilârtatik nuname tamaita nâvlugit, ajuᴋertuiᴋovlugillo ᴋitorngamingnik.

¹¹ Kaglilauᴋposelo nangerluselo ᴋakᴋab atâne; ᴋakᴋarlo ikomamut ikoâlavok ᴋilaub ᴋerᴋâ tikidlugo, tâᴋ, nuvujallo, tâᴋtoksoarlo ilautilugit.

¹² Nâlekablo oᴋarvigivâse ikomab iluanit; oᴋausingita nippingat tusarpase, tautulingmigle takolungilase; nippe kissiat tusarpase.

¹³ ᴋaujitipâselo angerutigijaminik piniartauᴋojaminik ilipsingnut, tagva perᴋojanik 10nik; aglakpaillo aglagvîngnut ujarᴋângnut maggûngnut.

¹⁴ Taipsomanelo Nâlekab ajuᴋertuiᴋovânga maligaksanik idluarsautiksaniglo piniaraksarijapsingnik nuname aivigijapsingne pigijomavlugo.

¹⁵ Taimaimat udjertudlaritse ilipsingnik, ilutselingmik sumiglônêt takolaunginapse uvlorme Nâlekab oᴋarvigilauᴋtangane ilipsingnut Horebeme ikomab iluanit;

¹⁶ Aseroiᴋonase ilipsingnik, ilipsingnullo inungoaliorᴋonase sunalônêt adsilivlugo, angutingoarmik arnangoarmiglônêt,

¹⁷ Nergjutingoarmiglônêt nunamêtomik, tingmingoarmiglônêt tingisômik ᴋilaub ikiangane,

¹⁸ Pâmgortungoarmiglônêt nuname pâmgorpaktomik, aulasakkangoarmiglônêt imânêtomik nunab atâne;

¹⁹ Arlortitsiᴋonaglônêt ijîkingnik ᴋilangmut, seᴋinerlo, taᴋᴋerlo, uvloritjallo, ᴋilaub katimgajokotingit, takonârlugit, kajungersartauniarlutillo tâpkoa pâmaktervigijomavlugit kivgartoromavlugillo, Nâlekab ilingatitangit inôᴋatigêksoarnut tamainut ᴋilaub ilûnane atâne.

²⁰ Nâlekab ilaliormase anitiluselo kikiangmik auktitsivingmit, Egiptenemit, inuᴋutauᴋovluse kingormgutijaksamik tâpsomunga, sorlo uvlome igapse.

²¹ Nâlekablo ama ningarvigivânga pitjutigivluse, oᴋamariklune Jordan ikâraksaringinapko, nunalo piodlartok Nâlekab Gûdivît kingormgutijaksautitanga ilipsingnut aivigijaksaringinapko;

²² Toᴋojuksaugamale nuname tamattomane, Jordaniblo ungatânôrtuksaunanga; ilipsele ikâlârpose nunatsiarlo tâmna pigilugo.

²³ Udjertoritse nangminipsingnik, puigorᴋonase Nâlekab Gûdipse angerutigijanganik ilipsingnut, adsingoaliorᴋonaselo sunab adsinganik Nâlekab Gûdivît inerterutigijanganik ilipsingnik.

²⁴ Nâlegak Gûdît ikomauvok nungutsijok, Gûdeovlune ilungertortok.

²⁵ Kitorngatarupse erngutatârluselo, nunamêᴋitârupselo, asserorupselo ilipsingnik, adsingoaliorluselo Nâlekab Gûdivît takkoane, tâmna ningarsârlugo;

²⁶ ᴋilak nunalo kigligiutjingorᴋovâka ilipsingnut uvlorme tamattomane, mânakut pêjartaudlamarilârapse, nunamit, Jordan ikârdlugo, aivigijapsingnit pigijomavlugo; uvluse tagvane unuksitiniangilase, nungutaumarilârposele.

²⁷ Nâlekablo siamartitsomârpâse inôᴋatigêksuit akorngane, amiakojomârposelo inuit ikitut inôᴋatigêksoarne Nâlekab aularutjauviotitangane ilipsingnut.

²⁸ Tagvanelo kivgartulârpose Gûdingoarnik, inuit aggangita sanajanginik, ᴋejungnik ujarᴋaniglo, tautulungitunik tusangituniglônêt, nerrilungitunik naijungnangituniglônêt.

²⁹ Tagvangallo Nâlegak Gûdît ᴋenerungne, nagvâlârpat, ômamut tamânut tarnemullo tamânut ᴋenerungne.

³⁰ Kapiasungnermêguvit, tamakkoa ilûnatik tikipatit uvlune kingorlerne, uteromârpotit Nâlekamut Gûdingnut, tâpsomalo nippinga nâleklugo;

³¹ Nâlegak Gûdît Gûdeongmat nâpkigosuktok; tâpsoma ᴋujanârutiginiangilâtit asserorniangilâtillônêt, puigorniangilarlo angernermik angerutigilauᴋtaminik atâtagijarnut.

³² Aperᴋutigikit uvlut ᴋângersimajut, sivunernêtut, uvlormit Gûdib pingortitsivigilauᴋtanganit inungnik nuname, kilaublo issuanit issuata aipânut, mattotunak angitigijoᴋalaungmangât, mattotunarlônêt tusaumajaujoᴋarmangât.

³³ Inuit tusalauᴋsimavât Gûdib nippinganik ikomab iluanit oᴋartomik, sorlo igvit tusaravit, inôvlutiglô?

³⁴ Gûdelônêt tigusinasualauᴋsimavâ inôᴋatigêksoarnik nangminerijomajaminik inôᴋatigêksuit tâpkoa assingita akornganit, ôktornernut, nelunaikutanut, tatamnartulinernut, unatarnermut, aggangnut pitsartudlartunut, tallermullo issamijomut, kapianartovaksoarnullo, sorlo Nâlekab Gûdipse piniulaungmase Egipteneme ijipse sânginê?

³⁵ Ilingnut unertutigijaulauᴋpok, ᴋaujiᴋovlutit Nâlegak, tâmnaungmat Gûde, nelleᴋangimallo.

³⁶ ᴋilangmit tusartipâtit nippiminik, ajuᴋertoromagamitit; nunamelo takotipâtit ikomaᴋsoaminik, oᴋausingillo tusarpatit ikomab iluanit.

³⁷ Atâtatillo nagligilauramigit, tamanna pivlugo tâpkoa kinguvângit annerivait kingorngane, Egiptenemillo tikiupâtit najornerminut pitsartunerminut;

³⁸ Inôᴋatigêksuit angerᴋijatit pitsarᴋijatillo ᴋemâtitsomavlugit sivunernit, itertitsomavlutit, tâpkoa nunangat kingormgutijaksautitsomavlugo ilingnut, sorlo uvlome ingmat.

³⁹ Taimaimat nelojungnailerit uvlome, ômamiutarilugolo, Nâlegak tâmnaungmat ᴋilangme pâne, nunamelo atâne Gûdeojok; nelleᴋangilak.

⁴⁰ Maliluaraksarivatillo tâpsoma maligaksangit perᴋojangillo, uvlome ilingnut perᴋojarijakka, pilluangoᴋovlutit, igvit ᴋitorngatillo kingunerne, uvlutillo unuksiᴋovlugit nuname Nâlekab Gûdivît tunijangane ilingnut soraijuitomik.

⁴¹ Mosesib tagva iglugasaksuit pingasuit Jordanib ungatâne seᴋinerûb nuiviata nelâne ingmikôrtipait;

⁴² Tagvunga ᴋemâᴋovlugo inungmik toᴋotsijok, pijârinane, ômiginagolo sivorngane toᴋotsisimajok; ᴋêmâvlunelo iglugasaksuit makkoa nelianut, inôᴋovlugo;

⁴³ Tamadja, Bezer, sunaᴋajuitome naternarme, Rubenekunut; Ramotelo, Gileademe, Gadikunut; Golanelo, Bâsaneme, Manassekunut.

⁴⁴ Tamadjalo maligaksat Mosesib pititangit Israêlikut sânginut;

⁴⁵ Tamadja kigligiutjinerit, maligaksallo, idluarsautiksallo Mosesib oᴋautigijangit Israêlikunut Egiptenemit anisimangmatta;

⁴⁶ Jordanib ungatâne, naᴋsarme Bet-peorib nelâne, Sihonib, Amorikut ataningata, Hesboneme ineᴋalauᴋtûb, nunangane, tâmna Mosesib Israêlikullo sâlagivât Egiptenemit pigamik;

⁴⁷ Nunangalo tiguvât pigilugolo, Ogiblo, Bâsanib ataningata, nunangatauᴋ, Amorikut atanîgit maggûk, Jordanib ungatâne, seᴋerngûb nuiviata nelâne;

⁴⁸ Aroeremit, Arnonib naᴋsangata kiglinganêtomit, ᴋakᴋak Sion, (tagva Hermon) tikidlugo,

⁴⁹ Naᴋsarsoarlo ilûnane Jordanib ungatâne taunane, naᴋsarsûb imarbinga, Pisgab atsangajângita timâne, tikidlugo.