Deuteronomy 34 - Labrador Inuttitut Heritage Bible

¹ Moseselo majorarpok Moabib naternanginit ᴋakᴋamut Nebomut, Pisgab nuvuanut, Jerikob akianêtomut. Nâlekablo unertutjivigivâ Gileadib nunanganik ilûnânik Dane tikidlugo;

² Naftaliblo nunanganik ilûnânik, Efraimiblo Manassiblo nunangangnik, Judablo nunanganik imarbik kangidlek tikidlugo;

³ Anêtorlo, Jerikoblo, iglugasaksuit palmelit, naᴋsangata naternanganik, Zoar tikidlugo.

⁴ Nâlekablo oᴋautivâ: Tamanna nuna, nelâgôrmariktomik angerutigilauᴋtara Abrahamut, Isaarmullo, Jakomullo, oᴋarlunga: Tunijomajomârpara kinguvângnut; ijingnut takotipagit tâpsominga, tagvungale ikârtuksaungilatit.

⁵ Taimaimallo Mosese, Nâlekab kivganga, toᴋovok tagvane Moabib nunangane, Nâlekab oᴋausinga maliklugo.

⁶ Ilijartorpâlo naᴋsarme Moabib nunangane, Bet-Peorib nelâne; ᴋaujimajokangilarle iluvinganik uvlome tikidlugo.

⁷ Moseselo jâreᴋarpok 120nik toᴋogame; ijîgik takpêlaungilak, nukingillo soᴋosingilat.

⁸ Israêliblo ᴋitorngangita Mosese ᴋeagivât uvlunik 30nik Moabib naternangine; taimaglo uvlut ᴋeavit Mosesib oggorijauviane nâvut.

⁹ Josualo, Nunib erninga, ilumertauvok anernermik silatunermik, Mosesib aggane ililaungmagit tâpsomunga; Israêliblo ᴋitorngangita nâlakpât, piniarlutiglo sorlo Nâlekab Mosese perᴋolaungmago.

¹⁰ Taimangallo nelautaijomik Mosesetun-itomik, Nâlekab ilitarijanganik kênarmit kênarmut, makitokalungilak;

¹¹ Nelunaikutane tatamnartunelo Nâlekab tiliklerutigijangine tâpsominga, piniarlugit nuname Egipteneme, Faraomullo, tâpsomalo kivganginut, nunanganullo ilûnânut perᴋovlugo;

¹² Aggangnullo pitsartudlartunut, kapianartunullo angijunut Mosesib piniartanginut Israêlekut ilûnatik takkoane.